శివమహిమ స్తోత్రమ్ / Shivamahima Stotram

మహేశానన్తాద్య త్రిగుణరహితామేయవిమల 

స్వరాకారాపారామితగుణగణాకారినివృతే | 

నిరాధారాధారామరవర నిరాకార పరమ 

ప్రభాపూరాకారావర పర నమో వేద్య శివ తే ||౧|| 

 

నమో వేదావేద్యాఖిలజగదుపాదాన నియతం 

స్వతన్త్రాసామాన్తానవధుతినిజాకారవిరతే | 

నివర్తన్తే వాచః శివభజనమప్రాప్య మనసా 

యతోఽశక్తాః స్తోతుం సకృదపి గుణాతీత శివ తే ||౨|| 

 

త్వదన్యద్వస్త్వేకం నహి భవ సమస్తత్రిభువనే 

విభుస్త్వం విశ్వాత్మా న చ పరమమస్తీశ భవతః | 

ధ్రువం మాయాతీతస్త్వమసి సతతం నాత్ర విషయో న తే 

కృత్యం సత్యం క్వచిదపి విపర్యేతి శివ తే ||౩|| 

 

త్వయైవేమం లోకం నిఖిలమమలం వ్యాప్య సతతం 

తథైవాన్యాం లోకస్థితిమనఘ దేవోత్తమ విభో | 

త్వయైవైతత్సృష్టం జగదఖిలమీశాన భగవ-

న్విలాసోఽయం కశ్చిత్తవ శివ నమో వేద్య శివ తే ||౪||

 

జగత్సృష్టేః పూర్వం యదభవదుమాకాన్త సతతం 

త్వయా లీలామాత్రం తదపి సకలం రక్షితమభూత్ || 

తదేవాగ్రే భాలప్రకటనయనాద్భుతకరా-

జ్జగద్దగ్ధ్వా స్థాస్యస్యజ హర నమో వేద్య శివ తే ||౫|| 

 

విభూతీనామన్తో భవ న భవతో భూతివిలస-

న్నిజాకార శ్రీమన్న గుణగణసీమాప్యవగతా | 

అతద్వ్యావృత్యాఽద్ధా త్వయి సకలవేదాశ్చ చకితా 

భవన్త్యేవాసామప్రకృతిక నమో ధర్ష శివ తే ||౬|| 

 

విరాడ్ర్రూపం యత్తే సకలనిగమాగోచరమభూ-

త్తదేవేదం రూపం భవతి కిమిదం భిన్నమథవా | 

న జానే దేవేశ త్రినయన సురారాధ్యచరణ 

త్వమోఙ్కారో వేదస్త్వమసి హి నమోఽఘోర శివ తే ||౭|| 

 

యదన్తస్తత్వజ్ఞా మునివరగణా రూపమనఘం 

తవేదం సఞ్చిన్త్య స్వమనసి సదాసన్నవిహతాః | 

యయుర్దివ్యానన్దం తదిదమథవా కిం తు న తథా 

కిమేతజ్జానేఽహం శరణద నమః శర్వ శివ తే ||౮|| 

 

తథా శక్త్యా సృష్ట్వా జగదథ చ సంరక్ష్య బహుధా 

తతః సంహౄత్యైతన్నివసతి తదాధారమథవా | 

ఇదం తే కిం రూపం నిరుపమ న జానే హర విభో 

విసర్గః కో వా తే తమపి హి నమో భవ్య శివ తే ||౯|| 

 

తవానన్తాన్యాహుః శుచిపరమరూపాణి నిగమా-

స్తదన్తర్భూతం సత్సదసదనిరుక్తం పదమపి | 

నిరుక్తం ఛన్దోభిర్నిలయనమిదం వానిలయనం 

న విజ్ఞాతం జ్ఞాతం సకృదపి నమో జ్యేష్ఠ శివ తే ||౧౦|| 

 

తవాభూత్సత్యం చానృతమపి చ సత్యం కృతమభూదృతం 

సత్యం సత్యం తదపి చ యథా రూపమఖిలమ్ | 

యతః సత్యం సత్యం శమమపి సమస్తం తవ విభో 

కృతం సత్యం సత్యానృతమపి నమో రుద్ర శివ తే ||౧౧|| 

 

తవామేయం మేయం యదపి తదమేయం విరచితం 

న వామేయం మేయం రచితమపి మేయం విరచితుమ్ | 

న మేయం మేయం తే న ఖలు పరమేయం పరమయం 

న మేయం న నామేయం వరమపి నమో దేవ శివ తే ||౧౨|| 

 

తవాహారం హారం విదితమవిహారం విరహసం 

నవాహారం హారం హర హరసి హారం న హరసి | 

న వాహారం హారం పరతరవిహారం పరతరం 

పరం పారం జానే నహి ఖలు నమో విశ్వశివ తే ||౧౩|| 

 

యదేతత్తత్త్వం తే సకలమపి తత్త్వేన విదితమ్

న తే తత్త్వం తత్త్వం విదితమపి తత్త్వేన విదితమ్ | 

న చైతత్తత్త్వం చేన్నియతమపి తత్త్వం కిము భవే 

న తే తత్త్వం తత్త్వం తదపి చ నమో వేద్య శివ తే ||౧౪|| 

 

ఇదం రూపం రూపం సదసదమలం రూపమపి చే-

న్న జానే రూపం తే తరతమవిభిన్నం పరతరమ్ | 

యతో నాన్యద్రూపం నియతమపి వేదైర్నిగదితం 

న జానే సర్వాత్మన్ క్వచిదపి నమోఽనన్త శివ తే ||౧౫|| 

 

ంఅహద్భూతం భూతం యదపి న చ భూతం తవ విభో 

సదా భూతం భూతం కిము న భవతో భూతవిషయే | 

యదాభూతం భూతం భవతి హి న భవ్యం భగవతో 

భవాభూతం భావ్యం భవతి న నమో జ్యేష్ఠ శివ తే ||౧౬|| 

 

వశీభూతా భూతా సతతమపి భూతాత్మకతయా 

న తే భూతా భూతాస్తవ యదపి భూతా విభుతయా | 

యతో భూతా భూతాస్తవ తు న హి భూతాత్మకతయా 

న వా భూతా భూతాః క్వచిదపి నమో భూత శివ తే ||౧౭||

 

న తే మాయామాయా సతతమపి మాయామయతయా 

ధ్రువం మాయామాయా త్వయి వర న మాయామయమపి | 

యదా మాయామాయా త్వయి న ఖలు మాయామయతయా 

న మాయామాయా వా పరమయ నమస్తే శివ నమః ||౧౮|| 

 

యతన్తః సంవేద్యం విదితమపి వేదైర్న విదితం 

న వేద్యం వేద్యం చేన్నియతమపి వేద్యం న విదితమ్ | 

తదేవేదం వేద్యం విదితమపి వేదాన్తనికరైః 

కరావేద్యం వేద్యం జితమితి నమోఽతర్క్య శివ తే ||౧౯|| 

 

శివం సేవ్యం భావం శివమతిశివాకారమశివం 

న సత్యం శైవం తచ్ఛివమితి శివం సేవ్యమనిశమ్ | 

శివం శాన్తం మత్వా శివపరమతత్త్వం శివమయం 

న జానే రూపత్వం శివమితి నమో వేద్య శివ తే ||౨౦|| 

 

యదజ్ఞాత్వా తత్త్వం సకలమపి సంసారపతితం 

జగజ్జన్మావృత్తిం దహతి సతతం దుఃఖనిలయమ్ | 

యదేతజ్జ్ఞాత్వైవావహతి చ నివృత్తిం పరతరాం 

న జానే తత్తత్త్వం పరమితి నమో వేద్య శివ తే ||౨౧|| 

 

న వేదం యద్రూపం నిగమవిషయం మఙ్గళకరం 

న దృష్టం కేనాపి ధ్రువమితి విజానే శివ విభో | 

తతశ్చిత్తే శంభో నహి మమ విషాదో‍ఽఘవికౄత్తిః 

ప్రయత్నల్లబ్ధేఽస్మిన్న కిమపి నమః పూర్ణ శివ తే ||౨౨|| 

 

తవాకర్ణ్యాగూఢం యదపి పరతత్త్వం శ్రుతిపరం 

తదేవాతీతం సన్నయనపదవీం నాత్ర తనుతే | 

కదాచిత్కిఞ్చిద్వా స్ఫురతి కతిధా చేతసి తవ 

స్ఫురద్రూపం భవ్యం భవహర పరావేద్య శివ తే ||౨౩||

 

త్వమిన్దుర్భానుస్త్వం హుతభుగసి వాయుశ్చ సలిలం 

త్వమేవాకాశోఽసి క్షితిరసి తథాఽఽత్మాఽసి భగవన్ | 

తతః సర్వాకారస్త్వమసి భవతో భిన్నమనఘాన్న 

తత్సత్యం సత్యం త్రినయన నమోఽనన్త శివ తే ||౨౪|| 

 

విధుం ధత్సే నిత్యం శిరసి మృదుకణ్ఠోఽపి గరళం 

నవం నాగాహారం భసితమమలం భాసురతనుమ్ | 

కరే శూలం భాలే జ్వలనమనిశం తత్కిమితి తే 

న తత్త్వం జానేఽహం భవహర నమః కుర్ప శివ తే ||౨౫|| 

 

తవాపాఙ్గః శుద్ధో యది భవతి భవ్యే శుభకరః 

కదాచిత్త్కస్మింశ్చిల్లధుతరనరే విప్రభవతి | 

స ఏవైతాల్లోకాన్ రచయితుమలం సాపి చ మహాన్-

కృపాధారోఽయం సుకయతి నమోఽనన్త శివ తే ||౨౬|| 

 

భవన్తం దేవేశం శివమితరగీర్వాణసదృశం 

ప్రమాదాద్యః కశ్చిద్యది యదపి చిత్తేఽపి మనుతే | 

స దుఃఖం లబ్ధ్వాఽన్తే నరకమపి యాతి ధ్రువమిదం 

ధ్రువం దేవారాధ్యామితగుణ నమోఽనన్త శివ తే ||౨౭|| 

 

ప్రదోషే రత్నాఢ్యే మృదులతరసింహాసనవరే 

భవానీమారూఢామసకృదపి సంవీక్ష్య భవతా | 

కృతం సమ్యఙ్నాఠ్యం ప్రథితమితి వేదోఽపి భవతి 

ప్రభావః కో వాఽయం తవ హర నమో దీప శివ తే ||౨౮|| 

 

శ్మశానే సఞ్చారః కిము శివ న తే క్వాపి గమనం

యతో విశ్వం వ్యాప్యాఖిలమపి సదా తిష్ఠతి భవాన్ | 

విభుం నిత్యం శుద్ధం శివముపహతం వ్యాపకమితి 

శ్రుతిః సాక్షాద్వక్తి త్వయమపి నమః శుద్ధ శివ తే ||౨౯|| 

 

ధనుర్మేరుః శేషో ధనువరగుణో యానమవని-

స్తవైవేదం చక్రం నిగమనికరా వాజినికరాః | 

పురోలక్ష్యం యన్తా విధిరిపుహరిశ్చేతి నిగమః 

కిమేవం త్వన్వేష్యో నిగదతి నమః పూర్ణ శివ తే ||౩౦|| 

 

మృదుః సత్త్వం త్వేతద్భవమనఘయుక్తం చ రజసా 

తమోయుక్తం శుద్ధం హరమపి శివం నిష్కళమితి | 

వదత్యేకో వేదస్త్వమసి తదుపాస్యం ధ్రువమిదం 

త్వమోఙ్కరాకారో ధ్రువమితి నమోఽనన్త శివ తే ||౩౧|| 

 

జగత్సుప్తిం బోధం వ్రజతి భవతో నిర్గతమపి 

ప్రవృత్తిం వ్యాపరం పునరపి సుషుప్తిం చ సకలమ్ | 

త్వదన్యం త్వత్ప్రేక్ష్యం వ్రజతి శరణం నేతి నిగమో 

వదత్యద్ధా సర్వః శివ ఇతి నమః స్తుత్య శివ తే ||౩౨|| 

 

త్వమేవాలోకానామధిపతిరుమానాథ జగతాం శరణ్యః 

ప్రాప్యస్త్వం జలనిధిరివానన్తపయసామ్ | 

త్వదన్యో నిర్వాణం తట ఇతి చ నిర్వాణయతిరప్యతః 

సర్వోత్కృష్టస్త్వమసి హి నమో నిత్య శివ తే ||౩౩|| 

 

తవైవాంశో భానుస్తపతి విధురప్యేతి పవనః 

పవత్యేషోఽగ్నిశ్చ జ్వలతి సలిలం చ ప్రవహతి |

తవాజ్ఞాకారిత్వం సకలసురవర్గస్య సతతమ్ 

త్వమేక: స్వాతన్త్ర్యం వహసి హి నమోఽనన్త శివ తే ||౩౪|| 

 

స్వతన్త్రోఽయం సోమః సకలభువనైకప్రభురయం 

నియన్తా దేవానామపి హర నియన్తాసి న పరః |

శివః శుద్ధా మాయారహిత ఇతి వేదోఽపి వదతి 

స్వయం తామాశాస్య త్రయహర నమోఽనన్త శివ తే ||౩౫|| 

 

నమో రుద్రానన్తామరవర నమః శఙ్కర విభో 

నమో గౌరీనాథ త్రినయన శరణ్యాఙ్ఘ్రికమల | 

నమః శర్వః శ్రీమన్ననఘ మహదైశ్వర్యనిలయ 

స్మరారే పాపారే జయ జయ నమః సేవ్య శివ తే || ౩౬|| 

 

మహాదేవామేయానఘగుణగణప్రామవసత-

న్నమో భూయో భూయః పునరపి నమస్తే పునరపి | 

పురారాతే శంభో పునరపి నమస్తే శివ విభో 

నమో భూయో భూయః శివ శివ నమోఽనన్త శివ తే ||౩౭||

 

కదాచిద్గణ్యన్తే నిబిడనియతవృష్టికణికాః 

కదాచిత్తత్క్షేత్రాణ్యపి సికతలేశం కుశలినా | 

అనన్తైరాకల్పం శివ గుణగణశ్చారురసనై-

ర్న శక్యం తే నూనం గణయితుముషిత్వాఽపి సతతమ్ ||౩౮|| 

 

మయా విజ్ఞాయైషాఽనిశమపి కృతా జేతుమనసా 

సకామేనామేయా సతతమపరాధా బహువిధాః | 

త్వయైతే క్షన్తవ్యాః క్వచిదపి శరీరేణ వచసా 

కృతైర్నైతైర్నూనం శివ శివ కృపాసాగర విభో ||౩౯|| 

 

ప్రమాదాద్యే కేచిద్వితతమపరాధా విధిహతాః 

కృతాః సర్వే తేఽపి ప్రశమముపయాన్తు స్ఫుటతరమ్ | 

శివః శ్రీమచ్ఛమ్భో శివశివ మహేశేతి చ జపన్ 

క్వచిల్లిఙ్గాకారే శివ హర వసామి స్థిరతరమ్ ||౪౦|| 

 

ఇతి స్తుత్వా శివం విష్ణుః ప్రణమ్య చ ముహుర్ముహుః | 

నిర్విణ్ణో న్యవసన్నూనం కృతాఞ్జలిపుటః స్థిరమ్ ||౪౧|| 

 

తదా శివః శివం రూపమాదాయోవాచ సర్వగః |

భీషయన్నఖిలాన్భూతాన్ ఘనగమ్భీరయా గిరా ||౪౨|| 

 

మదీయం రూపమమలం కథం జ్ఞేయం భవాదృశైః | 

యత్తు వేదైరవిజ్ఞాతమిత్యుక్త్వాఽన్తర్దధే శివః ||౪౩||

 

తతః పునర్విధిస్తత్ర తపస్తప్తుం సమారభత్ | 

విష్ణుశ్చ శివతత్త్వస్య జ్ఞానార్థమతియత్నతః ||౪౪|| 

 

తాదృశీ శివ మే వాచ్ఛా పూజాయిత్వా వదామ్యహమ్ |

నాన్యో మయాఽర్చ్యో దేవేషు వినా శంభుం సనాతనమ్ || ౪౫|| 

 

త్వయాపి శాఙ్కరం లిఙ్గం పూజనీయం ప్రయత్నతః |

విహాయైవాన్యదేవానాం పూజనం శేష సర్వదా ||౪౬|| 

 

ఇతి శ్రీస్కన్దపురాణే విష్ణువిరచితం శివమహిమస్తోత్రం సంపూర్ణమ్