సౌరాష్ట్రదేశే విశదేతిరమ్యే
జ్యోతిర్మయం చంద్రకళావతంసమ్ |
భక్తప్రదానాయ కృపావతీర్ణం
తం సోమనాథం శరణం ప్రపద్యే || ౧ ||
శ్రీశైలశృంగే వివిధప్రసంగే
శేషాద్రిశృంగేఽపి సదా వసంతమ్ |
తమర్జునం మల్లికపూర్వమేనం
నమామి సంసారసముద్రసేతుమ్ || ౨ ||
అవంతికాయాం విహితావతారం
ముక్తిప్రదానాయ చ సజ్జనానామ్ |
అకాలమృత్యోః పరిరక్షణార్థం
వందే మహాకాలమహాసురేశమ్ || ౩ ||
కావేరికానర్మదయోః పవిత్రే
సమాగమే సజ్జనతారణాయ |
సదైవ మాంధాతృపురే వసంతం
ఓంకారమీశం శివమేకమీడే || ౪ ||
పూర్వోత్తరే ప్రజ్వలికానిధానే
సదా వసంతం గిరిజాసమేతమ్ |
సురాసురారాధితపాదపద్మం
శ్రీవైద్యనాథం తమహం నమామి || ౫ ||
యామ్యే సదంగే నగరేఽతిరమ్యే
విభూషితాంగం వివిధైశ్చ భోగైః |
సద్భక్తిముక్తిప్రదమీశమేకం
శ్రీనాగనాథం శరణం ప్రపద్యే || ౬ ||
మహాద్రిపార్శ్వే చ తటే రమంతం
సంపూజ్యమానం సతతం మునీంద్రైః |
సురాసురైర్యక్షమహోరగాద్యైః
కేదారమీశం శివమేకమీడే || ౭ ||
సహ్యాద్రిశీర్షే విమలే వసంతం
గోదావరీతీరపవిత్రదేశే |
యద్దర్శనాత్పాతకమాశు నాశం
ప్రయాతి తం త్ర్యంబకమీశమీడే || ౮ ||
సుతామ్రపర్ణీజలరాశియోగే
నిబధ్య సేతుం విశిఖైరసంఖ్యైః |
శ్రీరామచంద్రేణ సమర్పితం తం
రామేశ్వరాఖ్యం నియతం నమామి || ౯ ||
యం డాకినీశాకినీకాసమాజే
నిషేవ్యమాణం పిశితాశనైశ్చ |
సదైవ భీమాదిపదప్రసిద్ధం
తం శంకరం భక్తహితం నమామి || ౧౦ ||
సానందమానందవనే వసంత-
-మానందకందం హతపాపబృందమ్ |
వారాణసీనాథమనాథనాథం
శ్రీవిశ్వనాథం శరణం ప్రపద్యే || ౧౧ ||
ఇలాపురే రమ్యవిశాలకేఽస్మిన్
సముల్లసంతం చ జగద్వరేణ్యమ్ |
వందే మహోదారతరస్వభావం
ఘృష్ణేశ్వరాఖ్యం శరణం ప్రపద్యే || ౧౨ ||
జ్యోతిర్మయద్వాదశలింగకానాం
శివాత్మనాం ప్రోక్తమిదం క్రమేణ |
స్తోత్రం పఠిత్వా మనుజోఽతిభక్త్యా
ఫలం తదాలోక్య నిజం భజేచ్చ || ౧౩ ||
ఇతి ద్వాదశ జ్యోతిర్లింగ స్తోత్రమ్ ||