౧. రుద్రయామలే
ఓంకారం బిందుసంయుక్తం నిత్యం ధ్యాయంతి యోగినః |
కామదం మోక్షదం చైవ ఓంకారాయ నమో నమః || ౧ ||
నమంతి ఋషయో దేవా నమంత్యప్సరసాం గణాః |
నరా నమంతి దేవేశం నకారాయ నమో నమః || ౨ ||
మహాదేవం మహాత్మానం మహాధ్యానపరాయణమ్ |
మహాపాపహరం దేవం మకారాయ నమో నమః || ౩ ||
శివం శాంతం జగన్నాథం లోకానుగ్రహకారకమ్ |
శివమేకపదం నిత్యం శికారాయ నమో నమః || ౪ ||
వాహనం వృషభో యస్య వాసుకిః కంఠభూషణమ్ |
వామే శక్తిధరం దేవం వకారాయ నమో నమః || ౫ ||
యత్ర యత్ర స్థితో దేవః సర్వవ్యాపీ మహేశ్వరః |
యో గురుః సర్వదేవానాం యకారాయ నమో నమః || ౬ ||
షడక్షరమిదం స్తోత్రం యః పఠేచ్ఛివసన్నిధౌ |
శివలోకమవాప్నోతి శివేన సహ మోదతే || ౭ ||
౨. శ్రీమచ్ఛంకరచార్యకృతం
ఓంకారం బిందుసంయుక్తం నిత్యం ధ్యాయంతి యోగినః |
కామదం మోక్షదం తస్మాదోంకారాయ నమో నమః || ౧ ||
ఓం నం,
నమంతి మునయస్సర్వే నమంత్యప్సరసాం గణాః |
నరాణామాదిదేవాయ నకారాయ నమో నమః || ౨ ||
ఓం మం,
మహత్తత్త్వం మహాదేవప్రియం జ్ఞానప్రదం పరమ్ |
మహాపాపహరం తస్మాన్మకారాయ నమో నమః || ౩ ||
ఓం శిం,
శివం శాంతం శివాకారం శివానుగ్రహకారణమ్ |
మహాపాపహరం తస్మాచ్ఛికారాయ నమో నమః || ౪ ||
ఓం వాం,
వాహనం వృషభో యస్య వాసుకిః కంఠభూషణమ్ |
వామే శక్తిధరం దేవం వకారాయ నమో నమః || ౫ ||
ఓం యం,
యకారే సంస్థితో దేవో యకారం పరమం శుభమ్ |
యం నిత్యం పరమానందం యకారాయ నమో నమః || ౬ ||
యః క్షీరాంబుధి మంథనోద్భవ మహాహాలాహలం భీకరం
దృష్ట్వా తత్రపలాయితాస్సురగణాన్నారాయణాదీన్తదా |
సంపీత్వా పరిపాలయజ్జగదిదం విశ్వాధికం శంకరం
సేవ్యో నస్సకలాపదాం పరిహరన్కైలాసవాసీ విభుః || ౭ ||
షడక్షరమిదం స్తోత్రం యః పఠేచ్ఛివసన్నిధౌ |
తస్య మృత్యుభయం నాస్తి హ్యపమృత్యుభయం కుతః || ౮ ||
యత్కృత్యం తన్నకృతం
యదకృత్యం కృత్యవత్తదాచరితమ్ |
ఉభయోః ప్రాయశ్చిత్తం
శివ తవ నామాక్షరద్వయోచ్చరితమ్ || ౯ ||
శివశివేతి శివేతి శివేతి వా
భవభవేతి భవేతి భవేతి వా |
హరహరేతి హరేతి హరేతి వా
భజమనశ్శివమేవ నిరంతరమ్ || ౧౦ ||
ఇతి శ్రీమచ్ఛంకరచార్యకృత శివషడక్షరీస్తోత్రం సంపూర్ణమ్ |