నమామి భక్తవత్సలం కృపాలు శీలకోమలం
భజామి తే పదాంబుజం హ్యకామినాం స్వధామదమ్ |
నికామశ్యామసుందరం భవాంబువార్ధిమందరం
ప్రఫుల్లకంజలోచనం మదాదిదోషమోచనమ్ || ౧ ||
ప్రలంబబాహువిక్రమం ప్రభోఽప్రమేయవైభవం
నిషంగచాపసాయకం ధరం త్రిలోకనాయకమ్ |
దినేశవంశమండనం మహేశచాపఖండనం
మునీంద్రచిత్తరంజనం సురారిబృందభంజనమ్ || ౨ ||
మనోజవైరివందితం హ్యజాదిదేవసేవితం
విశుద్ధబోధవిగ్రహం సమస్తదూషణాపహమ్ |
నమామి జానకీపతిం సుఖాకరం సతాం గతిం
భజే సశక్తిసానుజం శచీపతిప్రియానుజమ్ || ౩ ||
త్వదంఘ్రిసీమ యే నరా భజంతి హీనమత్సరాః
పతంతి నో భవార్ణవే వితర్కవీచిసంకులే |
వివిక్తవాసినః సదా భజంతి ముక్తయే ముదా
నిరస్య హీంద్రియాదికం ప్రయాంతి తే గతిం స్వకమ్ || ౪ ||
త్వమేకమద్భుతం ప్రభుం నిరీహమీశ్వరం విభుం
జగద్గురుం చ శాశ్వతం తురీయమేవ కేవలమ్ |
భజామి భావవల్లభం సుయోగినాం సుదుర్లభం
స్వభక్తకల్పపాదపం సమస్తసేవ్యమన్వహమ్ || ౫ ||
అనూపరూపభూపతిం నతోఽహముర్విజాపతిం
ప్రసీద మే నమామి తే పదాబ్జభక్తి దేహి మే |
పఠంతి యే స్తవం త్విదం సదాదరేణ తే పదం
వ్రజంతి నాత్ర సంశయం త్వదీయ భక్తిసంయుతాః || ౬ ||
ఇతి శ్రీరామచంద్ర స్తుతిః ||