నారాయణ ఉవాచ |
ఓం దుర్గేతి చతుర్థ్యంతః స్వాహాంతో మే శిరోఽవతు |
మంత్రః షడక్షరోఽయం చ భక్తానాం కల్పపాదపః || ౧ ||
విచారో నాస్తి వేదేషు గ్రహణేఽస్య మనోర్మునే |
మంత్రగ్రహణమాత్రేణ విష్ణుతుల్యో భవేన్నరః || ౨ ||
మమ వక్త్రం సదా పాతు ఓం దుర్గాయై నమోఽంతతః |
ఓం దుర్గే రక్షయతి చ కంఠం పాతు సదా మమ || ౩ ||
ఓం హ్రీం శ్రీమితి మంత్రోఽయం స్కంధం పాతు నిరంతరమ్ |
హ్రీం శ్రీం క్లీమితి పృష్ఠం చ పాతు మే సర్వతః సదా || ౪ ||
హ్రీం మే వక్షఃస్థలం పాతు హస్తం శ్రీమితి సంతతమ్ |
శ్రీం హ్రీం క్లీం పాతు సర్వాంగం స్వప్నే జాగరణే తథా || ౫ ||
ప్రాచ్యాం మాం ప్రకృతిః పాతుః పాతు వహ్నౌ చ చండికా |
దక్షిణే భద్రకాలీ చ నైరృత్యాం చ మహేశ్వరీ || ౬ ||
వారుణ్యాం పాతు వారాహీ వాయవ్యాం సర్వమంగలా |
ఉత్తరే వైష్ణవీ పాతు తథైశాన్యాం శివప్రియా || ౭ ||
జలే స్థలే చాంతరిక్షే పాతు మాం జగదంబికా |
ఇతి తే కథితం వత్స కవచం చ సుదుర్లభమ్ || ౮ ||
యస్మై కస్మై న దాతవ్యం ప్రవక్తవ్యం న కస్యచిత్ |
గురుమభ్యర్చ్య విధివద్వస్త్రాలంకారచందనైః |
కవచం ధారయేద్యస్తు సోఽపి విష్ణుర్న సంశయః || ౯ ||
ఇతి శ్రీబ్రహ్మవైవర్తే మహాపురాణే ప్రకృతిఖండే నారదనారాయణసంవాదే దుర్గోపాఖ్యానే సప్తషష్టితమోఽధ్యాయే బ్రహ్మాండమోహనం నామ శ్రీ దుర్గా కవచమ్ |