దుర్గాం శివాం శాంతికరీం బ్రహ్మాణీం బ్రహ్మణః ప్రియామ్ |
సర్వలోకప్రణేత్రీం చ ప్రణమామి సదాశివామ్ || ౧ ||
మంగళాం శోభనాం శుద్ధాం నిష్కళాం పరమాం కలామ్ |
విశ్వేశ్వరీం విశ్వమాతాం చండికాం ప్రణమామ్యహమ్ || ౨ ||
సర్వదేవమయీం దేవీం సర్వరోగభయాపహామ్ |
బ్రహ్మేశవిష్ణునమితాం ప్రణమామి సదా ఉమామ్ || ౩ ||
వింధ్యస్థాం వింధ్యనిలయాం దివ్యస్థాననివాసినీమ్ |
యోగినీం యోగమాతాం చ చండికాం ప్రణమామ్యహమ్ || ౪ ||
ఈశానమాతరం దేవీమీశ్వరీమీశ్వరప్రియామ్ |
ప్రణతోఽస్మి సదా దుర్గాం సంసారార్ణవతారిణీమ్ || ౫ ||
య ఇదం పఠతే స్తోత్రం శృణుయాద్వాపి యో నరః |
స ముక్తః సర్వపాపైస్తు మోదతే దుర్గయా సహ || ౬ ||
ఇతి శివరహస్యే శ్రీ దుర్గా స్తోత్రమ్ |