వందే సిందూరవర్ణాభం వామోరున్యస్తవల్లభమ్ |
ఇక్షువారిధిమధ్యస్థమిభరాజముఖం మహః || ౧ ||
గంభీరలహరీజాలగండూషితదిగంతరః |
అవ్యాన్మామమృతాంభోధిరనర్ఘమణిసంయుతః || ౨ ||
మధ్యే తస్య మనోహారి మధుపారవమేదురమ్ |
ప్రసూనవిగలన్మాధ్వీప్రవాహపరిపూరితమ్ || ౩ ||
కిన్నరీగానమేదస్వి క్రీడాకందరదంతురమ్ |
కాంచనద్రుమధూలీభిః కల్పితావాలవద్ద్రుమమ్ || ౪ ||
ముగ్ధకోకిలనిక్వాణముఖరీకృతదిఙ్ముఖమ్ |
మందారతరుసంతానమంజరీపుంజపింజరమ్ || ౫ ||
నాసానాడింధమస్మేరనమేరుసుమసౌరభమ్ |
ఆవృంతహసితాంభోజదీవ్యద్విభ్రమదీర్ఘికమ్ || ౬ ||
మందరక్తశుకీదష్టమాతులుంగఫలాన్వితమ్ |
సవిధస్యందమానాభ్రసరిత్కల్లోలవేల్లితమ్ || ౭ ||
ప్రసూనపాంసుసౌరభ్యపశ్యతోహరమారుతమ్ |
వకులప్రసవాకీర్ణం వందే నందనకాననమ్ || ౮ ||
తన్మధ్యే నీపకాంతారం తరణిస్తంభకారణమ్ |
మధుపాలివిమర్దాలికలక్వాణకరంబితమ్ || ౯ ||
కోమలశ్వశనాధూతకోరకోద్గతధూలిభిః |
సిందూరితనభోమార్గం చింతితం సిద్ధవందిభిః || ౧౦ ||
మధ్యే తస్య మరున్మార్గలంబిమాణిక్యతోరణమ్ |
శాణోల్లిఖితవైదూర్యక్లుప్తసాలసమాకులమ్ || ౧౧ ||
మాణిక్యస్తంభపటలీమయూఖవ్యాప్తదిక్తటమ్ |
పంచవింశతిసాలాఢ్యాం నమామి నగరోత్తమమ్ || ౧౨ ||
తత్ర చింతామణిగృహం తడిత్కోటిసముజ్జ్వలమ్ |
నీలోత్పలసమాకీర్ణనిర్యూహశతసంకులమ్ || ౧౩ ||
సోమకాంతమణిక్లుప్తసోపానోద్భాసివేదికమ్ |
చంద్రశాలాచరత్కేతుసమాలీఢనభోంతరమ్ || ౧౪ ||
గారుత్మతమణీక్లుప్తమండపవ్యూహమండితమ్ |
నిత్యసేవాపరామర్త్యనిబిడద్వారశోభితమ్ || ౧౫ ||
అధిష్ఠితం ద్వారపాలైరసితోమరపాణిభిః |
నమామి నాకనారీణాం సాంద్రసంగీతమేదురమ్ || ౧౬ ||
తన్మధ్యే తరుణార్కాభం తప్తకాంచననిర్మితమ్ |
శక్రాదిమద్ద్వారపాలైః సంతతం పరివేష్టితమ్ || ౧౭ ||
చతుష్షష్టిమహావిద్యాకలాభిరభిసంవృతమ్ |
రక్షితం యోగినీబృందై రత్నసింహాసనం భజే || ౧౮ ||
మధ్యే తస్య మరుత్సేవ్యం చతుర్ద్వారసముజ్జ్వలమ్ |
చతురస్రత్రిరేఖాఢ్యాం చారుత్రివలయాన్వితమ్ || ౧౯ ||
కలాదలసమాయుక్తం కనదష్టదలాన్వితమ్ |
చతుర్దశారసహితం దశారద్వితయాన్వితమ్ || ౨౦ ||
అష్టకోణయుతం దివ్యమగ్నికోణవిరాజితమ్ |
యోగిభిః పూజితం యోగియోగినీగణసేవితమ్ || ౨౧ ||
సర్వదుఃఖప్రశమనం సర్వవ్యాధివినాశనమ్ |
విషజ్వరహరం పుణ్యం వివిధాపద్విదారణమ్ || ౨౨ ||
సర్వదారిద్ర్యశమనం సర్వభూపాలమోహనమ్ |
ఆశాభిపూరకం దివ్యమర్చకానామహర్నిశమ్ || ౨౩ ||
అష్టాదశసుమర్మాఢ్యం చతుర్వింశతిసంధినమ్ |
శ్రీమద్బిందుగృహోపేతం శ్రీచక్రం ప్రణమామ్యహమ్ || ౨౪ ||
తత్రైవ బైందవస్థానే తరుణాదిత్యసన్నిభమ్ |
పాశాంకుశధనుర్బాణపరిష్కృతకరాంబుజమ్ || ౨౫ ||
పూర్ణేందుబింబవదనం ఫుల్లపంకజలోచనమ్ |
కుసుమాయుధశృంగారకోదండకుటిలభ్రువమ్ || ౨౬ ||
చారుచంద్రకలోపేతం చందనాగురురూషితమ్ |
మందస్మితమధూకాలికింజల్కితముఖాంబుజమ్ || ౨౭ ||
పాటీరతిలకోద్భాసిఫాలస్థలమనోహరమ్ |
అనేకకోటికందర్పలావణ్యమరుణాధరమ్ || ౨౮ ||
తపనీయాంశుకధరం తారుణ్యశ్రీనిషేవితమ్ |
కామేశ్వరమహం వందే కామితార్థప్రదం నృణామ్ || ౨౯ ||
తస్యాంకమధ్యమాసీనాం తప్తహాటకసన్నిభామ్ |
మాణిక్యముకుటచ్ఛాయామండలారుణదిఙ్ముఖామ్ || ౩౦ ||
కలవేణీకనత్ఫుల్లకహ్లారకుసుమోజ్జ్వలామ్ |
ఉడురాజకృతోత్తంసాముత్పలశ్యామలాలకామ్ || ౩౧ ||
చతుర్థీచంద్రసచ్ఛాత్రఫాలరేఖాపరిష్కృతామ్ |
కస్తూరీతిలకారూఢకమనీయలలంతికామ్ || ౩౨ ||
భ్రూలతాశ్రీపరాభూతపుష్పాయుధశరాసనామ్ |
నాలీకదలదాయాదనయనత్రయశోభితామ్ || ౩౩ ||
కరుణారససంపూర్ణకటాక్షహసితోజ్జ్వలామ్ |
భవ్యముక్తామణిచారునాసామౌక్తికవేష్టితామ్ || ౩౪ ||
కపోలయుగలీనృత్యకర్ణతాటంకశోభితామ్ |
మాణిక్యవాలీయుగలీమయూఖారుణదిఙ్ముఖామ్ || ౩౫ ||
పరిపక్వసుబింబాభాపాటలాధరపల్లవామ్ |
మంజులాధరపర్వస్థమందస్మితమనోహరామ్ || ౩౬ ||
ద్విఖండద్విజరాజాభగండద్వితయమండితామ్ |
దరఫుల్లలసద్గండధవలాపూరితాననామ్ || ౩౭ ||
పచేలిమేందుసుషమాపాటచ్చరముఖప్రభామ్ |
కంధరాకాంతిహసితకంబుబింబోకడంబరామ్ || ౩౮ ||
కస్తూరీకర్దమాశ్యామకంధరామూలకందరామ్ |
వామాంసశిఖరోపాంతవ్యాలంబిఘనవేణికామ్ || ౩౯ ||
మృణాలకాండదాయాదమృదుబాహుచతుష్టయామ్ |
మణికేయూరయుగలీమయూఖారుణవిగ్రహామ్ || ౪౦ ||
కరమూలలసద్రత్నకంకణక్వాణపేశలామ్ |
కరకాంతిసమాధూతకల్పానోకహపల్లవామ్ || ౪౧ ||
పద్మరాగోర్మికాశ్రేణిభాసురాంగులిపాలికామ్ |
పుండ్రకోదండపుష్పాస్త్రపాశాంకుశలసత్కరామ్ || ౪౨ ||
తప్తకాంచనకుంభాభస్తనమండలమండితామ్ |
ఘనస్తనతటీక్లుప్తకాశ్మీరక్షోదపాటలామ్ || ౪౩ ||
కూలంకషకుచస్ఫారతారహారవిరాజితామ్ |
చారుకౌసుంభకూర్పాసచ్ఛన్నవక్షోజమండలామ్ || ౪౪ ||
నవనీలఘనశ్యామరోమరాజివిరాజితామ్ |
లావణ్యసాగరావర్తనిభనాభివిభూషితామ్ || ౪౫ ||
డింభముష్టితలగ్రాహ్యమధ్యయష్టిమనోహరామ్ |
నితంబమండలాభోగనిక్వణన్మణిమేఖలామ్ || ౪౬ ||
సంధ్యారుణక్షౌమపటీసంఛన్నజఘనస్థలామ్ |
ఘనోరుకాంతిహసితకదలీకాండవిభ్రమామ్ || ౪౭ ||
జానుసంపుటకద్వంద్వజితమాణిక్యదర్పణామ్ |
జంఘాయుగలసౌందర్యవిజితానంగకాహలామ్ || ౪౮ ||
ప్రపదచ్ఛాయసంతానజితప్రాచీనకచ్ఛపామ్ |
నీరజాసనకోటీరనిఘృష్టచరణాంబుజామ్ || ౪౯ ||
పాదశోభాపరాభూతపాకారితరుపల్లవామ్ |
చరణాంభోజశింజానమణిమంజీరమంజులామ్ || ౫౦ ||
విబుధేంద్రవధూత్సంగవిన్యస్తపదపల్లవామ్ |
పార్శ్వస్థభారతీలక్ష్మీపాణిచామరవీజితామ్ || ౫౧ ||
పురతో నాకనారీణాం పశ్యంతీం నృత్తమద్భుతమ్ |
భ్రూలతాంచలసంభూతపుష్పాయుధపరంపరామ్ || ౫౨ ||
ప్రత్యగ్రయౌవనోన్మత్తపరిఫుల్లవిలోచనామ్ |
తామ్రోష్ఠీం తరలాపాంగీం సునాసాం సుందరస్మితామ్ || ౫౩ ||
చతురర్థధ్రువోదారాం చాంపేయోద్గంధికుంతలామ్ |
మధుస్నపితమృద్వీకమధురాలాపపేశలామ్ || ౫౪ ||
శివాం షోడశవార్షీకాం శివాంకతలవాసినీమ్ |
చిన్మయీం హృదయాంభోజే చింతయేజ్జాపకోత్తమః || ౫౫ ||
ఇతి త్రిపురసుందర్యా హృదయం సర్వకామదమ్ |
సర్వదారిద్ర్యశమనం సర్వసంపత్ప్రదం నృణామ్ || ౫౬ ||
తాపజ్వరార్తిశమనం తరుణీజనమోహనమ్ |
మహావిషహరం పుణ్యం మాంగల్యకరమద్భుతమ్ || ౫౭ ||
అపమృత్యుహరం దివ్యమాయుష్యశ్రీకరం పరమ్ |
అపవర్గైకనిలయమవనీపాలవశ్యదమ్ || ౫౮ ||
పఠతి ధ్యానరత్నం యః ప్రాతః సాయమతంద్రితః |
న విషాదైః స చ పుమాన్ ప్రాప్నోతి భువనత్రయమ్ || ౫౯ ||
ఇతి శ్రీమహాత్రిపురసుందరీహృదయం సంపూర్ణమ్ |