నారద ఉవాచ |
కవచం శ్రోతుమిచ్ఛామి తాం చ విద్యాం దశాక్షరీమ్ |
నాథ త్వత్తో హి సర్వజ్ఞ భద్రకాళ్యాశ్చ సాంప్రతమ్ || ౧ ||
నారాయణ ఉవాచ |
శృణు నారద వక్ష్యామి మహావిద్యాం దశాక్షరీమ్ |
గోపనీయం చ కవచం త్రిషు లోకేషు దుర్లభమ్ || ౨ ||
ఓం హ్రీం శ్రీం క్లీం కాళికాయై స్వాహేతి చ దశాక్షరీమ్ |
దుర్వాసా హి దదౌ రాజ్ఞే పుష్కరే సూర్యపర్వణి || ౩ ||
దశలక్షజపేనైవ మంత్రసిద్ధిః కృతా పురా |
పంచలక్షజపేనైవ పఠన్ కవచముత్తమమ్ || ౪ ||
బభూవ సిద్ధకవచోఽప్యయోధ్యామాజగామ సః |
కృత్స్నాం హి పృథివీం జిగ్యే కవచస్య ప్రసాదతః || ౫ ||
నారద ఉవాచ |
శ్రుతా దశాక్షరీ విద్యా త్రిషు లోకేషు దుర్లభా |
అధునా శ్రోతుమిచ్ఛామి కవచం బ్రూహి మే ప్రభో || ౬ ||
నారాయణ ఉవాచ |
శృణు వక్ష్యామి విప్రేంద్ర కవచం పరమాద్భుతమ్ |
నారాయణేన యద్దత్తం కృపయా శూలినే పురా || ౭ ||
త్రిపురస్య వధే ఘోరే శివస్య విజయాయ చ |
తదేవ శూలినా దత్తం పురా దుర్వాససే మునే || ౮ ||
దుర్వాససా చ యద్దత్తం సుచంద్రాయ మహాత్మనే |
అతిగుహ్యతరం తత్త్వం సర్వమంత్రౌఘవిగ్రహమ్ || ౯ ||
అథ కవచమ్ |
ఓం హ్రీం శ్రీం క్లీం కాళికాయై స్వాహా మే పాతు మస్తకమ్ |
క్లీం కపాలం సదా పాతు హ్రీం హ్రీం హ్రీమితి లోచనే || ౧౦ ||
ఓం హ్రీం త్రిలోచనే స్వాహా నాసికాం మే సదావతు |
క్లీం కాళికే రక్ష రక్ష స్వాహా దంతం సదావతు || ౧౧ ||
హ్రీం భద్రకాళికే స్వాహా పాతు మేఽధరయుగ్మకమ్ |
ఓం హ్రీం హ్రీం క్లీం కాళికాయై స్వాహా కంఠం సదావతు || ౧౨ ||
ఓం హ్రీం కాళికాయై స్వాహా కర్ణయుగ్మం సదావతు |
ఓం క్రీం క్రీం క్లీం కాళ్యై స్వాహా స్కంధం పాతు సదా మమ || ౧౩ ||
ఓం క్రీం భద్రకాళ్యై స్వాహా మమ వక్షః సదావతు |
ఓం క్రీం కాళికాయై స్వాహా మమ నాభిం సదావతు || ౧౪ ||
ఓం హ్రీం కాళికాయై స్వాహా మమ పృష్ఠం సదావతు |
రక్తబీజవినాశిన్యై స్వాహా హస్తౌ సదావతు || ౧౫ ||
ఓం హ్రీం క్లీం ముండమాలిన్యై స్వాహా పాదౌ సదావతు |
ఓం హ్రీం చాముండాయై స్వాహా సర్వాంగం మే సదావతు || ౧౬ ||
ప్రాచ్యాం పాతు మహాకాళీ ఆగ్నేయ్యాం రక్తదంతికా |
దక్షిణే పాతు చాముండా నైరృత్యాం పాతు కాళికా || ౧౭ ||
శ్యామా చ వారుణే పాతు వాయవ్యాం పాతు చండికా |
ఉత్తరే వికటాస్యా చ ఐశాన్యాం సాట్టహాసినీ || ౧౮ ||
ఊర్ధ్వం పాతు లోలజిహ్వా మాయాద్యా పాత్వధః సదా |
జలే స్థలే చాంతరిక్షే పాతు విశ్వప్రసూః సదా || ౧౯ ||
ఫలశ్రుతిః |
ఇతి తే కథితం వత్స సర్వమంత్రౌఘవిగ్రహమ్ |
సర్వేషాం కవచానాం చ సారభూతం పరాత్పరమ్ || ౨౦ ||
సప్తద్వీపేశ్వరో రాజా సుచంద్రోఽస్య ప్రసాదతః |
కవచస్య ప్రసాదేన మాంధాతా పృథివీపతిః || ౨౧ ||
ప్రచేతా లోమశశ్చైవ యతః సిద్ధో బభూవ హ |
యతో హి యోగినాం శ్రేష్ఠః సౌభరిః పిప్పలాయనః || ౨౨ ||
యది స్యాత్ సిద్ధకవచః సర్వసిద్ధీశ్వరో భవేత్ |
మహాదానాని సర్వాణి తపాంసి చ వ్రతాని చ |
నిశ్చితం కవచస్యాస్య కలాం నార్హంతి షోడశీమ్ || ౨౩ ||
ఇదం కవచమజ్ఞాత్వా భజేత్ కళీం జగత్ప్రసూమ్ |
శతలక్షప్రజప్తోఽపి న మంత్రః సిద్ధిదాయకః || ౨౪ ||
ఇతి శ్రీ భద్రకాళీ కవచమ్ |