అస్య శ్రీబృహస్పతి కవచస్తోత్రమంత్రస్య ఈశ్వర ఋషిః, అనుష్టుప్ ఛందః, బృహస్పతిర్దేవతా, గం బీజం, శ్రీం శక్తిః, క్లీం కీలకం, బృహస్పతి పీడాప్రశమనార్థే బృహస్పతి ప్రసాదసిద్ధ్యర్థే జపే వినియోగః |
కరన్యాసః –
గాం అంగుష్ఠాభ్యాం నమః |
గీం తర్జనీభ్యాం నమః |
గూం మధ్యమాభ్యాం నమః |
గైం అనామికాభ్యాం నమః |
గౌం కనిష్ఠికాభ్యాం నమః |
గః కరతలకరపృష్ఠాభ్యాం నమః |
అంగన్యాసః –
గాం హృదయాయ నమః |
గీం శిరసే స్వాహా |
గూం శిఖాయై వషట్ |
గైం కవచాయ హుమ్ |
గౌం నేత్రత్రయాయ వౌషట్ |
గః అస్త్రాయ ఫట్ |
ధ్యానమ్ –
అభీష్టఫలదం దేవం సర్వజ్ఞం సురపూజితమ్ |
అక్షమాలాధరం శాంతం ప్రణమామి బృహస్పతిమ్ || ౧ ||
అథ కవచమ్ –
బృహస్పతిః శిరః పాతు లలాటం పాతు మే గురుః |
కర్ణౌ సురగురుః పాతు నేత్రే మేఽభీష్టదాయకః || ౨ ||
జిహ్వాం పాతు సురాచార్యో నాసాం మే వేదపారగః |
ముఖం మే పాతు సర్వజ్ఞో కంఠం మే దేవతాగురుః || ౩ ||
భుజావాంగిరసః పాతు కరౌ పాతు శుభప్రదః |
స్తనౌ మే పాతు వాగీశః కుక్షిం మే శుభలక్షణః || ౪ ||
నాభిం దేవగురుః పాతు మధ్యం పాతు సుఖప్రదః |
కటిం పాతు జగద్వంద్య ఊరూ మే పాతు వాక్పతిః || ౫ ||
జానుజంఘే సురాచార్యో పాదౌ విశ్వాత్మకస్తథా |
అన్యాని యాని చాంగాని రక్షేన్మే సర్వతో గురుః || ౬ ||
ఇత్యేతత్కవచం దివ్యం త్రిసంధ్యం యః పఠేన్నరః |
సర్వాన్ కామానవాప్నోతి సర్వత్ర విజయీ భవేత్ || ౭ ||
ఇతి శ్రీబ్రహ్మయామలోక్తం శ్రీ బృహస్పతి కవచమ్ |