అగస్త్య ఉవాచ |
అశ్వానన మహాబుద్ధే సర్వశాస్త్రవిశారద |
కథితం లలితాదేవ్యాశ్చరితం పరమాద్భుతమ్ || ౧ ||
పూర్వం ప్రాదుర్భవో మాతుస్తతః పట్టాభిషేచనమ్ |
భండాసురవధశ్చైవ విస్తరేణ త్వయోదితః || ౨ ||
వర్ణితం శ్రీపురం చాపి మహావిభవవిస్తరమ్ |
శ్రీమత్పంచదశాక్షర్యాః మహిమా వర్ణితస్తథా || ౩ ||
షోఢాన్యాసాదయో న్యాసాః న్యాసఖండే సమీరితాః |
అంతర్యాగక్రమశ్చైవ బహిర్యాగక్రమస్తథా || ౪ ||
మహాయాగక్రమశ్చైవ పూజాఖండే ప్రకీర్తితాః | [సమీరితః]
పురశ్చరణఖండే తు జపలక్షణమీరితమ్ || ౫ ||
హోమఖండే త్వయా ప్రోక్తో హోమద్రవ్యవిధిక్రమః |
చక్రరాజస్య విద్యాయాః శ్రీదేవ్యా దేశికాత్మనోః || ౬ ||
రహస్యఖండే తాదాత్మ్యం పరస్పరముదీరితమ్ |
స్తోత్రఖండే బహువిధాః స్తుతయః పరికీర్తితాః || ౭ ||
మంత్రిణీదండినీదేవ్యోః ప్రోక్తే నామసహస్రకే |
న తు శ్రీలలితాదేవ్యాః ప్రోక్తం నామసహస్రకమ్ || ౮ ||
తత్ర మే సంశయో జాతో హయగ్రీవ దయానిధే |
కిం వా త్వయా విస్మృతం తజ్జ్ఞాత్వా వా సముపేక్షితమ్ || ౯ ||
మమ వా యోగ్యతా నాస్తి శ్రోతుం నామసహస్రకమ్ |
కిమర్థం భవతా నోక్తం తత్ర మే కారణం వద || ౧౦ ||
సూత ఉవాచ |
ఇతి పృష్టో హయగ్రీవో మునినా కుంభజన్మనా |
ప్రహృష్టో వచనం ప్రాహ తాపసం కుంభసంభవమ్ || ౧౧ ||
శ్రీహయగ్రీవ ఉవాచ |
లోపాముద్రాపతేఽగస్త్య సావధానమనాః శృణు |
నామ్నాం సహస్రం యన్నోక్తం కారణం తద్వదామి తే || ౧౨ ||
రహస్యమితి మత్వాహం నోక్తవాంస్తే న చాన్యథా |
పునశ్చ పృచ్ఛతే భక్త్యా తస్మాత్తత్తే వదామ్యహమ్ || ౧౩ ||
బ్రూయాచ్ఛిష్యాయ భక్తాయ రహస్యమపి దేశికః |
భవతా న ప్రదేయం స్యాదభక్తాయ కదాచన || ౧౪ ||
న శఠాయ న దుష్టాయ నావిశ్వాసాయ కర్హిచిత్ |
శ్రీమాతృభక్తియుక్తాయ శ్రీవిద్యారాజవేదినే || ౧౫ ||
ఉపాసకాయ శుద్ధాయ దేయం నామసహస్రకమ్ |
యాని నామసహస్రాణి సద్యః సిద్ధిప్రదాని వై || ౧౬ ||
తంత్రేషు లలితాదేవ్యాస్తేషు ముఖ్యమిదం మునే |
శ్రీవిద్యైవ తు మంత్రాణాం తత్ర కాదిర్యథా పరా || ౧౭ ||
పురాణాం శ్రీపురమివ శక్తీనాం లలితా తథా |
శ్రీవిద్యోపాసకానాం చ యథా దేవో పరః శివః || ౧౮ ||
తథా నామసహస్రేషు పరమేతత్ప్రకీర్తితమ్ |
యథాస్య పఠనాద్దేవీ ప్రీయతే లలితాంబికా || ౧౯ ||
అన్యనామసహస్రస్య పాఠాన్న ప్రీయతే తథా |
శ్రీమాతుః ప్రీతయే తస్మాదనిశం కీర్తయేదిదమ్ || ౨౦ ||
బిల్వపత్రైశ్చక్రరాజే యోఽర్చయేల్లలితాంబికామ్ |
పద్మైర్వా తులసీపుష్పైరేభిర్నామసహస్రకైః || ౨౧ || [పత్రైః]
సద్యః ప్రసాదం కురుతే తస్య సింహాసనేశ్వరీ |
చక్రాధిరాజమభ్యర్చ్య జప్త్వా పంచదశాక్షరీమ్ || ౨౨ ||
జపాంతే కీర్తయేన్నిత్యమిదం నామసహస్రకమ్ |
జపపూజాద్యశక్తశ్చేత్పఠేన్నామసహస్రకమ్ || ౨౩ ||
సాంగార్చనే సాంగజపే యత్ఫలం తదవాప్నుయాత్ |
ఉపాసనే స్తుతీరన్యాః పఠేదభ్యుదయో హి సః || ౨౪ ||
ఇదం నామసహస్రం తు కీర్తయేన్నిత్యకర్మవత్ |
చక్రరాజార్చనం దేవ్యా జపో నామ్నాం చ కీర్తనమ్ || ౨౫ ||
భక్తస్య కృత్యమేతావదన్యదభ్యుదయం విదుః |
భక్తస్యావశ్యకమిదం నామసాహస్రకీర్తనమ్ || ౨౬ ||
తత్ర హేతుం ప్రవక్ష్యామి శృణు త్వం కుంభసంభవ |
పురా శ్రీలలితాదేవీ భక్తానాం హితకామ్యయా || ౨౭ ||
వాగ్దేవీర్వశినీముఖ్యాః సమాహూయేదమబ్రవీత్ |
వాగ్దేవతా వశిన్యాద్యాః శృణుధ్వం వచనం మమ || ౨౮ ||
భవత్యో మత్ప్రసాదేన ప్రోల్లసద్వాగ్విభూతయః |
మద్భక్తానాం వాగ్విభూతిప్రదానే వినియోజితాః || ౨౯ ||
మచ్చక్రస్య రహస్యజ్ఞా మమ నామపరాయణాః |
మమ స్తోత్రవిధానాయ తస్మాదాజ్ఞాపయామి వః || ౩౦ ||
కురుధ్వమంకితం స్తోత్రం మమ నామసహస్రకైః |
యేన భక్తైః స్తుతాయా మే సద్యః ప్రీతిః పరా భవేత్ || ౩౧ ||
ఇత్యాజ్ఞప్తాస్తతో దేవ్యః శ్రీదేవ్యా లలితాంబయా |
రహస్యైర్నామభిర్దివ్యైశ్చక్రుః స్తోత్రమనుత్తమమ్ || ౩౨ ||
రహస్యనామసాహస్రమితి తద్విశ్రుతం పరమ్ |
తతః కదాచిత్సదసి స్థిత్వా సింహాసనేఽంబికా || ౩౩ ||
స్వసేవావసరం ప్రాదాత్సర్వేషాం కుంభసంభవ |
సేవార్థమాగతాస్తత్ర బ్రహ్మాణీబ్రహ్మకోటయః || ౩౪ ||
లక్ష్మీనారాయణానాం చ కోటయః సముపాగతాః |
గౌరీకోటిసమేతానాం రుద్రాణామపి కోటయః || ౩౫ ||
మంత్రిణీదండినీముఖ్యాః సేవార్థం యః సమాగతాః |
శక్తయో వివిధాకారాస్తాసాం సంఖ్యా న విద్యతే || ౩౬ ||
దివ్యౌఘా మానవౌఘాశ్చ సిద్ధౌఘాశ్చ సమాగతాః |
తత్ర శ్రీలలితాదేవీ సర్వేషాం దర్శనం దదౌ || ౩౭ ||
తేషు దృష్ట్వోపవిష్టేషు స్వే స్వే స్థానే యథాక్రమమ్ |
తత్ర శ్రీలలితాదేవీకటాక్షాక్షేపచోదితాః || ౩౮ ||
ఉత్థాయ వశినీముఖ్యా బద్ధాంజలిపుటాస్తదా |
అస్తువన్నామసాహస్రైః స్వకృతైర్లలితాంబికామ్ || ౩౯ ||
శ్రుత్వా స్తవం ప్రసన్నాభూల్లలితా పరమేశ్వరీ |
తే సర్వే విస్మయం జగ్ముర్యే తత్ర సదసి స్థితాః || ౪౦ ||
తతః ప్రోవాచ లలితా సదస్యాన్ దేవతాగణాన్ |
దేవ్యువాచ |
మమాజ్ఞయైవ వాగ్దేవ్యశ్చక్రుః స్తోత్రమనుత్తమమ్ || ౪౧ ||
అంకితం నామభిర్దివ్యైర్మమ ప్రీతివిధాయకైః |
తత్పఠధ్వం సదా యూయం స్తోత్రం మత్ప్రీతివృద్ధయే || ౪౨ ||
ప్రవర్తయధ్వం భక్తేషు మమ నామసాహస్రకమ్ |
ఇదం నామసహస్రం మే యో భక్తః పఠతే సకృత్ || ౪౩ ||
స మే ప్రియతమో జ్ఞేయస్తస్మై కామాన్ దదామ్యహమ్ |
శ్రీచక్రే మాం సమభ్యర్చ్య జప్త్వా పంచదశాక్షరీమ్ || ౪౪ ||
పశ్చాన్నామసహస్రం మే కీర్తయేన్మమ తుష్టయే |
మామర్చయతు వా మా వా విద్యాం జపతు వా న వా || ౪౫ ||
కీర్తయేన్నామసాహస్రమిదం మత్ప్రీతయే సదా |
మత్ప్రీత్యా సకలాన్కామాంల్లభతే నాత్ర సంశయః || ౪౬ ||
తస్మాన్నామసహస్రం మే కీర్తయధ్వం సదాదరాత్ |
శ్రీహయగ్రీవ ఉవాచ |
ఇతి శ్రీలలితేశానీ శాస్తి దేవాన్ సహానుగాన్ || ౪౭ ||
తదాజ్ఞయా తదారభ్య బ్రహ్మవిష్ణుమహేశ్వరాః |
శక్తయో మంత్రిణీముఖ్యా ఇదం నామసహస్రకమ్ || ౪౮ ||
పఠంతి భక్త్యా సతతం లలితాపరితుష్టయే |
తస్మాదవశ్యం భక్తేన కీర్తనీయమిదం మునే || ౪౯ ||
ఆవశ్యకత్వే హేతుస్తే మయా ప్రోక్తో మునీశ్వర |
ఇదానీం నామసాహస్రం వక్ష్యామి శ్రద్ధయా శృణు || ౫౦ ||
ఇతి శ్రీబ్రహ్మాండపురాణే హయగ్రీవాగస్త్యసంవాదే లలితాసహస్రనామపూర్వభాగో నామ ప్రథమోఽధ్యాయః ||