దేవ్యువాచ |
భగవన్ సర్వధర్మజ్ఞ సర్వశాస్త్రార్థపారగ |
దేవ్యాః ప్రత్యంగిరాయాశ్చ కవచం యత్ప్రకాశితమ్ || ౧ ||
సర్వార్థసాధనం నామ కథయస్వ మయి ప్రభో |
భైరవ ఉవాచ |
శృణు దేవి ప్రవక్ష్యామి కవచం పరమాద్భుతమ్ || ౨ ||
సర్వార్థసాధనం నామ త్రైలోక్యే చాఽతిదుర్లభమ్ |
సర్వసిద్ధిమయం దేవి సర్వైశ్వర్యప్రదాయకమ్ || ౩ ||
పఠనాచ్ఛ్రవణాన్మర్త్యస్త్రైలోక్యైశ్వర్యభాగ్భవేత్ |
సర్వార్థసాధకస్యాఽస్య కవచస్య ఋషిః శివః || ౪ ||
ఛందో విరాట్ పరాశక్తిర్జగద్ధాత్రీ చ దేవతా |
ధర్మాఽర్థకామమోక్షేషు వినియోగః ప్రకీర్తితః || ౫ ||
న్యాసః –
శ్రీసర్వార్థసాధకకవచస్య శివ ఋషయే నమః శిరసి |
విరాట్ ఛందసే నమః ముఖే |
శ్రీమత్ప్రత్యంగిరా దేవతాయై నమః హృదయే |
ఐం బీజాయ నమః గుహ్యే |
హ్రీం శక్తయే నమః పాదౌ |
శ్రీం కీలకాయ నమః నాభౌ |
ధర్మార్థకామమోక్షేషు వినియోగాయ నమః సర్వాంగే ||
కవచమ్ –
ప్రణవం మే శిరః పాతు వాగ్భవం చ లలాటకమ్ |
హ్రీం పాతు దక్షనేత్రం మే లక్ష్మీర్వామ సురేశ్వరీ || ౬ ||
ప్రత్యంగిరా దక్షకర్ణం వామే కామేశ్వరీ తథా |
లక్ష్మీః ప్రాణం సదా పాతు వదనం పాతు కేశవః || ౭ ||
గౌరీ తు రసనాం పాతు కంఠం పాతు మహేశ్వరః |
స్కంధదేశం రతిః పాతు భుజౌ తు మకరధ్వజః || ౮ ||
శంఖనిధిః కరౌ పాతు వక్షః పద్మనిధిస్తథా |
బ్రాహ్మీ మధ్యం సదా పాతు నాభిం పాతు మహేశ్వరీ || ౯ ||
కౌమారీ పృష్ఠదేశం తు గుహ్యం రక్షతు వైష్ణవీ |
వారాహీ చ కటిం పాతు చైంద్రీ పాతు పదద్వయమ్ || ౧౦ ||
భార్యాం రక్షతు చాముండా లక్ష్మీ రక్షతు పుత్రకాన్ |
ఇంద్రః పూర్వే సదా పాతు ఆగ్నేయ్యామగ్నిదేవతా || ౧౧ ||
యామ్యే యమః సదా పాతు నైరృత్యాం నిరృతిస్తథా |
పశ్చిమే వరుణః పాతు వాయవ్యాం వాయుదేవతా || ౧౨ ||
సౌమ్యాం సోమః సదా పాతు చైశాన్యామీశ్వరో విభుః |
ఊర్ధ్వం ప్రజాపతిః పాతు హ్యధశ్చాఽనంతదేవతా || ౧౩ ||
రాజద్వారే శ్మశానే తు అరణ్యే ప్రాంతరే తథా |
జలే స్థలే చాఽంతరిక్షే శత్రూణాం నివహే తథా || ౧౪ ||
ఏతాభిః సహితా దేవీ చతుర్బీజా మహేశ్వరీ |
ప్రత్యంగిరా మహాశక్తిః సర్వత్ర మాం సదాఽవతు || ౧౫ ||
ఫలశ్రుతిః –
ఇతి తే కథితం దేవి సారాత్సారం పరాత్పరమ్ |
సర్వార్థసాధనం నామ కవచం పరమాద్భుతమ్ || ౧౬ ||
అస్యాఽపి పఠనాత్సద్యః కుబేరోఽపి ధనేశ్వరః |
ఇంద్రాద్యాః సకలా దేవాః ధారణాత్పఠనాద్యతః || ౧౭ ||
సర్వసిద్ధీశ్వరాః సంతః సర్వైశ్వర్యమవాప్నుయుః |
పుష్పాంజల్యష్టకం దత్త్వా మూలేనైవ సకృత్పఠేత్ || ౧౮ ||
సంవత్సరకృతాయాస్తు పూజాయాః ఫలమాప్నుయాత్ |
ప్రీతిమన్యేఽన్యతః కృత్వా కమలా నిశ్చలా గృహే || ౧౯ ||
వాణీ చ నివసేద్వక్త్రే సత్యం సత్యం న సంశయః |
యో ధారయతి పుణ్యాత్మా సర్వార్థసాధనాభిధమ్ || ౨౦ ||
కవచం పరమం పుణ్యం సోఽపి పుణ్యవతాం వరః |
సర్వైశ్వర్యయుతో భూత్వా త్రైలోక్యవిజయీ భవేత్ || ౨౧ ||
పురుషో దక్షిణే బాహౌ నారీ వామభుజే తథా |
బహుపుత్రవతీ భూయాద్వంధ్యాఽపి లభతే సుతమ్ || ౨౨ ||
బ్రహ్మాస్త్రాదీని శస్త్రాణి నైవ కృంతంతి తత్తనుమ్ |
ఏతత్కవచమజ్ఞాత్వా యో జపేత్పరమేశ్వరీమ్ |
దారిద్ర్యం పరమం ప్రాప్య సోఽచిరాన్మృత్యుమాప్నుయాత్ || ౨౩ ||
ఇతి శ్రీరుద్రయామలతంత్రే పంచాంగఖండే సర్వార్థసాధనం నామ శ్రీ ప్రత్యంగిరా కవచమ్ |