అస్య శ్రీరాహు కవచస్తోత్రస్య చంద్రమా ఋషిః, అనుష్టుప్ ఛందః, రాహుర్దేవతా, రాం బీజం, నమః శక్తిః, స్వాహా కీలకం, రాహు ప్రీత్యర్థే జపే వినియోగః |
ధ్యానమ్ –
రాహుం చతుర్భుజం చర్మశూలఖడ్గవరాంగినం
కృష్ణాంబరధరం నీలం కృష్ణగంధానులేపనమ్ |
గోమేధికవిభూషం చ విచిత్రమకుటం ఫణిం
కృష్ణసింహరథారూఢం మేరుం చైవాప్రదక్షిణమ్ ||
ప్రణమామి సదా రాహుం శూర్పాకారం కిరీటినమ్ |
సైంహికేయం కరాళాస్యం భక్తానామభయప్రదమ్ || ౧ ||
అథ కవచమ్ –
నీలాంబరః శిరః పాతు లలాటం లోకవందితః |
చక్షుషీ పాతు మే రాహుః శ్రోత్రే త్వర్ధశరీరవాన్ || ౨ ||
నాసికాం మే ధూమ్రవర్ణః శూలపాణిర్ముఖం మమ | [కరాళాస్యః]
జిహ్వాం మే సింహికాసూనుః కంఠం మే కఠినాంఘ్రికః || ౩ || [కష్టనాశనః]
భుజంగేశో భుజౌ పాతు నీలమాల్యాంబరః కరౌ |
పాతు వక్షఃస్థలం మంత్రీ పాతు కుక్షిం విధుంతుదః || ౪ ||
కటిం మే వికటః పాతు ఊరూ మే సురపూజితః |
స్వర్భానుర్జానునీ పాతు జంఘే మే పాతు జాడ్యహా || ౫ ||
గుల్ఫౌ గ్రహపతిః పాతు పాదౌ మే భీషణాకృతిః |
సర్వాణంగాని మే పాతు నీలచందనభూషణః || ౬ ||
రాహోరిదం కవచమృద్ధిదవస్తుదం యో
భక్త్యా పఠత్యనుదినం నియతః శుచిః సన్ |
ప్రాప్నోతి కీర్తిమతులాం శ్రియమృద్ధిమాయు-
-రారోగ్యమాత్మవిజయం చ హి తత్ప్రసాదాత్ || ౭ ||
ఇతి శ్రీమన్మహాభారతే ద్రోణపర్వణి ధృతరాష్ట్రసంజయసంవాదే శ్రీ రాహు కవచమ్ |