namō bhagavatē tubhyaṁ vaṭamūlanivāsinē |
vāgīśāya mahājñānadāyinē māyinē namaḥ || 1 ||
guravē sarvalōkānāṁ bhiṣajē bhavarōgiṇām |
nidhayē sarvavidyānāṁ dakṣiṇāmūrtayē namaḥ || 2 ||
akṣīṇaguṇagaṇyāya dakṣiṇāya jagadbhr̥tau |
tryakṣāya sarvaguravē dakṣiṇāmūrtayē namaḥ || 3 ||
īśvarō gururātmēti mūrtibhēdavibhāginē |
vyōmavadvyāptadēhāya dakṣiṇāmūrtayē namaḥ || 4 ||
ōṁ namaḥ praṇavārthāya śuddhajñānaikamūrtayē |
nirmalāya praśāntāya dakṣiṇāmūrtayē namaḥ || 5 ||
amalāyādvitīyāya mōkṣaikaphalahētavē |
manōgirāmadūrāya dakṣiṇāmūrtayē namaḥ || 6 ||
iti śrī dakṣiṇāmūrti ṣaṭkam ||