agaṇitaguṇagaṇamapramēyamādyaṁ
sakalajagatsthitisamyamādi hētum |
uparatamanōyōgihr̥nmandiraṁ taṁ
satatamahaṁ dakṣiṇāmūrtimīḍē || 1 ||
niravadhisukhamiṣṭadātāramīḍyaṁ
natajanamanastāpabhēdaikadakṣam |
bhavavipinadavāgnināmadhēyaṁ
satatamahaṁ dakṣiṇāmūrtimīḍē || 2 ||
tribhuvanagurumāgamaikapramāṇaṁ
trijagatkāraṇasūtrayōgamāyam |
raviśatabhāsvaramīhitapradānaṁ
satatamahaṁ dakṣiṇāmūrtimīḍē || 3 ||
aviratabhavabhāvanā:’tidūraṁ
padapadmadvayabhāvināmadūram |
bhavajaladhisutāraṇāṅghripōtaṁ
satatamahaṁ dakṣiṇāmūrtimīḍē || 4 ||
kr̥tanilayamaniśaṁ vaṭākamūlē
nigamaśikhāvrātabōdhitaikarūpam |
dhr̥tamudrāṅguligamyacārubōdhaṁ
satatamahaṁ dakṣiṇāmūrtimīḍē || 5 ||
druhiṇasutapūjitāṅghripadmaṁ
padapadmānatamōkṣadānadakṣam |
kr̥tagurukulavāsayōgimitraṁ
satatamahaṁ dakṣiṇāmūrtimīḍē || 6 ||
yativarahr̥dayē sadā vibhāntaṁ
ratipatiśatakōṭisundarāṅgamādyam |
parahitaniratātmanāṁ susēvyaṁ
satatamahaṁ dakṣiṇāmūrtimīḍē || 7 ||
smitadhavalavikāsitānanābjaṁ
śrutisulabhaṁ vr̥ṣabhādhirūḍhagātram |
sitajalajasuśōbhidēhakāntiṁ
satatamahaṁ dakṣiṇāmūrtimīḍē || 8 ||
vr̥ṣabhakr̥tamidamiṣṭasiddhidaṁ
guruvaradēvasannidhau paṭhēdyaḥ |
sakaladuritaduḥkhavargahāniṁ
vrajati ciraṁ jñānavān śambhulōkam || 9 ||
iti śrīvr̥ṣabhadēva kr̥ta śrī dakṣiṇāmūrtyaṣṭakam ||