ನೀಲಗ್ರೀವಂ ಶರಚ್ಚಂದ್ರಚಂದ್ರಿಕಾಭಿರ್ವಿರಾಜಿತಮ್ || ೧ ||
ಗೋಕ್ಷೀರಧವಳಾಕಾರಂ ಚಂದ್ರಬಿಂಬಸಮಾನನಮ್ |
ಸುಸ್ಮಿತಂ ಸುಪ್ರಸನ್ನಂ ಚ ಸ್ವಾತ್ಮತತ್ತ್ವೈಕಸಂಸ್ಥಿತಮ್ || ೨ ||
ಗಂಗಾಧರಂ ಶಿವಂ ಶಾಂತಂ ಲಸತ್ಕೇಯೂರಮಂಡಿತಮ್ |
ಸರ್ವಾಭರಣಸಂಯುಕ್ತಂ ಸರ್ವಲಕ್ಷಣಸಂಯುತಮ್ || ೩ ||
ವೀರಾಸನೇ ಸಮಾಸೀನಂ ವೇದಯಜ್ಞೋಪವೀತಿನಮ್ |
ಭಸ್ಮಧಾರಾಭಿರಾಮಂ ತಂ ನಾಗಾಭರಣಭೂಷಿತಮ್ || ೪ ||
ವ್ಯಾಘ್ರಚರ್ಮಾಂಬರಂ ಶುದ್ಧಂ ಯೋಗಪಟ್ಟಾವೃತಂ ಶುಭಮ್ |
ಸರ್ವೇಷಾಂ ಪ್ರಾಣಿನಾಮಾತ್ಮಜ್ಞಾನಾಪಸ್ಮಾರಪೃಷ್ಠತಃ || ೫ ||
ವಿನ್ಯಸ್ತಚರಣಂ ಸಮ್ಯಗ್ ಜ್ಞಾನಮುದ್ರಾಧರಂ ಹರಮ್ |
ಸರ್ವವಿಜ್ಞಾನರತ್ನಾನಾಂ ಕೋಶಭೂತಂ ಸುಪುಸ್ತಕಮ್ || ೬ ||
ದಧಾನಂ ಸರ್ವತತ್ತ್ವಾಕ್ಷಮಾಲಿಕಾಂ ಕುಂಡಿಕಾಮಪಿ |
ಸ್ವಾತ್ಮಭೂತಪರಾನಂದಪರಾಶಕ್ತ್ಯರ್ಧವಿಗ್ರಹಮ್ || ೭ ||
ಧರ್ಮರೂಪವೃಷೋಪೇತಂ ಧಾರ್ಮಿಕೈರ್ವೇದಪಾರಗೈಃ |
ಮುನಿಭಿಃ ಸಂವೃತಂ ಮಾಯಾವಟಮೂಲಾಶ್ರಿತಂ ಶುಭಮ್ || ೮ ||
ಈಶಾನಂ ಸರ್ವವಿದ್ಯಾನಾಮೀಶ್ವರೇಶ್ವರಮವ್ಯಯಮ್ |
ಉತ್ಪತ್ತ್ಯಾದಿವಿನಿರ್ಮುಕ್ತಮೋಂಕಾರಕಮಲಾಸನಮ್ || ೯ ||
ಸ್ವಾತ್ಮವಿದ್ಯಾಪ್ರದಾನೇನ ಸದಾ ಸಂಸಾರಮೋಚಕಮ್ |
ರುದ್ರಂ ಪರಮಕಾರುಣ್ಯಾತ್ಸರ್ವಪ್ರಾಣಿಹಿತೇ ರತಮ್ || ೧೦ ||
ಉಪಾಸಕಾನಾಂ ಸರ್ವೇಷಾಮಭೀಷ್ಟಸಕಲಪ್ರದಮ್ |
ದಕ್ಷಿಣಾಮೂರ್ತಿದೇವಾಖ್ಯಂ ಜಗತ್ಸರ್ಗಾದಿಕಾರಣಮ್ || ೧೧ ||
ಸಮಾಗತ್ಯ ಮಹಾಭಕ್ತ್ಯಾ ದಂಡವತ್ಪೃಥಿವೀತಲೇ |
ಪ್ರಣಮ್ಯ ಬಹುಶೋ ದೇವಂ ಸಮಾರಾಧ್ಯ ಯಥಾಬಲಮ್ || ೧೨ ||
ರುದ್ರ ಯತ್ತೇ ಮುಖಂ ತೇನ ದಕ್ಷಿಣಂ ಪಾಹಿ ಮಾಮಿತಿ |
ಉಕ್ತ್ವಾ ಪುನಃ ಪುನರ್ದೇವಂ ಪೂಜಯಾಮಾಸ ಭಕ್ತಿತಃ || ೧೩ ||
ಇತಿ ಶ್ರೀಸ್ಕಾಂದಪುರಾಣೇ ಸೂತಸಂಹಿತಾಯಾಂ ಮುಕ್ತಿಖಂಡೇ ಚತುರ್ಥೋಽಧ್ಯಾಯೇ ಶ್ರೀ ದಕ್ಷಿಣಾಮೂರ್ತಿ ಸ್ತೋತ್ರಮ್ ||