शेषस्यूतनृसिंहपाणिनखर प्रोतादि कोलामिषः ।
विश्वैकार्णवताविहारमुदितौ यौ मत्स्यकूर्मावुभौ
कर्षन्धीवरतां गतोऽस्यतु स नो मोहं महाभैरवः ॥ १ ॥
नीलरुचि वेदकरवह्नि नयनं सत्
शूलककपालडमरुं च सहपाशम् ।
नग्नशुनवाहनसकिङ्किणिविभूषं
प्रोच्चगति केशधरसर्पवरहारम् ॥ २ ॥
पश्चिमाभिमुखं रौद्रं क्षेत्रपालं समर्चयेत् ।
भैरवं भैरवीयुक्तं अन्यैश्च निजकिङ्करैः ॥ ३ ॥
कल्पवृक्षस्य मूले तु रत्नमण्टपमध्यमे ।
मणिसिंहासनासीनं नानाभरणभूषितम् ॥ ४ ॥
तरुणादित्यसङ्काशं रक्तमाल्याम्बरोज्ज्वलम् ।
उद्यत्पिङ्गजटाबद्ध चारुचन्द्रकलाधरम् ॥ ५ ॥
कमलं स्वर्णपात्रं च वरं चाभयमेव च ।
शङ्खं पीयूषकुम्भं च बिभ्राणं करपङ्कजैः ॥ ६ ॥
देव्या चम्पकवर्णाङ्ग्या समालिङ्गितविग्रहम् ।
स्वपादपद्मभक्तानां वर्षन्तं स्वर्णधारया ॥ ७ ॥
करुणासागरं देवं स्वर्णाकर्षणभैरवम् ।
सिद्धविद्याधरैर्नित्यं स्तूयमानं समाश्रये ॥ ८ ॥
स्वर्णप्रदः स्वर्णवर्षी स्वर्णाकर्षणभैरवः ।
भक्तप्रियो भक्तवश्यो भक्ताभीष्टफलप्रदः ॥ ९ ॥
सिद्धिदः करुणामूर्तिः प्रणताभीष्टपूरकः ।
निधिसिद्धिप्रदः स्वर्णसिद्धिदो रससिद्धिदः ॥ १० ॥
एतैः पदैः शुभैर्दिव्यैर्योऽर्चयेत् स्वर्णभैरवम् ।
स्वर्णसिद्धिमवाप्नोति भैरवस्य प्रसादतः ॥ ११ ॥
गाङ्गेयपात्रं डमरुं त्रिशूलं
पाशं करैः सन्दधतं त्रिणेत्रम् ।
देव्या युतं श्वानवराश्रितं तं
स्वर्णाभिधं भैरवमाश्रयेऽहम् ॥ १२ ॥
ब्रह्मा यस्य मनोर्मुनिः निगदितस्त्रिष्ठुप् च छन्दः स्वयं
स्वर्णाकर्षणभैरवो हरिहर ब्रह्मात्मको देवता ।
आं बीजं सह शक्तिरित्यभिहितस्तस्यैव सूत्रात्मनः
स्तोत्रध्यानपुरःसरं मनुवरं वक्ष्यामि सम्प्रत्यहम् ॥ १३ ॥
मन्दारद्रुममूलभाजि महिते माणिक्यसिंहासने
दिव्ये रत्नमये सुचम्पकरुचा देव्या समालिङ्गितः ।
भक्तेभ्यो वररत्नपात्रभरितं स्वर्णं दधानोऽनिशं
स्वर्णाकर्षणभैरवो विजयते स्वर्गापवर्गैकभूः ॥ १४ ॥
ओं ऐं क्लां क्लीं क्लूं इति व्याहरद्भ्यो
भिक्षां हैमीं यः स्वयं सम्प्रयच्छन् ।
कारुण्याब्धिः कल्पमूलाधिवासः
स्वर्णाकर्षो भैरवो नोऽस्तु भूत्यै ॥ १५ ॥
ओं ह्रां ह्रीं ह्रूं इत्यन्वहं जापकानां
वर्षन्तं द्राक् स्वर्णवृष्टिं समग्राम् ।
नित्यं स्वच्छं सूर्यकोटिप्रकाशं
स्वर्णाकर्षं भैरवं भावयामि ॥ १६ ॥
मरकतमणिपात्रे सम्भृतं स्वर्णपूरं
स्वमनुमननकृद्भ्यः सादरं सम्प्रदात्रे ।
कुरु हृदय सपर्यां सेव्यमानाय नित्यं
सुरवरभुजगेन्द्रैरापदुद्धारणाय ॥ १७ ॥
नमोऽजामलबद्धाय कल्पमूलनिवासिने ।
स्वर्णाकर्षणशीलाय साधकानां हितात्मने ॥ १८ ॥
लोकेश्वरायाम्बुरुहासनाद्यैः
बर्हिर्मुखैरर्चितपादुकाय ।
दारिद्र्यनिर्मूलनकर्मठाय
कारुण्यवारां निधये नमस्ते ॥ १९ ॥
दीनानाथविपन्नरक्षणरतैराज्ञाप्रतीक्षाकरैः
सिद्धैः साध्यनृकिन्नरोरगसुरैः नित्यं परीतात्मने ।
सानन्दाय समुल्लसद्वरमणिप्रद्योततेजोजुषे
स्वर्णाकर्षणभैरवाय सततं कुर्मो नमस्यां वयम् ॥ २० ॥
स्वर्णाकर्षिण्या स्वदेव्याऽऽश्रिताय
स्वैरारावोदारसिंहासनाय ।
कुर्मो नित्यं शर्मदात्रे नमस्यां
मद्दारिद्र्य द्वेषिणे भैरवाय ॥ २१ ॥
स्वर्णप्रदानाध्वरदीक्षिताय
स्वतेजसाक्रान्तदिगन्तराय ।
सौभाग्यसम्पत्सदनाय नित्यं
श्रीं ह्रीं महाभैरव ते नमोऽस्तु ॥ २२ ॥
चिन्तामणि स्वजनकल्पितपारिजात-
-मन्दार वीतमणिमण्टपमध्यगाय ।
स्वर्णप्रदाननिरताय सदा सपर्यां
कुर्मो वयं त्रिकरणैर्वरभैरवाय ॥ २३ ॥
मूले कल्पतरोः प्रभामणिकृते भद्रासने संस्थितो
हस्ताम्भोरुह रत्नपात्रभरितैः कार्तस्वरैर्भासुरैः ।
अर्थीन् विद्रुतदुर्गतीन् विरचयन्नुद्यद्दिनेशद्युतिः
स्वर्णाकर्षणभैरवो भवतु मे दारिद्र्यविद्रावकः ॥ २४ ॥
कनकमणिविराजद्भूषणैर्भूषिताङ्गं
सकलमुनिजनानां स्वर्णदातारमीशम् ।
निगम शुनकवाहं भैरवं शूलपाणिं
विपुलवरजटालं सन्ततं भावयेऽहम् ॥ २५ ॥
स्वर्णाकर्षणभैरव मन्त्रमयं स्तोत्रमन्वहं जपताम् ।
निधिसिद्धिरसस्वर्णसिद्धयश्च झडिति जायते पुंसाम् ॥ २६ ॥
इति श्रीविजयासारावलीतः श्री स्वर्णाकर्षण भैरव स्तोत्रम् ॥