ശ്രീഗണേശായ നമഃ ..
സൂത ഉവാച --
ശൃണുധ്വം മുനയഃ സർവേ ഗംഗാസ്തവമനുത്തമം .
ശോകമോഹഹരം പുംസാമൃഷിഭിഃ പരികീർതിതം .. 1..
ഋഷയ ഊചുഃ --
ഇയം സുരതരംഗിണീ ഭവനവാരിധേസ്താരിണീ
സ്തുതാ ഹരിപദാംബുജാദുപഗതാ ജഗത്സംസദഃ .
സുമേരുശിഖരാമരപ്രിയജലാമലക്ഷാലിനീ
പ്രസന്നവദനാ ശുഭാ ഭവഭയസ്യ വിദ്രാവിണീ .. 2..
ഭഗീരഥരഥാനുഗാ സുരകരീന്ദ്രദർപാപഹാ
മഹേശമുകുടപ്രഭാ ഗിരിശിരഃപതാകാ സിതാ .
സുരാസുരനരോരഗൈരജഭവാച്യുതൈഃ സംസ്തുതാ
വിമുക്തിഫലശാലിനീ കലുഷനാശിനീ രാജതേ .. 3..
പിതാമഹകമണ്ഡലുപ്രഭവമുക്തിബീജാ ലതാ
ശ്രുതിസ്മൃതിഗണസ്തുതദ്വിജകുലാലവാലാവൃതാ .
സുമേരുശിഖരാഭിദാ നിപതിതാ ത്രിലോകാവൃതാ
സുധർമഫലശാലിനീ സുഖപലാശിനീ രാജതേ .. 4..
ചരദ്വിഹഗമാലിനീ സഗരവംശമുക്തിപ്രദാ
മുനീന്ദ്രവരനന്ദിനീ ദിവി മതാ ച മന്ദാകിനീ .
സദാ ദുരിതനാശിനീ വിമലവാരിസന്ദർശന-
പ്രണാമഗുണകീർതനാദിഷു ജഗത്സു സംരാജതേ .. 5..
മഹാഭിഷസുതാംഗനാ ഹിമഗിരീശകൂടസ്തനാ
സഫേനജലഹാസിനീ സിതമരാലസച്ചാരിണീ .
ചലല്ലഹരിസത്കരാ വരസരോജമാലാധരാ
രസോല്ലസിതഗാമിനീ ജലധികാമിനീ രാജതേ .. 6..
ക്വചിന്മുനിഗണൈഃ സ്തുതാ ക്വചിദനന്തസമ്പൂജിതാ
ക്വചിത്കലകലസ്വനാ ക്വചിദധീരയാദോഗണാ .
ക്വചിദ്രവികരോജ്ജ്വലാ ക്വചിദുദഗ്രപാതാകുലാ
ക്വചിജ്ജനവിഗാഹിതാ ജയതി ഭീഷ്മമാതാ സതീ .. 7..
സ ഏവ കുശലീ ജനഃ പ്രണമതീഹ ഭാഗീരഥീം
സ ഏവ തപസാം നിധിർജപതി ജാഹ്നവീമാദരാത് .
സ ഏവ പുരുഷോത്തമഃ സ്മരതി സാധു മന്ദാകിനീം
സ ഏവ വിജയീ പ്രഭുഃ സുരതരംഗിണീം സേവതേ .. 8..
തവാമലജലാചിതം ഖഗസൃഗാലമീനക്ഷതം
ചലല്ലഹരിലോലിതം രുചിരതീരജംബാലിതം .
കദാ നിജവപുർമുദാ സുരനരോരഗൈഃ സംസ്തുതോഽപ്യഹം
ത്രിപഥഗാമിനി പ്രിയമതീവ പശ്യാമ്യഹോ .. 9..
ത്വത്തീരേ വസതിം തവാമലജലസ്നാനം തവ പ്രേക്ഷണം
ത്വന്നാമസ്മരണം തവോദയകഥാസംലാപനം പാവനം .
ഗംഗേ മേ തവ സേവനൈകനിപുണോഽപ്യാനന്ദിതശ്ചാദൃതഃ
സ്തുത്വാ ചോദ്ഗതപാതകോ ഭുവി കദാ ശാന്തശ്ചരിഷ്യാമ്യഹം .. 10..
ഇത്യേതദൃഷിഭിഃ പ്രോക്തം ഗംഗാസ്തവനമുത്തമം .
സ്വർഗ്യം യശ്സ്യമായുഷ്യം പഠനാച്ഛ്രവണാദപി .. 11..
സർവപാപഹരം പുംസാം ബലമായുർവിവർധനം .
പ്രാതർമധ്യാഹ്നസായാഹ്നേ ഗംഗാസാന്നിധ്യതാ ഭവേത് .. 12..
ഇത്യേതദ്ഭാർഗവാഖ്യാനം ശുകദേവാന്മയാ ശ്രുതം .
പഠിതം ശ്രാവിതം ചാത്ര പുണ്യം ധന്യം യശസ്കരം .. 13..
അവതാരം മഹാവിഷ്ണോഃ കൽകേഃ പരമമദ്ഭുതം .
പഠതാം ശൃണ്വതാം ഭക്ത്യാ സർവാശുഭവിനാശനം .. 14..
ഇതി ശ്രീകൽകിപുരാണേഽനുഭാഗവതേ ഭവിഷ്യേ തൃതീയാംശേ
ഋഷികൃതോ ഗംഗാസ്തവഃ സമ്പൂർണഃ ..
Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com