ఘటికాచలశృంగాగ్ర విమానోదరవాసినే |
నిఖిలామరసేవ్యాయ నరసింహాయ మంగళమ్ || ౧ ||
ఉదీచీరంగనివసత్ సుమనస్తోమసూక్తిభిః |
నిత్యాభివృద్ధయశసే నరసింహాయ మంగళమ్ || ౨ ||
సుధావల్లీపరిష్వంగసురభీకృతవక్షసే |
ఘటికాద్రినివాసాయ శ్రీనృసింహాయ మంగళమ్ || ౩ ||
సర్వారిష్టవినాశాయ సర్వేష్టఫలదాయినే |
ఘటికాద్రినివాసాయ శ్రీనృసింహాయ మంగళమ్ || ౪ ||
మహాగురుమనఃపద్మమధ్యనిత్యనివాసినే |
భక్తోచితాయ భవతాత్ మంగళం శాశ్వతీః సమాః || ౫ ||
శ్రీమత్యై విష్ణుచిత్తార్యమనోనందన హేతవే |
నందనందనసుందర్యై గోదాయై నిత్యమంగళమ్ || ౬ ||
శ్రీమన్మహాభూతపురే శ్రీమత్కేశవయజ్వనః |
కాంతిమత్యాం ప్రసూతాయ యతిరాజాయ మంగళమ్ || ౭ ||
పాదుకే యతిరాజస్య కథయంతి యదాఖ్యయా |
తస్య దాశరథేః పాదౌ శిరసా ధారయామ్యహమ్ || ౮ ||
శ్రీమతే రమ్యజామాతృమునీంద్రాయ మహాత్మనే |
శ్రీరంగవాసినే భూయాత్ నిత్యశ్రీః నిత్యమంగళమ్ || ౯ ||
సౌమ్యజామాతృయోగీంద్ర చరణాంబుజషట్పదమ్ |
దేవరాజగురుం వందే దివ్యజ్ఞానప్రదం శుభమ్ || ౧౦ ||
వాధూలశ్రీనివాసార్యతనయం వినయాధికమ్ |
ప్రజ్ఞానిధిం ప్రపద్యేఽహం శ్రీనివాసమహాగురుమ్ || ౧౧ ||
చండమారుతవేదాంతవిజయాదిస్వసూక్తిభిః |
వేదాంతరక్షకాయాస్తు మహాచార్యాయ మంగళమ్ || ౧౨ ||
ఇతి శ్రీ ఘటికాచల యోగనృసింహ మంగళ స్తోత్రమ్ |