అస్య శ్రీబృహస్పతిస్తోత్రస్య గృత్సమద ఋషిః అనుష్టుప్ ఛందః బృహస్పతిర్దేవతా బృహస్పతిప్రీత్యర్థే జపే వినియోగః ||
గురుర్బృహస్పతిర్జీవః సురాచార్యో విదాంవరః |
వాగీశో ధిషణో దీర్ఘశ్మశ్రుః పీతాంబరో యువా || ౧ ||
సుధాదృష్టిర్గ్రహాధీశో గ్రహపీడాపహారకః |
దయాకరః సౌమ్యమూర్తిః సురార్చ్యః కుంకుమద్యుతిః || ౨ ||
లోకపూజ్యో లోకగురుర్నీతిజ్ఞో నీతికారకః |
తారాపతిశ్చాంగిరసో వేదవైద్యపితామహః || ౩ ||
భక్త్యా బృహస్పతిం స్మృత్వా నామాన్యేతాని యః పఠేత్ |
అరోగీ బలవాన్ శ్రీమాన్ పుత్రవాన్ స భవేన్నరః || ౪ ||
జీవేద్వర్షశతం మర్త్యో పాపం నశ్యతి నశ్యతి |
యః పూజయేద్గురుదినే పీతగంధాక్షతాంబరైః || ౫ ||
పుష్పదీపోపహారైశ్చ పూజయిత్వా బృహస్పతిమ్ |
బ్రాహ్మణాన్ భోజయిత్వా చ పీడాశాంతిర్భవేద్గురోః || ౬ ||
ఇతి శ్రీస్కందపురాణే శ్రీ బృహస్పతి స్తోత్రమ్ |