శ్రీపార్వత్యువాచ |
ధూమావత్యర్చనం శంభో శ్రుతం విస్తరతో మయా |
కవచం శ్రోతుమిచ్ఛామి తస్యా దేవ వదస్వ మే || ౧ ||
శ్రీభైరవ ఉవాచ |
శృణు దేవి పరం గుహ్యం న ప్రకాశ్యం కలౌ యుగే |
కవచం శ్రీధూమావత్యాః శత్రునిగ్రహకారకమ్ || ౨ ||
బ్రహ్మాద్యా దేవి సతతం యద్వశాదరిఘాతినః |
యోగినో భవచ్ఛత్రుఘ్నా యస్యా ధ్యానప్రభావతః || ౩ ||
ఓం అస్య శ్రీధూమావతీకవచస్య పిప్పలాద ఋషిః అనుష్టుప్ ఛందః శ్రీధూమావతీ దేవతా ధూం బీజం స్వాహా శక్తిః ధూమావతీ కీలకం శత్రుహననే పాఠే వినియోగః |
కవచమ్ |
ఓం ధూం బీజం మే శిరః పాతు ధూం లలాటం సదాఽవతు |
ధూమా నేత్రయుగం పాతు వతీ కర్ణౌ సదాఽవతు || ౪ ||
దీర్ఘా తూదరమధ్యే తు నాభిం మే మలినాంబరా |
శూర్పహస్తా పాతు గుహ్యం రూక్షా రక్షతు జానునీ || ౫ ||
ముఖం మే పాతు భీమాఖ్యా స్వాహా రక్షతు నాసికామ్ |
సర్వవిద్యాఽవతు కంఠం వివర్ణా బాహుయుగ్మకమ్ || ౬ ||
చంచలా హృదయం పాతు ధృష్టా పార్శ్వే సదాఽవతు |
ధూమహస్తా సదా పాతు పాదౌ పాతు భయావహా || ౭ ||
ప్రవృద్ధరోమా తు భృశం కుటిలా కుటిలేక్షణా |
క్షృత్పిపాసార్దితా దేవీ భయదా కలహప్రియా || ౮ ||
సర్వాంగం పాతు మే దేవీ సర్వశత్రువినాశినీ |
ఇతి తే కథితం పుణ్యం కవచం భువి దుర్లభమ్ || ౯ ||
న ప్రకాశ్యం న ప్రకాశ్యం న ప్రకాశ్యం కలౌ యుగే |
పఠనీయం మహాదేవి త్రిసంధ్యం ధ్యానతత్పరైః |
దుష్టాభిచారో దేవేశి తద్గాత్రం నైవ సంస్పృశేత్ || ౧౦ ||
ఇతి భైరవీభైరవసంవాదే ధూమావతీ కవచం సంపూర్ణమ్ |