అస్య శ్రీ కేతుకవచస్తోత్రస్య త్ర్యంబక ఋషిః, అనుష్టుప్ ఛందః, కేతుర్దేవతా, కం బీజం, నమః శక్తిః, కేతురితి కీలకం, కేతు ప్రీత్యర్థే జపే వినియోగః |
ధ్యానమ్ –
ధూమ్రవర్ణం ధ్వజాకారం ద్విభుజం వరదాంగదం
చిత్రాంబరధరం కేతుం చిత్రగంధానులేపనమ్ |
వైడూర్యాభరణం చైవ వైడూర్య మకుటం ఫణిం
చిత్రం కఫాధికరసం మేరుం చైవాప్రదక్షిణమ్ ||
కేతుం కరాళవదనం చిత్రవర్ణం కిరీటినమ్ |
ప్రణమామి సదా దేవం ధ్వజాకారం గ్రహేశ్వరమ్ || ౧ ||
అథ కవచమ్ –
చిత్రవర్ణః శిరః పాతు ఫాలం ధూమ్రసమద్యుతిః |
పాతు నేత్రే పింగళాక్షః శ్రుతీ మే రక్తలోచనః || ౨ ||
ఘ్రాణం పాతు సువర్ణాభశ్చిబుకం సింహికాసుతః |
పాతు కంఠం చ మే కేతుః స్కంధౌ పాతు గ్రహాధిపః || ౩ ||
హస్తౌ పాతు సురశ్రేష్ఠః కుక్షిం పాతు మహోగ్రహః |
సింహాసనః కటిం పాతు మధ్యం పాతు మహాసురః || ౪ ||
ఊరూ పాతు మహాశీర్షో జానునీ మేఽతికోపనః |
పాతు పాదౌ చ మే క్రూరః సర్వాంగం నరపింగళః || ౫ || [రవిమర్దకః]
య ఇదం కవచం దివ్యం సర్వరోగవినాశనమ్ |
సర్వశత్రువినాశం చ ధారణాద్విజయీ భవేత్ || ౬ ||
ఇతి శ్రీబ్రహ్మాండపురాణే శ్రీ కేతు కవచమ్ |