అస్య శ్రీశుక్రకవచస్తోత్రమహామంత్రస్య భరద్వాజ ఋషిః అనుష్టుప్ ఛందః శుక్రో దేవతా అం బీజం గం శక్తిః వం కీలకం మమ శుక్రగ్రహప్రసాద సిద్ధ్యర్థే జపే వినియోగః |
కరన్యాసః –
భాం అంగుష్ఠాభ్యాం నమః |
భీం తర్జనీభ్యాం నమః |
భూం మధ్యమాభ్యాం నమః |
భైం అనామికాభ్యాం నమః |
భౌం కనిష్ఠికాభ్యాం నమః |
భః కరతలకరపృష్ఠాభ్యాం నమః ||
అంగన్యాసః –
భాం హృదయాయ నమః |
భీం శిరసే స్వాహా |
భూం శిఖాయై వషట్ |
భైం కవచాయ హుమ్ |
భౌం నేత్రత్రయాయ వౌషట్ |
భః అస్త్రాయ ఫట్ |
భూర్భువః సువరోమితి దిగ్బంధః ||
ధ్యానమ్ –
మృణాలకుందేందుపయోజసుప్రభం
పీతాంబరం ప్రసృతమక్షమాలినమ్ |
సమస్తశాస్త్రార్థనిధిం మహాంతం
ధ్యాయేత్కవిం వాంఛితమర్థసిద్ధయే || ౧ ||
కవచమ్ –
శిరో మే భార్గవః పాతు ఫాలం పాతు గ్రహాధిపః |
నేత్రే దైత్యగురుః పాతు శ్రోత్రే మే చందనద్యుతిః || ౨ ||
పాతు మే నాసికాం కావ్యో వదనం దైత్యవందితః |
జిహ్వా మే చోశనాః పాతు కంఠం శ్రీకంఠభక్తిమాన్ || ౩ ||
భుజౌ తేజోనిధిః పాతు కుక్షిం పాతు మనోవ్రజః |
నాభిం భృగుసుతః పాతు మధ్యం పాతు మహీప్రియః || ౪ ||
కటిం మే పాతు విశ్వాత్మా ఊరూ మే సురపూజితః |
జానుం జాడ్యహరః పాతు జంఘే జ్ఞానవతాం వరః || ౫ ||
గుల్ఫౌ గుణనిధిః పాతు పాతు పాదౌ వరాంబరః |
సర్వాణ్యంగాని మే పాతు స్వర్ణమాలాపరిష్కృతః || ౬ ||
య ఇదం కవచం దివ్యం పఠతి శ్రద్ధయాన్వితః |
న తస్య జాయతే పీడా భార్గవస్య ప్రసాదతః || ౭ ||
ఇతి శ్రీబ్రహ్మాండపురాణే శ్రీ శుక్ర కవచమ్ |