|| ఐం ఖ్ఫ్రేమ్ ||
నమోఽస్తు తే మహామాయే దేహాతీతే నిరంజనే |
ప్రత్యంగిరా జగద్ధాత్రి రాజలక్ష్మి నమోఽస్తు తే || ౧ ||
వర్ణదేహా మహాగౌరీ సాధకేచ్ఛాప్రవర్తితా |
పదదేహా మహాస్ఫాల మహాసిద్ధిసముత్థితా || ౨ ||
తత్త్వదేహస్థితా దేవి సాధకానుగ్రహా స్మృతా |
మహాకుండలినీ భిత్త్వా సహస్రదళభేదినీ || ౩ ||
ఇడాపింగళమధ్యస్థా వాయుభూతా ఖగామినీ |
మృణాలతంతురూపిణ్యా సుషుమ్ణామధ్యచారిణీ || ౪ ||
నాదాంతేనాదసంస్థానా నాదాతీతా నిరంజనా |
సూక్ష్మేస్థూలేతి సంపూజ్యే అచింత్యాచింత్యవిగ్రహే || ౫ ||
పరాపరపరే శాంతే బ్రహ్మలీనే పరే శివే |
అచింత్యరూపచరితే అచింత్యార్థఫలప్రదే || ౬ ||
ఏకాకినీ విశ్వమాతా కరవీరనివాసినీ |
మహాస్ఫాలప్రదా నిత్యా మహామేలాపకారిణీ || ౭ ||
బిందుమధ్యే స్థితా దేవీ కుటిలే చార్ధచంద్రికే |
ద్వాదశాంతాలయా దేవీ షోడశాధారవాసినీ || ౮ ||
కార్యకారణసంభిన్నా చైతన్యానాడిమధ్యగా |
శక్తిమూలే మహాచక్రే నవధా సంవ్యవస్థితా || ౯ ||
అశరీరా పరాదేవీ శరీరే ప్రాణరూపిణీ |
సుధాద్రవసమాకారా ఓంకారపరవిగ్రహా || ౧౦ ||
విద్యుల్లతనిభా దేవీ భావాభావవివర్జితా |
స్వాంతపద్మస్థితా నిత్యా పరేశీ శాంతవిగ్రహా || ౧౧ ||
సత్త్వరూపా రజోరూపా తమోరూపా త్రయాత్మికా |
త్వమేవ దేవీ సర్వేషాం భూతానాం ప్రాణదాయినీ || ౧౨ ||
త్వయైవ సృజ్యతే విశ్వం లీలయా బహుధా స్థితా |
మాలినీ పరమా దేవీ శ్మశానపరబంధనీ || ౧౩ ||
హృత్తాలుభేదినీ చక్రే విచక్రే చక్రసుందరీ |
బిందుద్వారనిరోధేన దివ్యవ్యాప్తా నమోఽస్తు తే || ౧౪ ||
సూర్యకోటిప్రతీకాశే చంద్రకోట్యతినిర్మలే |
కందర్పకోటిలావణ్యకోటిబ్రహ్మాండవిగ్రహే || ౧౫ ||
నిరాకారే నిరాభాసే నిర్లేపే నిర్వినిగ్రహే |
సకలాఖ్యే మహామాయే వరదే సురపూజితే || ౧౬ ||
ఖకారఫకారవహ్నిస్థైకారాంతర సుందరి |
మకారాంతర వర్గేషు పంచపిండాత్మకే శివే || ౧౭ ||
సర్పవత్కుటిలాకార నాదశక్తిపరే మతే |
బిందుచక్రస్థితా దేవీ జాలంధరస్వరూపిణీ || ౧౮ ||
భూర్యవైడూర్యపీఠస్థే పూర్ణపీఠవ్యవస్థితే |
కామస్థితే కళాతీతే కామాఖ్యే చ భగోద్భవే || ౧౯ ||
బ్రహ్మగ్రంథికలాటోపమధ్యేస్రోతప్రవాహినీ |
శివే సర్వగతే సూక్ష్మే నిత్యానందమహోత్సవే || ౨౦ ||
మంత్రనాయికి మంత్రజ్ఞే విద్యేకోశాంతవాసినీ |
పంచపీఠికమధ్యస్థే మేరునాయకి శర్వరీ || ౨౧ ||
ఖేచరీ భూచరీ చైవ శక్తిత్రయప్రవాహినీ |
కాలాంతాగ్నిసముద్భూతా కాలకాలాంతకాలినీ || ౨౨ ||
కాళికాక్రమసంబంధి కాళిద్వాదశమండలే |
త్రైలోక్యదహనీ దేవీ సా చ మూర్తిస్త్రయోదశీ || ౨౩ ||
సృష్టి స్థితి చ సంహారే అనాఖ్యాఖ్యే మహాక్రమే |
భాసాఖ్యా గుహ్యకాళీ చ నిర్వాణేశీ పరేశ్వరీ || ౨౪ ||
ఝంకారిణీ భైరవీ చ స్వర్ణకోటేశ్వరీ శివా |
రాజరాజేశ్వరీ చండా అఘోరేశీ నిశేశ్వరీ || ౨౫ ||
సుందరీ త్రిపురా పద్మా తారా పూర్ణేశ్వరీ జయా |
క్రమమండలమధ్యస్థా క్రమేశీ కుబ్జికాంబికా || ౨౬ ||
జ్యేష్ఠబాలవిభేదేన కుబ్జాఖ్యా ఉగ్రచండికా |
బ్రాహ్మాణీ రౌద్రీ కౌమారీ వైష్ణవీ దీర్ఘనాసికా || ౨౭ ||
వజ్రిణీ చర్చికాలక్ష్మీ పూజయేద్దివ్యమాతరః |
అసితాంగోరురుశ్చండః క్రోధీశోన్మత్త సంజ్ఞకమ్ || ౨౮ ||
కపాలీ భీషణాఖ్యాశ్చ సంహారశ్చాష్టమస్తథా |
భక్తానాం సాధకానాం చ లక్ష్మీం సిద్ధిం ప్రయచ్ఛ మే || ౨౯ ||
సిద్ధిలక్ష్మీర్మహాదేవీం భైరవేనానుకీర్తితా |
సాధకద్వేష్టకానాం చ సర్వకర్మవిభంజినీ || ౩౦ ||
విపరీతకరీ దేవీ ప్రత్యంగిరా నమోఽస్తు తే |
కాలాది గ్రసితే సర్వం గ్రహభూతాది డాకినీ || ౩౧ ||
సాధకం రక్షతే దేవీ కాలసంకర్షణీం నుమః |
శివం ప్రయచ్ఛతే దేవీ రక్షతే లీలయా జగత్ || ౩౨ ||
రాజ్యలాభప్రదాం దేవీ రక్షణీ భక్తవత్సలామ్ |
ప్రత్యంగిరాం నమస్యామి అచింతితార్థసిద్ధయే || ౩౩ ||
సర్వశత్రూన్ ప్రమర్దంతీ దురితక్లేశనాశినీమ్ |
ప్రత్యంగిరాం నమస్యామి అచింతితార్థసిద్ధయే || ౩౪ ||
ఆపదాంభోధితరణిం పరం నిర్వాణదాయినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౩౫ ||
రాజ్యదాం ధనదాం లక్ష్మీం మోక్షదాం దుఃఖనాశినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౩౬ ||
దుష్టశత్రుప్రశమనీం మహావ్యాధివినాశినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౩౭ ||
కలిదుఃఖప్రశమనీం మహాపాతకనాశినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౩౮ ||
అచింత్యసిద్ధిదాం దేవీ చింతితార్థఫలప్రదామ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౩౯ ||
రాజోపసర్గశమనీం మృత్యుపద్రవనాశినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౪౦ ||
రాజమాతాం రాజలక్ష్మీం రాజ్యేష్టఫలదాయినీమ్ |
ప్రత్యంగిరాం నమస్యామి సిద్ధిలక్ష్మీం జయప్రదామ్ || ౪౧ ||
ఫలశ్రుతిః –
సిద్ధిలక్ష్మీర్మహావిద్యా మహాసిద్ధిప్రదాయికా |
పఠేద్వా పాఠయేద్వాపి స్తోత్రం ప్రత్యంగిరాభిధమ్ || ౪౨ ||
పఠనాచ్ఛత్రుసైన్యాని స్తంభయేజ్జంభయేత్ క్షణాత్ |
అచింతితాని సిద్ధ్యంతి పఠనాత్ సిద్ధిమాప్నుయాత్ || ౪౩ ||
మహాదోషప్రశమనం మహావ్యాధివినాశనమ్ |
సింహవ్యాఘ్రగ్రహభయే రాజోపద్రవనాశనమ్ || ౪౪ ||
గ్రహపీడా జలాగ్నీనాం నాశనం దేవి శాంతిదమ్ |
పూజాకాలే మహాస్తోత్రం యే పఠిష్యంతి సాధకాః || ౪౫ ||
తేషాం సిద్ధిర్నదూరేఽస్తి దేవ్యాః సంతుష్టిదాయకమ్ |
తే నాస్తి యన్నసిద్ధ్యేత కౌలికే కులశాసనే || ౪౬ ||
యం యం చింతయతే కామం స స సిద్ధ్యతి లీలయా |
సత్యం సత్యం మహాదేవీ కౌలికే తత్సమో న హి || ౪౭ ||
అర్ధరాత్రే సముత్థాయ దీపః ప్రజ్వల్యతే నిశి |
పఠ్యతే స్తోత్రమేతత్తు సర్వం సిద్ధ్యతి చింతితమ్ || ౪౮ ||
పురశ్చర్యాం వినానేన స్తోత్రపాఠేన సిద్ధ్యతి |
మండలే ప్రతిమాగ్రే వా మండలాగ్రే పఠేద్యది || ౪౯ ||
ఇదం ప్రోక్తం మహాస్తోత్రం అచింతితార్థసిద్ధిదమ్ |
అన్యదేవరతానాం తు న దేయం తు కదాచన || ౫౦ ||
దాతవ్యం భక్తియుక్తాయ కులదీక్షారతాయ చ |
అన్యథా పతనం యాంతి ఇత్యాజ్ఞా పారమేశ్వరీ || ౫౧ ||
ఇతి త్రిదశడామరే కానవీరే శ్రీసిద్ధినాథావతారితః శ్రీసిద్ధిలక్ష్మీ మహామాయా స్తవం నామ శ్రీ ప్రత్యంగిరా స్తోత్రమ్ ||