ōmiti nikhilā dēvā
yasyājñāṁ śirasi kurvatē satatam |
ōṅkārapadmabhr̥ṅgaṁ
tamahaṁ praṇamāmi dakṣiṇāmūrtim || 1 ||
natvā yatpadayugmaṁ
mūkā api vāgvidhūtaguravaḥ syuḥ |
natajanarakṣaṇadakṣaṁ
tamahaṁ praṇamāmi dakṣiṇāmūrtim || 2 ||
mōhamataṅgajabhēdana-
-pañcāsyā yatpadāmbujapraṇatāḥ |
mōhāndhakāramihiraṁ
tamahaṁ praṇamāmi dakṣiṇāmūrtim || 3 ||
bhavavāridhimāśu tarē-
-tkulyāmiva yatpadāmbujadhyānāt |
bhagavatpadādirūpaṁ
tamahaṁ praṇamāmi dakṣiṇāmūrtim || 4 ||
gativijitahaṁsagarvaṁ
gaganamarudvahnijaladharārūpam |
gajamukhaṣaḍāsyapūjita-
-maniśaṁ praṇamāmi dakṣiṇāmūrtim || 5 ||
varayantē:’khilavidyāḥ
svayamēva yadaṅghripadmanamrajanān |
vanavāsalōlacittaṁ
tamahaṁ praṇamāmi dakṣiṇāmūrtim || 6 ||
tēna jitaṁ jagadakhilaṁ
tēnaivāttaṁ samastabhāgyaṁ ca |
yēna tvatpadayugalaṁ
pūjitamapi jātu dakṣiṇāmūrtē || 7 ||
damaśamamukhāstu suguṇāḥ
prāpyantē satvaraṁ yasya |
pādāmbujayuganamanā-
-ttamahaṁ praṇamāmi dakṣiṇāmūrtim || 8 ||
kṣitipatayō dāsāḥ syu-
-ryatpādapāthōjapūjakasyāśu |
kṣitidharaśikharāvāsaṁ
tamahaṁ praṇamāmi dakṣiṇāmūrtim || 9 ||
ṇāṇēti yanmanusthaṁ
varṇaṁ japtuḥ samastapuruṣārthāḥ |
karatalamadhyagatāḥ syu-
-stamahaṁ praṇamāmi dakṣiṇāmūrtim || 10 ||
mūrtiṁ nirīkṣya mōhaṁ
prāpyāgasutā purā tapastēpē |
yasya prāptyai suciraṁ
tamahaṁ praṇamāmi dakṣiṇāmūrtim || 11 ||
tasyāṇimādisiddhi-
-rvinaiva yōgaṁ bhavēnna sandēhaḥ |
taruṇēndubhūṣitajaṭaṁ
yastvāṁ namatīha dakṣiṇāmūrtē || 12 ||
yē tvatpādābjayugalaṁ
cittē sandadhati dakṣiṇāmūrtē |
tānmattavāraṇēndrā
dadhati turaṅgāḥ suvarṇaśibikāśca || 13 ||
mathitāsurasandōhaṁ
mānasacaramadrirājatanayāyāḥ |
mānapradamānamatā-
-maniśaṁ praṇamāmi dakṣiṇāmūrtim || 14 ||
hyambhōdhau luṭhatāṁ ta-
-tpāraṁ gantuṁ yadīyapadabhaktiḥ |
saṁsr̥tirūpē naukā
tamahaṁ praṇamāmi dakṣiṇāmūrtim || 15 ||
mēdhāprajñē cēṭī-
-bhāvaṁ vrajatō yadaṅghrinatikartuḥ |
mēnāsakhajākāntaṁ
tamahaṁ praṇamāmi dakṣiṇāmūrtim || 16 ||
dhāṁ bāpūrvāṁ nikhilāṁ
yō:’raṁ vārayati bhaktabr̥ndasya |
dhāmnāmapi dhāmatvada-
-maniśaṁ praṇamāmi dakṣiṇāmūrtim || 17 ||
prajñāmātraśarīraṁ
praṇatāghāmbhōdhikumbhasañjātam |
pratyakṣaṁ natavitatēḥ
satataṁ praṇamāmi dakṣiṇāmūrtim || 18 ||
jñāṁśībhūtāñjīvān
bhavamagnān brahmabōdhadānēna |
kurvāṇaṁ pravimuktān
satataṁ praṇamāmi dakṣiṇāmūrtim || 19 ||
pratnavacastatigēyaṁ
prajñādānapracaṇḍanijanamanam |
praṇavapratipādyatanuṁ
satataṁ praṇamāmi dakṣiṇāmūrtim || 20 ||
yasyārdhavarṣmalābhā-
-dēvābhūt sarvamaṅgalā girijā |
yamivarahr̥dabjanilayaṁ
tamahaṁ praṇamāmi dakṣiṇāmūrtim || 21 ||
chatrībhūtavaṭāgaṁ
channamavidyā:’:’khyavāsasānādim |
chatrādinr̥pavibhūtida-
-maniśaṁ praṇamāmi dakṣiṇāmūrtim || 22 ||
svāhāsvadhāniṣēvyaṁ
svākr̥tisantōṣitāgajāhr̥dayam |
svāhāsahāyatilakaṁ
satataṁ praṇamāmi dakṣiṇāmūrtim || 23 ||
hāsādharīkr̥tavidhuṁ
hālāhalaśōbhamānagaladēśam |
hārāyitāhirājaṁ
satataṁ praṇamāmi dakṣiṇāmūrtim || 24 ||
śrīmannr̥siṁhayatirā-
-ṭchiṣyaḥ śrīsaccidānandaḥ |
akarōdguruvarakr̥payā
stōtraṁ śrīdakṣiṇāmūrtēḥ || 25 ||
manuvarṇaghaṭitamētat
stōtraṁ yaḥ paṭhati bhaktisamyuktaḥ |
tasmai vaṭataṭavāsī
dadyāt sakalāḥ kalāstvaritam || 26 ||
iti śrījagadguru śrīsaccidānanda śivābhinava nr̥siṁha bhāratī svāmibhiḥ viracitaṁ śrī dakṣiṇāmūrtimanu suvarṇamālā stōtram |