mudrākṣamālā:’mr̥tapātravidyā
vyāghrājinārdhēnduphaṇīndrayuktam |
yōgīndraparjanya manaḥ sarōja-
-bhr̥ṅgaṁ bhajē:’haṁ hr̥di dakṣiṇāsyam || 1 ||
sphuṭavaṭanikaṭasthaṁ stūyamānāvabhāsaṁ
paṭubhujataṭabaddhavyāghracarmōttarīyam |
caṭulaniṭalanētraṁ candracūḍaṁ munīśaṁ
sphaṭikapaṭaladēhaṁ bhāvayē dakṣiṇāsyam || 2 ||
āvāhayē sundaranāgabhūṣaṁ
vijñānamudrāñcita pañcaśākham |
bhasmāṅgarāgēṇa virājamānaṁ
śrīdakṣiṇāmūrti mahātmarūpam || 3 ||
suvarṇaratnāmalavajranīla-
-māṇikyamuktāmaṇiyuktapīṭhē |
sthirō bhava tvaṁ varadō bhava tvaṁ
saṁsthāpayāmīśvara dakṣiṇāsya || 4 ||
śrījāhnavīnirmalatōyamīśa
cārghyārthamānīya samarpayiṣyē |
prasannavaktrāmbujalōkavandya
kālatrayēhaṁ tava dakṣiṇāsya || 5 ||
kastūrikāmiśramidaṁ gr̥hāṇa
rudrākṣamālābharaṇāṅkitāṅga |
kālatrayābādhyajagannivāsa
pādyaṁ pradāsyē hr̥di dakṣiṇāsya || 6 ||
mudāhamānanda surēndravandya
gaṅgānadītōyamidaṁ hi dāsyē |
tavādhunā cācamanaṁ kuruṣva
śrīdakṣiṇāmūrti gurusvarūpa || 7 ||
sarpiḥ payō dadhi madhu śarkarābhiḥ prasēcayē |
pañcāmr̥tamidaṁ snānaṁ dakṣiṇāsya kuru prabhō || 8 ||
vēdāntavēdyākhilaśūlapāṇē
brahmāmarōpēndrasurēndravandya |
snānaṁ kuruṣvāmalagāṅgatōyē
suvāsitēsmin kuru dakṣiṇāsya || 9 ||
kauśēyavastrēṇa ca mārjayāmi
dēvēśvarāṅgāni tavāmalāni |
prajñākhyalōkatritayaprasanna
śrīdakṣiṇāsyākhilalōkapāla || 10 ||
suvarṇatantūdbhavamagryamīśa
yajñōpavītaṁ paridhatsvadēva |
viśālabāhūdarapañcavaktra
śrīdakṣiṇāmūrti sukhasvarūpa || 11 ||
kastūrikācandanakuṅkumādi-
-vimiśragandhaṁ maṇipātrasaṁstham |
samarpayiṣyāmi mudā mahātman
gaurīmanōvasthitadakṣiṇāsya || 12 ||
śubhrākṣataiḥ śubhratilaiḥ sumiśraiḥ
sampūjayiṣyē bhavataḥ parātman |
tadēkaniṣṭhēna samādhinātha
sadāhamānanda sudakṣiṇāsya || 13 ||
suratnadāṅgēya kirīṭakuṇḍalaṁ
hārāṅgulīkaṅkaṇamēkhalāvr̥tam |
khaṇḍēnducūḍāmr̥tapātrayuktaṁ
śrīdakṣiṇāmūrtimahaṁ bhajāmi || 14 ||
muktāmaṇisthāpitakarburapra-
-sūnaiḥ sadāhaṁ paripūjayiṣyē |
kukṣiprapuṣṭākhilalōkajāla
śrīdakṣiṇāmūrti mahatsvarūpa || 15 ||
daśāṅgadhūpaṁ parikalpayāmi
nānāsugandhānvitamājyayuktam |
mēdhākhya sarvajña budhēndrapūjya
digambara svīkuru dakṣiṇāsya || 16 ||
ājyēna saṁmiśramimaṁ pradīpaṁ
vartitrayēṇānvitamagniyuktam |
gr̥hāṇa yōgīndra mayārpitaṁ bhōḥ
śrīdakṣiṇāmūrtigurō prasīda || 17 ||
śālyōdanaṁ nirmalasūpaśāka-
-bhakṣyājyasamyuktadadhiprasiktam |
kapittha sadrākṣaphalaiśca cūtaiḥ
sāpōśanaṁ bhakṣaya dakṣiṇāsya || 18 ||
guḍāmbu satsaindhavayuktatakraṁ
karpūrapāṭīra lavaṅgayuktam |
yajñēśa kāmāntaka puṇyamūrtē
pibōdakaṁ nirmala dakṣiṇāsya || 19 ||
khamārganiryajjalamāśu dēva
kurūttarāpōśanamabhrakēśa |
prakṣālanaṁ pāṇiyugasya śarva
gaṇḍūṣamāpādaya dakṣiṇāsya || 20 ||
samyagjalēnācamanaṁ kuruṣva
svasthō bhava tvaṁ mama cāgrabhāgē |
cidākr̥tē nirmalapūrṇakāma
vinirmitaṁ pāvana dakṣiṇāsya || 21 ||
tāmbūlamadya pratisaṅgr̥hāṇa
karpūramuktāmaṇicūrṇayuktam |
suparṇaparṇānvitapūgakhaṇḍa-
-manēkarūpākr̥ti dakṣiṇāsya || 22 ||
nīrājanaṁ nirmalapātrasaṁsthaṁ
karpūrasandīpitamaccharūpam |
karōmi vāmēśa tavōparīdaṁ
vyōmākr̥tē śaṅkara dakṣiṇāsya || 23 ||
tataḥ paraṁ darpaṇamīśa paśya
svacchaṁ jagaddīpitacakrabhāsvat |
māṇikyamuktāmaṇihēmanīla-
-vinirmitaṁ pāvana dakṣiṇāsya || 24 ||
mandārapaṅkēruhakundajātī-
-sugandhapuṣpāñjalimarpayāmi |
triśūla ḍhakkāñcita pāṇiyugma
tē dakṣiṇāmūrti virūpadhārin || 25 ||
pradakṣiṇaṁ samyagahaṁ kariṣyē
kālatrayē tvāṁ karuṇābhirāmam |
śivāmanōnātha mamāparādhaṁ
kṣamasva yajñēśvara dakṣiṇāsya || 26 ||
namō namaḥ pāpavināśanāya
namō namaḥ kañjabhavārcitāya |
namō namaḥ kr̥ṣṇahr̥disthitāya
śrīdakṣiṇāmūrti mahēśvarāya || 27 ||
iti śrīvijñānēndra viracitaṁ śrī dakṣiṇāmūrti mānasika pūjā stōtram ||