vītākhilaviṣayēcchaṁ jātānandāśrupulakamatyaccham |
sītāpatidūtādyaṁ vātātmajamadya bhāvayē hr̥dyam || 1 ||
taruṇāruṇamukhakamalaṁ karuṇārasapūrapūritāpāṅgam |
sañjīvanamāśāsē mañjulamahimānamañjanābhāgyam || 2 ||
śambaravairiśarātigamambujadala vipulalōcanōdāram |
kambugalamaniladiṣṭaṁ bimbajvalitōṣṭhamēkamavalambē || 3 ||
dūrīkr̥tasītārtiḥ prakaṭīkr̥tarāmavaibhavasphūrtiḥ |
dāritadaśamukhakīrtiḥ puratō mama bhātu hanumatō mūrtiḥ || 4 ||
vānaranikarādhyakṣaṁ dānavakulakumudaravikarasadr̥śam |
dīnajanāvanadīkṣaṁ pavanatapaḥ pākapuñjamadrākṣam || 5 ||
ētatpavanasutasya stōtraṁ yaḥ paṭhati pañcaratnākhyam |
ciramiha nikhilānbhōgānbhuṅktvā śrīrāmabhaktibhāgbhavati || 6 ||
iti śrīmacchaṅkarācārya kr̥tau hanumatpañcaratnam |