vaiśākhē māsi kr̥ṣṇāyāṁ daśamyāṁ mandavāsarē |
pūrvābhādrā prabhūtāya maṅgalaṁ śrīhanūmatē || 1 ||
karuṇārasapūrṇāya phalāpūpapriyāya ca |
māṇikyahārakaṇṭhāya maṅgalaṁ śrīhanūmatē || 2 ||
suvarcalākalatrāya caturbhujadharāya ca |
uṣṭrārūḍhāya vīrāya maṅgalaṁ śrīhanūmatē || 3 ||
divyamaṅgaladēhāya pītāmbaradharāya ca |
taptakāñcanavarṇāya maṅgalaṁ śrīhanūmatē || 4 ||
bhaktarakṣaṇaśīlāya jānakīśōkahāriṇē |
sr̥ṣṭikāraṇabhūtāya maṅgalaṁ śrīhanūmatē || 5 ||
rambhāvanavihārāya gandhamādanavāsinē |
sarvalōkaikanāthāya maṅgalaṁ śrīhanūmatē || 6 ||
pañcānanāya bhīmāya kālanēmiharāya ca |
kauṇḍinyagōtrajātāya maṅgalaṁ śrīhanūmatē || 7 ||
kēsarīputra divyāya sītānvēṣaparāya ca |
vānarāṇāṁ variṣṭhāya maṅgalaṁ śrīhanūmatē || 8 ||
iti śrī hanumān maṅgalāṣṭakam |