కవచం శృణు చార్వంగి జగన్మంగళనామకమ్ |
పఠనాద్ధారణాద్యస్య బ్రహ్మజ్ఞో జాయతే ధ్రువమ్ || ౧ ||
పరమాత్మా శిరః పాతు హృదయం పరమేశ్వరః |
కంఠం పాతు జగత్పాతా వదనం సర్వదృగ్విభుః || ౨ ||
కరౌ మే పాతు విశ్వాత్మా పాదౌ రక్షతు చిన్మయః |
సర్వాంగం సర్వదా పాతు పరం బ్రహ్మ సనాతనమ్ || ౩ ||
శ్రీజగన్మంగళస్యాస్య కవచస్య సదాశివః |
ఋషిశ్ఛందోఽనుష్టుబితి పరబ్రహ్మా చ దేవతా || ౪ ||
చతుర్వర్గఫలావాప్త్యై వినియోగః ప్రకీర్తితః |
యః పఠేద్బ్రహ్మకవచమృషిన్యాసపురఃసరమ్ || ౫ ||
స బ్రహ్మజ్ఞానమాసాద్య సాక్షాద్బ్రహ్మమయో భవేత్ |
భూర్జే విలిఖ్య గుటికా స్వర్ణస్థాం ధారాయేద్యది || ౬ ||
కంఠే వా దక్షిణే బాహౌ సర్వసిద్ధీశ్వరో భవేత్ |
ఇత్యేతత్ పరమబ్రహ్మకవచం తే ప్రకాశితమ్ || ౭ ||
దద్యాత్ ప్రియాయ శిష్యాయ గురుభక్తాయ ధీమతే |
పఠిత్వా స్తోత్రకవచం ప్రణమేత్సాధకాగ్రణీః || ౮ ||
ఓం నమస్తే పరమం బ్రహ్మ నమస్తే పరమాత్మనే |
నిర్గుణాయ నమస్తుభ్యం సద్రూపాయ నమో నమః || ౯ ||
వాచికం కాయికం వాపి మానసం వా యథామతి |
ఆరాధనే పరేశస్య భావశుద్ధిర్విధీయతే || ౧౦ ||
ఇతి మహానిర్వాణతంత్రే తృతీయోల్లాసే జగన్మంగళం నామ శ్రీ బ్రహ్మ కవచమ్ ||