అస్య శ్రీపీతాంబరా బగళాముఖీ కవచస్య మహాదేవ ఋషిః, ఉష్ణిక్ ఛందః, శ్రీపీతాంబరా దేవతా, స్థిరమాయా బీజం, స్వాహా శక్తిః, అం ఠః కీలకం, మమ సన్నిహితానాం దూరస్థానాం సర్వదుష్టానాం వాఙ్ముఖపదజిహ్వాపవర్గాణాం స్తంభనపూర్వకం సర్వసంపత్తిప్రాప్తి చతుర్వర్గఫలసాధనార్థే జపే వినియోగః ||
ధ్యానమ్ –
మధ్యేసుధాబ్ధిమణిమండపరత్నవేద్యాం
సింహాసనోపరిగతాం పరిపీతవర్ణామ్ |
పీతాంబరాభరణమాల్యవిభూషితాంగీం
దేవీం భజామి ధృతముద్గరవైరిజిహ్వామ్ || ౧ ||
జిహ్వాగ్రమాదాయ కరేణ దేవీం
వామేన శత్రూన్ పరిపీడయంతీమ్ |
గదాభిఘాతేన చ దక్షిణేన
పీతాంబరాఢ్యాం ద్విభుజాం నమామి || ౨ ||
హిమవత్తనయా గౌరీ కైలాసేఽథ శిలోచ్చయే |
అపృచ్ఛద్గిరిశం దేవీ సాధకానుగ్రహేచ్ఛయా || ౧ ||
శ్రీపార్వత్యువాచ |
దేవదేవ మహాదేవ భక్తానుగ్రహకారక |
శృణు విజ్ఞాప్యతే యత్తు శ్రుత్వా సర్వం నివేదయ || ౨ ||
విశుద్ధాః కౌలికా లోకే యే మత్కర్మపరాయణాః |
తేషాం నిందాకరా లోకే బహవః కిల దుర్జనాః || ౩ ||
మనోబాధాం విదధతే ముహుః కటుభిరుక్తిభిః |
తేషామాశు వినాశాయ త్వయా దేవ ప్రకాశితః || ౪ ||
యో మంత్రో బగళాముఖ్యాః సర్వకామసమృద్ధిదః |
కవచం తస్య మంత్రస్య ప్రకాశయ దయానిధే || ౫ ||
యస్య స్మరణమాత్రేణ పశూనాం నిగ్రహో భవేత్ |
ఆత్మానం సతతం రక్షేద్వ్యాఘ్రాగ్నిరిపురాజతః || ౬ ||
శ్రుత్వాఽథ పార్వతీవాక్యం జ్ఞాత్వా తస్యా మనోగతమ్ |
విహస్య తాం పరిష్వజ్య సాధు సాధ్విత్యపూజయత్ || ౭ ||
తదాహ కవచం దేవ్యై కృపయా కరుణానిధిః |
శ్రీశంకర ఉవాచ |
శృణు త్వం బగళాముఖ్యాః కవచం సర్వకామదమ్ || ౮ ||
యస్య స్మరణమాత్రేణ బగళాముఖీ ప్రసీదతి |
సర్వసిద్ధిప్రదా ప్రాచ్యాం పాతు మాం బగళాముఖీ || ౯ ||
పీతాంబరా తు చాగ్నేయ్యాం యామ్యాం మహిషమర్దినీ |
నైరృత్యాం చండికా పాతు భక్తానుగ్రహకారిణీ || ౧౦ ||
పాతు నిత్యం మహాదేవీ ప్రతీచ్యాం శూకరాననా |
వాయవ్యే పాతు మాం కాళీ కౌబేర్యాం త్రిపురాఽవతు || ౧౧ ||
ఈశాన్యాం భైరవీ పాతు పాతు నిత్యం సురప్రియా |
ఊర్ధ్వం వాగీశ్వరీ పాతు మధ్యే మాం లలితాఽవతు || ౧౨ ||
అధస్తాదపి మాం పాతు వారాహీ చక్రధారిణీ |
మస్తకం పాతు మే నిత్యం శ్రీదేవీ బగళాముఖీ || ౧౩ ||
ఫాలం పీతాంబరా పాతు నేత్రే త్రిపురభైరవీ |
శ్రవణౌ విజయా పాతు నాసికాయుగళం జయా || ౧౪ ||
శారదా వచనం పాతు జిహ్వాం పాతు సురేశ్వరీ |
కంఠం రక్షతు రుద్రాణీ స్కంధౌ మే వింధ్యవాసినీ || ౧౫ ||
సుందరీ పాతు బాహూ మే జయా పాతు కరౌ సదా |
భవానీ హృదయం పాతు మధ్యం మే భువనేశ్వరీ || ౧౬ ||
నాభిం పాతు మహామాయా కటిం కమలలోచనా |
ఊరూ మే పాతు మాతంగీ జానునీ చాపరాజితా || ౧౭ ||
జంఘే కపాలినీ పాతు చరణౌ చంచలేక్షణా |
సర్వతః పాతు మాం తారా యోగినీ పాతు చాగ్రతః || ౧౮ ||
పృష్ఠం మే పాతు కౌమారీ దక్షపార్శ్వే శివాఽవతు |
రుద్రాణీ వామపార్శ్వే తు పాతు మాం సర్వదేష్టదా || ౧౯ ||
స్తుతా సర్వేషు దేవేషు రక్తబీజవినాశినీ |
ఇత్యేతత్ కవచం దివ్యం ధర్మకామార్థసాధనమ్ || ౨౦ ||
గోపనీయం ప్రయత్నేన కస్యచిన్న ప్రకాశయేత్ |
యః సకృచ్ఛృణుయాదేతత్ కవచం మన్ముఖోదితమ్ || ౨౧ ||
స సర్వాన్ లభతే కామాన్ మూర్ఖో విద్యామవాప్నుయాత్ |
తస్యాశు శత్రవో యాంతి యమస్య భవనే శివే || ౨౨ ||
ఇతి శ్రీరుద్రయామలే మహాతంత్రే శ్రీ బగళాముఖీ కవచమ్ |