ಪ್ರಸಾದಿತಾತ್ಪದ್ಮಭವಾತ್ತಪೋಭಿಃ ।
ಅವೈದಿಕಂ ವೈದಿಕಮಪ್ಯಗೃಹ್ಣಾನ್
ಮಂತ್ರಂ ಸಮಸ್ತಂ ದಿವಿಷಜ್ಜಯೈಷೀ ॥ ೨೭-೧ ॥
ವೇದೇ ಗೃಹೀತೇ ದಿತಿಜೇನ ವಿಪ್ರಾಃ
ಶ್ರುತಿಸ್ಥಿರಾ ವಿಸ್ಮೃತವೇದಮಂತ್ರಾಃ ।
ಸಾಂಧ್ಯಾನಿ ಕರ್ಮಾಣ್ಯಪಿ ನೈವ ಚಕ್ರುಃ
ಕ್ಷಿತಿಸ್ತ್ವವೇದಾಧ್ಯಯನಾ ಬಭೂವ ॥ ೨೭-೨ ॥
ಹೃತೇಷು ಮಂತ್ರೇಷ್ವಖಿಲೇಷು ಪೂಜಾ-
ಯಜ್ಞಾದಿ ಭೂಮೌ ನ ಕೃತಂ ಮನುಷ್ಯೈಃ ।
ಸುರಾ ಅಶಕ್ತಾಸ್ತದಲಾಭಖಿನ್ನಾ
ದೈತ್ಯೇನ ಯುದ್ಧೇ ಬಲಿನಾ ಜಿತಾಶ್ಚ ॥ ೨೭-೩ ॥
ತ್ಯಕ್ತ್ವಾ ದಿವಂ ತೇ ಗಿರಿಗಹ್ವರೇಷು
ನಿಲೀಯ ವರ್ಷಾಣಿ ಬಹೂನಿ ನಿನ್ಯುಃ ।
ವೃಷ್ಟೇರಭಾವಾದ್ಧರಣೀ ಚ ಶುಷ್ಕ-
ಜಲಾಶಯಾ ತರ್ಷನಿಪೀಡಿತಾಽಭೂತ್ ॥ ೨೭-೪ ॥
ಸರ್ವೇ ತೃಷಾರ್ತಾಶ್ಚ ಹಿಮಾದ್ರಿಮೇತ್ಯ
ತ್ವಾಂ ಧ್ಯಾನಪೂಜಾನುತಿಭಿರ್ಭಜಂತಃ ।
ಪ್ರಸಾದಯಾಮಾಸುರನೇಕಕೋಟಿ-
ಬ್ರಹ್ಮಾಂಡಕರ್ತ್ರೀಮಖಿಲಾರ್ತಿಹಂತ್ರೀಮ್ ॥ ೨೭-೫ ॥
ದೃಷ್ಟಾ ದಯಾರ್ದ್ರಾಕ್ಷಿಶತಾ ತ್ವಮೇಭಿಃ
ಕೃಪಾಶ್ರುವರ್ಷೈರ್ನವರಾತ್ರಮುರ್ವ್ಯಾಮ್ ।
ಜಲಾಶಯಾನ್ಪೂರ್ಣಜಲಾಂಶ್ಚಕರ್ಥ
ಜನಾಃ ಶತಾಕ್ಷೀತ್ಯಭಿಧಾಂ ದದುಸ್ತೇ ॥ ೨೭-೬ ॥
ಕ್ಷುತ್ಪೀಡಿತಾನಾಂ ಚ ಚರಾಚರಾಣಾಂ
ಸರ್ವತ್ರ ನಾನಾವಿಧಮನ್ನಮಿಷ್ಟಮ್ ।
ಸ್ವಾದೂನಿ ಮೂಲಾನಿ ಫಲಾನಿ ಚಾದಾಃ
ಶಾಕಂಭರೀತಿ ಪ್ರಥಿತಾ ತತೋಽಭೂಃ ॥ ೨೭-೭ ॥
ದೈತ್ಯಸ್ತು ವಿಜ್ಞಾಯ ಸಮಸ್ತಮಸ್ತ್ರ-
ಶಸ್ತ್ರೈಃ ಸಸೈನ್ಯಃ ಪ್ರಹರನ್ ವಪುಸ್ತೇ ।
ರಣಾಂಗಣೇ ಸಾಯಕವಿದ್ಧಗಾತ್ರಃ
ಸಶಬ್ದಮುರ್ವ್ಯಾಂ ತರುವತ್ಪಪಾತ ॥ ೨೭-೮ ॥
ಸ ಚಾಸುರಾತ್ಮಾ ಖಲು ವೇದಮಂತ್ರಾನ್
ಚಿರಂ ಪಠಂಸ್ತ್ವಾಮಭಿವೀಕ್ಷಮಾಣಃ ।
ಗತಾಯುರಾವಿಶ್ಯ ಪರಾತ್ಮನಿ ತ್ವ-
ಯ್ಯವಾಪ ಮುಕ್ತಿಂ ಮಿಷತಾಂ ಸುರಾಣಾಮ್ ॥ ೨೭-೯ ॥
ವೇದಾನ್ಹೃತಾನಬ್ಜಭವಾನನೇ ತ್ವಂ
ಪುನಶ್ಚ ನಿಕ್ಷಿಪ್ಯ ಜಗತ್ಸುರಕ್ಷಾಮ್ ।
ಕೃತ್ವಾ ನುತಾ ದೇವಗಣೈರ್ನರೈಶ್ಚ
ತುಷ್ಟಾ ತಿರೋಽಭೂಃ ಕರುಣಾರ್ದ್ರನೇತ್ರಾ ॥ ೨೭-೧೦ ॥
ಭಕ್ತಸ್ಯ ವೈ ದುರ್ಗತಿನಾಶಿನೀ ತ್ವಂ
ಸುಖಪ್ರದಾ ದುರ್ಗಮಹಂತ್ರಿ ಮಾತಃ ।
ದುರ್ಗೇತಿ ನಾಮ್ನಾ ವಿದಿತಾ ಚ ಲೋಕೇ
ವಿಚಿತ್ರರೂಪಾಸ್ತವ ದೇವಿ ಲೀಲಾಃ ॥ ೨೭-೧೧ ॥
ಕೋಽಪ್ಯಸ್ತಿ ಚಿತ್ತೇ ಮಮ ದುರ್ಗಮೋಽಯಂ
ಜ್ಞಾತಸ್ತ್ವಯಾ ನೈವ ಮಯಾ ತು ದೇವಿ ।
ಯಃ ಸಂತತಂ ದ್ರುಹ್ಯತಿ ಮೇ ತಮಾಶು
ಸಂಹೃತ್ಯ ಮಾಂ ರಕ್ಷ ನಮೋ ನಮಸ್ತೇ ॥ ೨೭-೧೨ ॥