ఓం-విఀష్ణో॒ర్నుకం॑-వీఀ॒ర్యా॑ణి॒ ప్రవో॑చం॒ యః పార్థి॑వాని విమ॒మే
రాజాగ్ం॑సి॒ యో అస్క॑భాయ॒దుత్త॑రగ్ం స॒ధస్థం॑-విఀచక్రమా॒ణస్త్రే॒ధోరు॑గా॒యః
॥ 1 (తై. సం. 1.2.13.3)
విష్ణో॑ర॒రాట॑మసి॒ విష్ణోః᳚ పృ॒ష్ఠమ॑సి॒ విష్ణోః॒ శ్నప్త్రే᳚స్థో॒
విష్ణో॒స్స్యూర॑సి॒ విష్ణో᳚ర్ధ్రు॒వమ॑సి వైష్ణ॒వమ॑సి॒ విష్ణ॑వే త్వా ॥ 2
(తై. సం. 1.2.13.3)
తద॑స్య ప్రి॒యమ॒భిపాథో॑ అశ్యామ్ । నరో॒ యత్ర॑ దేవ॒యవో॒ మదం॑తి ।
ఉ॒రు॒క్ర॒మస్య॒ స హి బంధు॑రి॒త్థా । విష్ణో᳚ ప॒దే ప॑ర॒మే మధ్వ॒ ఉథ్సః॑ ॥ 3
(తై. బ్రా. 2.4.6.2)
ప్ర తద్విష్ణు॑-స్స్తవతే వీ॒ర్యా॑య । మృ॒గో న భీ॒మః కు॑చ॒రో గి॑రి॒ష్ఠాః ।
యస్యో॒రుషు॑ త్రి॒షు వి॒క్రమ॑ణేషు । అధి॑క్ష॒యంతి॒ భువ॑నాని॒ విశ్వా᳚ ॥ 4
(తై. బ్రా. 2.4.3.4)
ప॒రో మాత్ర॑యా త॒నువా॑ వృధాన । న తే॑ మహి॒త్వమన్వ॑శ్నువంతి । ఉ॒భే తే॑ విద్మ॒ రజ॑సీ పృథి॒వ్యా విష్ణో॑ దేవ॒త్వమ్ । ప॒ర॒మస్య॑ విథ్సే ॥ 5 (తై. బ్రా. 2.8.3.2)
విచ॑క్రమే పృథి॒వీమే॒ష ఏ॒తామ్ । క్షేత్రా॑య॒ విష్ణు॒ర్మను॑షే దశ॒స్యన్న్
। ధ్రు॒వాసో॑ అస్య కీ॒రయో॒ జనా॑సః । ఊ॒రు॒క్షి॒తిగ్ం సు॒జని॑మాచకార ॥ 6
(తై. బ్రా. 2.4.3.5)
త్రిర్దే॒వః పృ॑థి॒వీమే॒ష ఏ॒తామ్ । విచ॑క్రమే శ॒తర్చ॑సం మహి॒త్వా । ప్ర
విష్ణు॑రస్తు త॒వస॒స్తవీ॑యాన్ । త్వే॒షగ్గ్ హ్య॑స్య॒ స్థవి॑రస్య॒ నామ॑ ॥ 7
(తై. బ్రా. 2.4.3.5)
అతో॑ దే॒వా అ॑వంతు నో॒ యతో॒ విష్ణు॑ర్విచక్ర॒మే । పృ॒థి॒వ్యా-స్స॒ప్తధామ॑భిః । ఇ॒దం-విఀష్ణు॒ర్విచ॑క్రమే త్రే॒ధా నిద॑ధే ప॒దమ్ । సమూ॑ఢమస్య పాగ్ం సు॒రే ॥ త్రీణి॑ ప॒దా విచ॑క్రమే॒ విష్ణు॑ర్గో॒పా అదా᳚భ్యః । తతో॒ ధర్మా॑ణి ధా॒రయన్॑ । విష్ణోః॒ కర్మా॑ణి పశ్యత॒ యతో᳚ వ్ర॒తాని॑ పస్ప॒శే । ఇంద్ర॑స్య॒ యుజ్య॒స్సఖా᳚ ॥
తద్విష్ణోః᳚ పర॒మం ప॒దగ్ం సదా॑ పశ్యంతి సూ॒రయః॑ । ది॒వీవ॒ చక్షు॒రాత॑తమ్ । తద్విప్రా॑సో విప॒న్యవో॑ జాగృ॒వాగ్ం స॒స్సమిం॑ధతే । విష్ణో॒ర్యత్ప॑ర॒మం ప॒దమ్ । పర్యా᳚ప్త్యా॒ అనం॑తరాయాయ॒ సర్వ॑స్తోమోఽతి రా॒త్ర ఉ॑త్త॒మ మహ॑ర్భవతి సర్వ॒స్యాప్త్యై॒ సర్వ॑స్య॒ జిత్త్యై॒ సర్వ॑మే॒వ తేనా᳚ప్నోతి॒ సర్వం॑ జయతి ॥
ఓం శాంతిః॒ శాంతిః॒ శాంతిః॑ ॥