స్కంద ఉవాచ ।
యోగీశ్వరో మహాసేనః కార్తికేయోఽగ్నినందనః ।
స్కందః కుమారః సేనానీః స్వామీ శంకరసంభవః ॥ 1 ॥
గాంగేయస్తామ్రచూడశ్చ బ్రహ్మచారీ శిఖిధ్వజః ।
తారకారిరుమాపుత్రః క్రౌంచారిశ్చ షడాననః ॥ 2 ॥
శబ్దబ్రహ్మసముద్రశ్చ సిద్ధః సారస్వతో గుహః ।
సనత్కుమారో భగవాన్ భోగమోక్షఫలప్రదః ॥ 3 ॥
శరజన్మా గణాధీశపూర్వజో ముక్తిమార్గకృత్ ।
సర్వాగమప్రణేతా చ వాంఛితార్థప్రదర్శనః ॥ 4 ॥
అష్టావింశతినామాని మదీయానీతి యః పఠేత్ ।
ప్రత్యూషే శ్రద్ధయా యుక్తో మూకో వాచస్పతిర్భవేత్ ॥ 5 ॥
మహామంత్రమయానీతి మమ నామానుకీర్తనమ్ ।
మహాప్రజ్ఞామవాప్నోతి నాత్ర కార్యా విచారణా ॥ 6 ॥
ఇతి శ్రీరుద్రయామలే ప్రజ్ఞావివర్ధనాఖ్యం శ్రీమత్కార్తికేయస్తోత్రమ్ ॥