తాత్విక పద్యాలు

1. ఏ కాలమందు ఏ దేహమందు

ఏ కాలమందు, ఏ దేశమందు, ఏ వేషమందున జీవించు

సోహం హంస, సోహం హంస, సోహం హంస భావించు - 2

ఏ గ్రామమందు, ఏ ధామ మందు, ఏ కర్మ మందున జీవించు

నాహం కర్త, నాహం కర్త, నాహం కర్త భావించు - 2

ఏ రోగమందు, ఏ భోగమందు, ఏ యోగమందున జీవించు

నాహం భోక్త, నాహం భోక్త, నాహం భోక్త భావించు - 2

ఏ కాలమందు, ఏ దేశమందు, ఏ వేషమందున జీవించు

సోహం హంస, సోహం హంస, సోహం హంస భావించు

బ్రహ్మము మాత్రమే సత్యమురా

ఈ జీవులు జగము స్వప్నమురా - 2

సృష్టికి పూర్వము పరబ్రహ్మం

వ్యష్టి సమిష్టులు లేని సత్యం - 2

ఏకమై నిర్లోకమై - 2 వెలుగొందెను

బ్రహ్మము మాత్రమే సత్యమురా

ప్రళయము నందున సర్వము

పరమున విలయము నొందగా

పరబ్రహ్మమే పరిపూర్ణమై వెలుగొందును

బ్రహ్మము మాత్రమే సత్యమురా

ఇప్పుడు తోచెడి భేదము

ఈశ జగములు జీవులు - 2

సర్వ శూన్యమే, స్వప్న తుల్యమే కావా?

బ్రహ్మము మాత్రమే సత్యమురా

జాగ్రత తోచు వస్తువులు

స్వప్న సుషుప్తుల లేవుగా - 2

అవి యెల్లను కన కల్లయే కావా? - 2

బ్రహ్మము మాత్రమే సత్యమురా

నిఖిలము లీనము చెందగా

నిదురలో మిగిలిన సత్యమే - 2

ఆనందమై నిర్బంధమై స్ఫురియించును - 2

బ్రహ్మము మాత్రమే సత్యమురా

మూడవస్థల మారని తెలివి

మూడు తనువుల మారని ఉనికి - 2

ఆ స్ఫూర్తియే సన్మూర్తియే నేనైతిని - 2

బ్రహ్మము మాత్రమే సత్యమురా

ఈ జీవులు జగము స్వప్నమురా

ఈ జీవులు జగము

2. ఏదేమైతే బెదురేమున్నది...

ఏదేమైతే బెదురేమున్నది?

ఎరిగిన శ్రీ గురుదాసులకు - 2

దాసులకు గురుదాసులకు

బోధానంద విలాసులకు

ఏదేమైతే బెదురేమున్నది?

ఎరిగిన శ్రీ గురుదాసులకు

నీరు క్రమ్మినను, నిప్పు చెలగినను,

నింగి నేల ఏకమైనను

మారునదంతయు స్వప్నతుల్యమని

సారమెరింగిన ధీరులకు

ఏదేమైతే బెదురేమున్నది?

జనములు ధనములు నష్టమైనను

జగమున బహు అవమానమైనను -2

ఘనమగు తెలివికి లోపము లేదని

కలవరమందని ప్రాజ్ఞులకు

ఏదేమైతే బెదురేమున్నది?

తినుటకు ఏమియును దొరుకకున్నను

తీవ్రరోగములు కలచుచున్నను - 2

తనువు దుఃఖములు తనకు తగులవని

తత్వమరయు సత్పురుషలకు

ఏదేమైతే బెదురేమున్నది?

ఎరిగిన శ్రీ గురుదాసులకు

వాదభేదముల విధమును వీడి

సాధన పథమున సాగుచును - 2

వేదాంతర్థమును సదా హృదయమున

విమర్శించు విజ్ఞానులకు

ఏదేమైతే బెదురేమున్నది?

ఎరిగిన శ్రీ గురుదాసులకు - 2

3. ఏమి హాయి ఏమి హాయి

ఏమి హాయి ఏమి హాయి

మరణభయము మాపగలుగు

మార్గ మెరుగలేని వేళ

అభయమిచ్చు ప్రభుడు గురుడు

అరువు తెంచి తెరువు చూప

ఏమి హాయి ఏమి హాయి

కుమతి లోకుల కూటమి నందు

చింతలెన్నో చెంది చెంది

బ్రహ్మవిదుల సంఘమునందు

పరమతత్త్వము నెరుగువేళ

ఏమి హాయి ఏమి హాయి

దేహమందు మోహమంది

శాంతి విడిన సమయమందు

దేహమందు మోహమంది

శాంతి విడిన సమయమందు

తనువు నేను కాదనుచును

తరచి తరచి చూచినంత

ఏమి హాయి ఏమి హాయి

దృశ్యమందు ద్వేషరాగ

భయములందు సమయమందు

చూడబడెడి భేదమంతా

శూన్యమనుచు తెలిసినంతా

ఏమి హాయి ఏమి హాయి

నీదినాదను భేద దృష్టిచే

బాధలెన్నో పొంది పొంది

అదియు ఇదియు నేనే యనుచు

తుదకు తెలిసినట్టివేళ

ఏమి హాయి ఏమి హాయి

జనన మరణ చక్రమునందు

తెంపులేక తిరిగి తిరిగి

చివరిజన్మము ఇదియె అనుచు

స్వానుభవము కలిగినంత

చివరిజన్మ మిదియె అనుచు

స్వానుభవము కలిగినంత

ఏమి హాయి ఏమి హాయి

4. ఎందెందో తిరిగేవు, ఎంతెంతో వెదికేవు...

ఎందెందో తిరిగేవు, ఎంతెంతో వెదికేవు

నీయందె ఉన్నదే మనసా

వెదికేది నీయందె ఉన్నదే మనసా

సుఖము నీయందె ఉన్నదే మనసా !!

|| ఎందెందో తిరిగేవు ||

విషయాలలో సుఖము వెదకులాడుచు నీవు

వెర్రివై తిరిగేవు మనసా

కారణము లేకయే గాఢనిదురలొ నీకు

ఘనసుఖము కలుగదా మనసా !!

|| ఎందెందో తిరిగేవు ||

దేహమందున దూరి దేహమే నేననుచు

దీనతను చెందేవు మనసా

కట్టెలతో కాల్చేటి కాయంబుతో పొత్తు

కష్టాలనే తెచ్చు మనసా !!

|| ఎందెందో తిరిగేవు ||

నేను నేనంటావు, నాది నాదంటావు

నేనెవరో చూడవే మనసా

నిను నీవు తెలియక, నిఖిలమ్ము పొందిన

నిశ్చింత కలుగదే మనసా !!

|| ఎందెందో తిరిగేవు ||

ఏదో చేయాలనుచు ఏదో పొందాలనుచు

ఎందుకే తాపంబు మనసా

నిఖిలమ్ము వర్జించి నిశ్చలత చెందుటే

నిజమైన సుఖమౌను మనసా !!

|| ఎందెందో తిరిగేవు ||

5. జాగు చేయగనేల ఓ జీవ ...

జాగు చెయగనేల ఓ జీవ, వేగ సాధన చేయు ఓ జీవ !

ఇంటి యందున పెద్దనిధి ఉన్నదని తెలియ

వెంట వెంటనె త్రొవ్వి వెలితీయ బోవ

నీయందునే బ్రహ్మసుఖమున్నదని తెలుప

నిష్టతో దానికై శోధింప లేవా

|| జాగు ||

క్రూర రోగము చేత కుములు చుండెడి వాడు

కోరి ఘన వైద్యుని చేరువకు పోడా

సంసార దుఃఖమున సతమతంబగు నీవు

సత్వరమే సద్గురుని చేరంగ లేవా

|| జాగు ||

శత్రుబాధల చేత తల్లడిల్లెడివాడు

సరగున మిత్రులను దరిచేర బోడ

భవ దుఃఖమభివృద్ధి పరచు లోకులను వీడి

భద్రముగ సత్సంగమందుండలేవా

|| జాగు ||

వెదకి మన పెరటిలో విషపు మొక్కల పీకి

మంచి మొక్కల నెంచి మరిపెంచుకోమా

మనయందె యున్నట్టి మలినముల పొగొట్టి

సద్వాసనల పెంచుశ్రమచేయకోవా || జాగు ||

మరణ మొచ్చిన వేళ, మమతలను సంపదలను వీడి

ఎచటికో ఒంటరిగ పోవా

అన్నిటిని ఇప్పుడే త్యాగంబు చేసినచో

పరమపదమును చేరు భాగ్యంబు రాదా || జాగు ||

జాగు చెయగనేల ఓ జీవ,

వేగ సాధన చేయు ఓ జీవ !

6, జయము జయము బ్రహ్మవిద్య

జయము జయము బ్రహ్మవిద్య జనయిత్రి జ్ఞానదాత్రి

జయ జయహే ఆశ్రితజన జననమరణ సంహర్త్రి

జయము జయము బ్రహ్మవిద్య జనయిత్రి జ్ఞానదాత్రి

గృహము నీకు వేదాంతము, గీతలు క్రీడాస్థలము

పరిపరి శాస్త్రములు నీ పరిచారికులైన జనము

అఖిల విద్యలకును నీవు అంతిమ గమ్యము

భవరోగికి నీ సేవ ప్రాణమిచ్చు వైద్యము

జయము జయము బ్రహ్మవిద్య జనయిత్రి జ్ఞానదాత్రి

నారాయణుడాదిగా నాగురువుల వరకును

పెక్కు బ్రహ్మవిదులు నిన్ను చక్కగ పోషింపగా...

పలుజన్మల పుణ్యంబులు ఫలియించిన వత్తువూ

గురుకరుణను చేరువై పరమపదము నిత్తువూ

జయము జయము బ్రహ్మవిద్య జనయిత్రి జ్ఞానదాత్రి

సురలు, నరులు, ఋషులు నిన్ను విరివిగా సేవింతురు

నీ పాలను త్రావి తల్లి నిత్య తృప్తులౌదురు

నిఖిల సిద్ధ సాధకులును నీరాజనమేడెదరు

మంగళమని మంగళమని మంగళమని పాడెదరు

జయము జయము బ్రహ్మవిద్య జనయిత్రి జ్ఞానదాత్రి

జయజయహే ఆశ్రిత జన జననమరణ సంహర్త్రి

జయము జయము

7. కలవంటిది కల్ల జగమిది

కల వంటిది కల్ల జగమిది, కల వంటిది కల్ల జగమిది

తెలివి కనులు తెరిచి చూడ, క్షణమందే కరుగునది

|| కల వంటిది కల్ల జగమిది ||

ఉన్నదనే భావనచే ఉండునట్టిది

ఉనికేదని తరచిచూడ ఉత్తదైపోవునది

నిమిషమైన ఒకరీతి నిలకడే లేనిది

అసలు రూపమునకు వెనుక అంతు చిక్కనట్టిది

|| కల వంటిది కల్ల జగమిది ||

సంకల్పముకన్న వేరు సత్వమే లేనిది

తలపులాపినంతనే విలయమై పోవునది

|| కల వంటిది కల్ల జగమిది ||

జాగ్రతందు ఒకపగిది, స్వప్నమందు ఒక పగిది

మారుచుండు నట్టిది, మాయకాక ఏమిది ?

|| కల వంటిది కల్ల జగమిది ||

చిత్ర చిత్ర గతుల తోడ చింతపెట్టు నట్టిది

ఇంత కునుకు పట్టినంత ఇగిరి పోవునట్టిది

|| కల వంటిది కల్ల జగమిది ||

ఉన్నదంత ఒక్కటనుచు ఉపనిషత్తు అన్నది

నామ రూప దృష్టి పోవ నానాత్వము వట్టిది

|| కల వంటిది కల్ల జగమిది ||

కల వంటిది కల్ల జగమిది తెలివి కనులు తెరిచి చూడ,

క్షణమందే కరుగునది కల వంటిది కల్ల జగమిది

|| కల వంటిది కల్ల జగమిది... !!

8. కర్మములవియే జరుగుతు వుంటే...

కర్మములవియే జరుగుతు వుంటే

కర్తను నేనను భ్రమయేల

మర్మము తెలియక కర్మబంధమున

మరలా మరలా పడిపోనేలా

కాళ్ళు చేతులు కదులుతూ వుంటే

కదిలితినే ననుకోనేలా?

కళ్ళు చెవులు కాంచుతు వుంటే

కాంచితినే ననుకోనేలా?

ప్రాణము బొందిని నిలబెడుతుంటే

బ్రతుకుదు నేననుకోనేలా?

తలపులు మనసున పుడుతూ వుంటే

తలచితినే ననుకోనేలా?

సంకల్పంబులు, వికల్పంబులు

సంశయ నిర్ణయ వికారముల్‌

అంతరంగమున ఉబుకుతుంటే

అవి నావే యనుకోనేలా?

అన్ని తలపులు వాటికి అవియే

అశేషంబుగ పుడుతూ వుంటే

చేయవలెయునను ఇచ్ఛ మాత్రము

నా ఆధీనమనుకోనేలా?

సకల చరాచర విశ్వంబంతా

స్వప్నము వంటిది అయివుంటే

నేనునేనను అహంకారము

నిక్కంబని అనుకోనేలా?

ప్రకృతి ఈశ్వర నియమము చేత

ప్రపంచంబును నడుపుతూ వుంటే

పనులు చేయుటకు స్వాతంత్ర్యమ్ము

తనకు కలదనుకోనేలా

శ్రీగురు కృపచే సాధన జరిగితే

చేసితినే ననుకోనేలా

పాటలు చిత్‌గగనంబున పుడితే

పాడితినే ననుకోనేలా?

కర్మములవియే జరుగుతు వుంటే

కర్తను నేనను భ్రమయేల?

9. మేలుకొనుడీ మనుజులారా

మేలుకొనుడీ మనుజులారా ! మేలుకొనుడీ మిత్రులారా !

మేలుకొనుడీ అమృతత్వపు మిగులచక్కని పుత్రులారా !!

|| మేలుకొనుడీ ||

అఖిల జీవుల యందు నరులకె ఆత్మవిద్యకు అర్హతందురు

అట్టి జన్మము ఎత్తి ఆయువు వ్యర్థపరచుచు తిరుగనేల ?

|| మేలుకొనుడీ ||

జగతి యందలి భ్రమలు బాధలు జనన మరణములన్ని కలలు

తనను తాను తెలియకుండుటె తలచి చూచిన పెద్ద నిదుర

|| మేలుకొనుడీ ||

నిదుర మీరు లేవరేమి ? నిజసుఖంబును పొందరేమి ?

మీదు మిక్కిలి దేవతలకును మేలుకొలుపులు అందురేమీ ?

|| మేలుకొనుడీ ||

ఏమి సారము ? ఎందుకలదు ? ఏల విసుగును చెందలేదు ?

పీడకలల పాడు నిదురను వీడి బ్రహ్మగ మేలుకొనుడి !!

|| మేలుకొనుడీ ||

అమృతత్వపు పుత్రులారా ! అనుచు వేదము పిలుచుచుండు

మేలుకొనుడీ, మేలుకొనుడీ మీది హక్కును కోరుకొనుడీ ||

|| మేలుకొనుడీ ||

10. నీలోన వెలుగు నాలోన వెలుగు

నీలోన వెలుగు నాలోన వెలుగు

నిఖిలభూతములందు నిలుచు ఒక వెలుగు

నీలోన వెలుగు నాలోన వెలుగు

నిఖిలభూతములందు నిలుచు ఒక వెలుగు

అవని యందున వెలుగు ఆకసంబున వెలుగు

అఖిల జ్యోతులలో వెలుగు అంధకారమున వెలుగు

నీలోన వెలుగు నాలోన వెలుగు

జడము నందున వెలుగు చైతన్యమున వెలుగు

చలనమందున వెలుగు స్థావరంబుల వెలుగు

నీలోన వెలుగు నాలోన వెలుగు

అల్పమందున వెలుగు అధికమందున వెలుగు

అంతటా ఒక రీతి అంటిఅంటని వెలుగు

నీలోన వెలుగు

ముందు వెనుకల వెలుగు క్రింద మీదను వెలుగు

అంతరాయములేక అంతటా ఒక వెలుగు

నీ లోన వెలుగు నా లోన వెలుగు

సంకల్పమున వెలుగు సంధియందున వెలుగు

సుక్తి యందున వెలుగు శూన్యమందున వెలుగు

నీలోన వెలుగు

బ్రతుకునందున వెలుగు బాధలందున వెలుగు

మంచిచెడులను వెలుగు మరణమందున వెలుగు

నీలోన వెలుగు

భగవంతునిలో వెలుగు భక్తులందున వెలుగు

యెదలో నిండిన వెలుగు ఎన్నడారని వెలుగు

నీలోన వెలుగు నాలోన వెలుగు

నిఖిలభూతములందు నిలుచు ఒక వెలుగు

11. అసంగోహం అసంగోహం

అసంగోహం అసంగోహం అసంగోహం పునః పునః

కోటి జీవులు కోటి వస్తువులు

కోటి ఘటనలు కోటి భ్రమలు

కల యందున వలె కదలుచుండగ

కదల కుండగ కాంచు సాక్షి

||అసంగోహం ||

కోటి ఊహలు కోటి చింతలు

కోటి ఇంద్రియ జ్ఞానములు

చిత్తమందున చెలగి అణగుచు

శూన్యమగుటను చూచు సాక్షి

||అసంగోహం ||

కోటి బాధలు కోటి సుఖములు

కోటి కోటి వికారములు

ఎన్ని వచ్చిన ఎన్ని పోయిన

ఏమి మారక ఎరుగు సాక్షి

||అసంగోహం ||

క్షణము క్షణము గడచి పోవుచు

గతమునందున కలియు చుండగ

కాలమొక సంకల్పమాత్రమై

తరలి పోవగ కాంచు సాక్షి

||అసంగోహం ||

సకల భావనల సాక్షిగ చూచుచు,

సాక్షి భావనకును సాక్షిగ యగుచు

సాక్షిని నేనను సన్నని అహమిక

సమసిన ఉండెడి సాక్ష్యతీతము

అసంగోహం అసంగోహం అసంగోహం పునః పునః

12. కౌపీనవంతుడే కదా భాగ్యవంతుడు

వేదాంత వాక్యముల రమియించుచుండు

భిక్షాన్నమాత్రమున సంతుష్ఠినుండు

శోకంబు లేకుండు కరుణతో నిండు

కౌపీనవంతుడే కదా భాగ్యవంతుడు

ఏ చెట్టుమూలనో నివసించుచుండు

అరచేతిలో భిక్ష భుజియించుచుండు

ఏ చెట్టుమూలనో నివసించుచుండు

అరచేతిలో భిక్ష భుజియించుచుండు

బొంతనైనను స్త్రీవలె దూరముగ నుంచు

కౌపీనవంతుడే కదా భాగ్యవంతుడు

దేహాభిమానంబు వర్జించి ఉండు

ఆత్మయందాత్మను వీక్షించుచుండు

రేపవలు బ్రహ్మమున రమియించుచుండు

కౌపీనవంతుడే కదా భాగ్యవంతుడు

ఆత్మసుఖమును పొంది సంతుష్ఠితోనుండు

ఇంద్రియముల ప్రవృత్తులణగారి ఉండు

అంతర్ బహిర్ విషయ స్మరణ లేకుండు

కౌపీనవంతుడే కదా భాగ్యవంతుడు

పంచాక్షరంబులను జపియించుచుండు

హృదయమున పశుపతిని భావించుచుండు

భిక్షగొనుచు దిశలు తిరుగాడుచుండు

కౌపీనవంతుడే కదా భాగ్యవంతుడు

13. ఊరకుంటే సుఖము వుంటే

కోరి కర్మల ఉచ్చులందు చేరనేల?

మనసా! దుఃఖమందు దూరనేల?

అచలముగా తాను వుంటే

అవధిలేని సుఖము వుంటే

అచలముగా తాను వుంటే

అవధిలేని సుఖము వుంటే

అవధిలేని సుఖము నందు

హాయిగాను నిలిచి పోక

సతత మేదో చేయగాను

సతమతంబై పోవనేల?

మనసా! దుఃఖమందు దూరనేల

ఊరకుంటే సుఖము వుంటే

కోరి కర్మల ఉచ్చులందు చేరనేల?

కోరికేదో రేగినంత

తీరు వరకు తాపమేనూ !

కోరికేదో రేగినంత

తీరు వరకు తాపమేనూ !

తీరినంత కలుగును హాయి

వేరుకాదు తనదు సుఖమే

ఇచ్ఛలే మరి లేకపోతే...

ఇచ్ఛలే మరి లేకపోతే

ఎల్ల వేళల సుఖమే కాదా?

మనసా! ఎల్ల వేళల సుఖమే కాదా?

ఊరకుంటే సుఖము వుంటే...

తోచునట్టివాని వలన

చూచువానికి హాని లేదు

చూడ చూడగ దృశ్యంబంతా

శూన్యమే అయిపోవదా

చూడ చూడగ దృశ్యంబంతా

శూన్యమే అయిపోవదా

కాంచు వానిగా నిలిచి వుంటే

కల్ల జగమేమైతే నేమీ?

ఊరకుంటే, సుఖము వుంటే..

ఈశ్వరుని లీల చేత

విశ్వమంతా నడచుచుంటే

ఈశ్వరుని లీల చేత

విశ్వమంతా నడచుచుంటే

కర్తనేనని భ్రమనుచెంది

కష్టములలో చిక్కనేల?

చేయువాడవు కాకపోతే...

చేయువాడవు కాకపోతే

చేయుబాధ్యత మోయనేల?

చేయువాడవు కాకపోతే

చేయుబాధ్యత మోయనేల?

మనసా! దుఃఖమందు దూరనేల?

అడవి వంటి శాస్త్రములలో

అంతులేని సాధనలతో...

అడవి వంటి శాస్త్రములలో

అంతులేని సాధనలతో

ఏదో నేర్చి, ఏదో చేసి

ఎన్నడింక సుఖియించెదవు?

ఏదో నేర్చి, ఏదో చేసి

ఎన్నడింక సుఖియించెదవు?

సుఖతరంబు ఈ విహంగ మార్గము

సులభము కాదా గురుదాసులకు

ఊరకుంటే సుఖము వుంటే

కోరి కర్మల ఉచ్చులందు చేరనేల

మనసా! దుఃఖమందు దూరనేల?

ఊరకుంటే సుఖము వుంటే

కోరి కర్మల ఉచ్చులందు చేరనేల?

14. తెలిసి మౌనము పూనవె చిలిపి మనస

తెలిసి .. ..

మౌనము పూనవె .. ..

చిలిపి మనస !

1. తెలివియను తెరయందున తీరకుండ

జగము మాయ బొమ్మల వోలె జరుగుచుండ

తెలివికిని వేరుగ నీవుకల్గుటెట్లు?