ಶ್ರೀಗಣೇಶಾಯ ನಮಃ ..
ಕತ್ಯಕ್ಷೀಣಿ ಕರೋಟಯಃ ಕತಿ ಕತಿ ದ್ವೀಪಿದ್ವಿಪಾನಾಂ ತ್ವಚಃ
ಕಾಕೋಲಾಃ ಕತಿ ಪನ್ನಗಾಃ ಕತಿ ಸುಧಾಧಾಮ್ನಶ್ಚ ಖಂಡಾ ಕತಿ .
ಕಿಂ ಚ ತ್ವಂ ಚ ಕತಿ ತ್ರಿಲೋಕಜನನಿತ್ವದ್ವಾರಿಪೂರೋದರೇ
ಮಜ್ಜಜ್ಜಂತುಕದಂಬಕಂ ಸಮುದಯತ್ಯೇಕೈಕಮಾದಾಯ ಯತ್ .. 1..
ದೇವಿ ತ್ವತ್ಪುಲಿನಾಂಗಣೇ ಸ್ಥಿತಿಜುಷಾಂ ನಿರ್ಮಾನಿನಾಂ ಜ್ಞಾನಿನಾಂ
ಸ್ವಲ್ಪಾಹಾರನಿಬದ್ಧಶುದ್ಧವಪುಷಾಂ ತಾರ್ಣಂ ಗೃಹಂ ಶ್ರೇಯಸೇ .
ನಾನ್ಯತ್ರ ಕ್ಷಿತಿಮಂಡಲೇಶ್ವರಶತೈಃ ಸಂರಕ್ಷಿತೋ ಭೂಪತೇಃ
ಪ್ರಾಸಾದೋ ಲಲನಾಗಣೈರಧಿಗತೋ ಭೋಗೀಂದ್ರಭೋಗೋನ್ನತಃ .. 2..
ತತ್ತತ್ತೀರ್ಥಗತೈಃ ಕದರ್ಥನಶತೈಃ ಕಿಂ ತೈರನರ್ಥಾಶ್ರಿತೈ-
ರ್ಜ್ಯೋತಿಷ್ಟೋಮಮುಖೈಃ ಕಿಮೀಶವಿಮುಖೈರ್ಯಜ್ಞೈರವಜ್ಞಾದ್ದತೈ .
ಸೂತೇ ಕೇಶವವಾಸವಾದಿವಿಬುಧಾಗಾರಾಭಿರಾಮಾಂ ಶ್ರಿಯಂ ಗಂಗೇ
ದೇವಿ ಭವತ್ತಟೇ ಯದಿ ಕುಟೀವಾಸಃ ಪ್ರಯಾಸಂ ವಿನಾ .. 3..
ಗಂಗಾತೀರಮುಪೇತ್ಯ ಶೀತಲಶಿಲಾಮಾಲಂಬ್ಯ ಹೇಮಾಚಲೀಂ
ಯೈರಾಕರ್ಣಿ ಕುತೂಹಲಾಕುಲತಯಾ ಕಲ್ಲೋಲಕೋಲಾಹಲಃ .
ತೇ ಶೃಣ್ವಂತಿ ಸುಪರ್ವಪರ್ವತಶಿಲಾಸಿಂಹಾಸನಾಧ್ಯಾಸನಾಃ
ಸಂಗೀತಾಗಮಶುದ್ಧಸಿದ್ಧರಮಣೀಮಂಜೀರಧೀರಧ್ವನಿಂ .. 4..
ದೂರಂ ಗಚ್ಛ ಸಕಚ್ಛಗಂ ಚ ಭವತೋ ನಾಲೋಕಯಾಮೋ
ಮುಖಂ ರೇ ಪಾರಾಕ ವರಾಕ ಸಾಕಮಿತರೈರ್ನಾಕಪ್ರದೈರ್ಗಮ್ಯತಾಂ .
ಸದ್ಯಃ ಪ್ರೋದ್ಯತಮಂದಮಾರುತರಜಃಪ್ರಾಪ್ತಾ ಕಪೋಲಸ್ಥಲೇ
ಗಂಗಾಂಭಃಕಣಿಕಾ ವಿಮುಕ್ತಗಣಿಕಾಸಂಗಾಯ ಸಂಭಾವ್ಯತೇ .. 5..
ವಿಷ್ಣೋಃ ಸಂಗತಿಕಾರಿಣೀ ಹರಜಟಾಜೂಟಾಟವೀಚಾರಿಣೀ
ಪ್ರಾಯಶ್ಚಿತ್ತನಿವಾರಿಣೀ ಜಲಕಣೈಃ ಪುಣ್ಯೌಧವಿಸ್ತಾರಿಣೀ .
ಭೂಭೃತ್ಕಂದರದಾರಿಣೀ ನಿಜಜಲೇ ಮಜ್ಜಜ್ಜನೋತ್ತಾರಿಣೀ
ಶ್ರೇಯಃ ಸ್ವರ್ಗವಿಹಾರಿಣೀ ವಿಜಯತೇ ಗಂಗಾ ಮನೋಹಾರಿಣೀ .. 6..
ವಾಚಾಲಂ ವಿಕಲಂ ಖಲಂ ಶ್ರಿತಮಲಂ ಕಾಮಾಕುಲಂ ವ್ಯಾಕುಲಂ
ಚಾಂಡಾಲಂ ತರಲಂ ನಿಪೀತಗರಲಂ ದೋಷಾವಿಲಂ ಚಾಖಿಲಂ .
ಕುಂಭೀಪಾಕಗತಂ ತಮಂತಕಕರಾದಾಕೃಷ್ಯ ಕಸ್ತಾರಯೇನ್-
ಮಾತರ್ಜಹ್ನುನರೇಂದ್ರನಂದಿನಿ ತವ ಸ್ವಲ್ಪೋದಬಿಂದುಂ ವಿನಾ .. 7..
ಶ್ಲೇಷಮಶ್ಲೇಷಣಯಾನಲೇಽಮೃತಬಿಲೇ ಶಾಕಾಕುಲೇ ವ್ಯಾಕುಲೇ
ಕಂಠೇ ಘರ್ಘರಘೋಷನಾದಮಲಿನೇ ಕಾಯೇ ಚ ಸಮ್ಮೀಲತಿ .
ಯಾಂ ಧ್ಯಾಯನ್ನ್ಪಿ ಭಾರಭಂಗುರತರಾಂ ಪ್ರಾಪ್ನೋತಿ ಮುಕ್ತಿಂ ನರಃ
ಸ್ನಾತುಶ್ವೇತಸಿ ಜಾಹ್ನ್ವೀ ನಿವಸತಾಂ ಸಂಸಾರಸಂತಾಪಹೃತ್ .. 8..
ಇತಿ ಶ್ರೀಮತ್ಕಾಲಿದಾಸವಿರಚಿತಂ ಗಂಗಾಷ್ಟಕಸ್ತೋತ್ರಂ ಸಂಪೂರ್ಣಂ ..