ஶ்ரீக³ணேஶாய நம꞉ ..
கத்யக்ஷீணி கரோடய꞉ கதி கதி த்³வீபித்³விபானாம்ʼ த்வச꞉
காகோலா꞉ கதி பன்னகா³꞉ கதி ஸுதா⁴தா⁴ம்னஶ்ச க²ண்டா³ கதி .
கிம்ʼ ச த்வம்ʼ ச கதி த்ரிலோகஜனனித்வத்³வாரிபூரோத³ரே
மஜ்ஜஜ்ஜந்துகத³ம்ப³கம்ʼ ஸமுத³யத்யேகைகமாதா³ய யத் .. 1..
தே³வி த்வத்புலினாங்க³ணே ஸ்தி²திஜுஷாம்ʼ நிர்மானினாம்ʼ ஜ்ஞானினாம்ʼ
ஸ்வல்பாஹாரநிப³த்³த⁴ஶுத்³த⁴வபுஷாம்ʼ தார்ணம்ʼ க்³ருʼஹம்ʼ ஶ்ரேயஸே .
நான்யத்ர க்ஷிதிமண்ட³லேஶ்வரஶதை꞉ ஸம்ʼரக்ஷிதோ பூ⁴பதே꞉
ப்ராஸாதோ³ லலநாக³ணைரதி⁴க³தோ போ⁴கீ³ந்த்³ரபோ⁴கோ³ன்னத꞉ .. 2..
தத்தத்தீர்த²க³தை꞉ கத³ர்த²னஶதை꞉ கிம்ʼ தைரனர்தா²ஶ்ரிதை-
ர்ஜ்யோதிஷ்டோமமுகை²꞉ கிமீஶவிமுகை²ர்யஜ்ஞைரவஜ்ஞாத்³த³தை .
ஸூதே கேஶவவாஸவாதி³விபு³தா⁴கா³ராபி⁴ராமாம்ʼ ஶ்ரியம்ʼ க³ங்கே³
தே³வி ப⁴வத்தடே யதி³ குடீவாஸ꞉ ப்ரயாஸம்ʼ வினா .. 3..
க³ங்கா³தீரமுபேத்ய ஶீதலஶிலாமாலம்ப்³ய ஹேமாசலீம்ʼ
யைராகர்ணி குதூஹலாகுலதயா கல்லோலகோலாஹல꞉ .
தே ஶ்ருʼண்வந்தி ஸுபர்வபர்வதஶிலாஸிம்ʼஹாஸனாத்⁴யாஸனா꞉
ஸங்கீ³தாக³மஶுத்³த⁴ஸித்³த⁴ரமணீமஞ்ஜீரதீ⁴ரத்⁴வனிம் .. 4..
தூ³ரம்ʼ க³ச்ச² ஸகச்ச²க³ம்ʼ ச ப⁴வதோ நாலோகயாமோ
முக²ம்ʼ ரே பாராக வராக ஸாகமிதரைர்னாகப்ரதை³ர்க³ம்யதாம் .
ஸத்³ய꞉ ப்ரோத்³யதமந்த³மாருதரஜ꞉ப்ராப்தா கபோலஸ்த²லே
க³ங்கா³ம்ப⁴꞉கணிகா விமுக்தக³ணிகாஸங்கா³ய ஸம்பா⁴வ்யதே .. 5..
விஷ்ணோ꞉ ஸங்க³திகாரிணீ ஹரஜடாஜூடாடவீசாரிணீ
ப்ராயஶ்சித்தநிவாரிணீ ஜலகணை꞉ புண்யௌத⁴விஸ்தாரிணீ .
பூ⁴ப்⁴ருʼத்கந்த³ரதா³ரிணீ நிஜஜலே மஜ்ஜஜ்ஜனோத்தாரிணீ
ஶ்ரேய꞉ ஸ்வர்க³விஹாரிணீ விஜயதே க³ங்கா³ மனோஹாரிணீ .. 6..
வாசாலம்ʼ விகலம்ʼ க²லம்ʼ ஶ்ரிதமலம்ʼ காமாகுலம்ʼ வ்யாகுலம்ʼ
சாண்டா³லம்ʼ தரலம்ʼ நிபீதக³ரலம்ʼ தோ³ஷாவிலம்ʼ சாகி²லம் .
கும்பீ⁴பாகக³தம்ʼ தமந்தககராதா³க்ருʼஷ்ய கஸ்தாரயேன்-
மாதர்ஜஹ்னுனரேந்த்³ரனந்தி³னி தவ ஸ்வல்போத³பி³ந்து³ம்ʼ வினா .. 7..
ஶ்லேஷமஶ்லேஷணயானலே(அ)ம்ருʼதபி³லே ஶாகாகுலே வ்யாகுலே
கண்டே² க⁴ர்க⁴ரகோ⁴ஷநாத³மலினே காயே ச ஸம்மீலதி .
யாம்ʼ த்⁴யாயன்ன்பி பா⁴ரப⁴ங்கு³ரதராம்ʼ ப்ராப்னோதி முக்திம்ʼ நர꞉
ஸ்னாதுஶ்வேதஸி ஜாஹ்ன்வீ நிவஸதாம்ʼ ஸம்ʼஸாரஸந்தாபஹ்ருʼத் .. 8..
இதி ஶ்ரீமத்காலிதா³ஸவிரசிதம்ʼ க³ங்கா³ஷ்டகஸ்தோத்ரம்ʼ ஸம்பூர்ணம் ..