മാതഃ ശൈലസുതാ-സപത്നി വസുധാ-ശൃംഗാരഹാരാവലി
സ്വർഗാരോഹണ-വൈജയന്തി ഭവതീം ഭാഗീരഥീം പ്രാർഥയേ .
ത്വത്തീരേ വസതഃ ത്വദംബു പിബതസ്ത്വദ്വീചിഷു പ്രേംഖതഃ
ത്വന്നാമ സ്മരതസ്ത്വദർപിതദൃശഃ സ്യാന്മേ ശരീരവ്യയഃ .. 1..
ത്വത്തീരേ തരുകോടരാന്തരഗതോ ഗംഗേ വിഹംഗോ പരം
ത്വന്നീരേ നരകാന്തകാരിണി വരം മത്സ്യോഽഥവാ കച്ഛപഃ .
നൈവാന്യത്ര മദാന്ധസിന്ധുരഘടാസംഘട്ടഘണ്ടാരണ-
ത്കാരസ്തത്ര സമസ്തവൈരിവനിതാ-ലബ്ധസ്തുതിർഭൂപതിഃ .. 2..
ഉക്ഷാ പക്ഷീ തുരഗ ഉരഗഃ കോഽപി വാ വാരണോ വാഽ-
വാരീണഃ സ്യാം ജനന-മരണ-ക്ലേശദുഃഖാസഹിഷ്ണുഃ .
ന ത്വന്യത്ര പ്രവിരല-രണത്കിങ്കിണീ-ക്വാണമിത്രം
വാരസ്ത്രീഭിശ്ചമരമരുതാ വീജിതോ ഭൂമിപാലഃ .. 3..
കാകൈർനിഷ്കുഷിതം ശ്വഭിഃ കവലിതം ഗോമായുഭിർലുണ്ടിതം
സ്രോതോഭിശ്ചലിതം തടാംബു-ലുലിതം വീചീഭിരാന്ദോലിതം .
ദിവ്യസ്ത്രീ-കര-ചാരുചാമര-മരുത്സംവീജ്യമാനഃ കദാ
ദ്രക്ഷ്യേഽഹം പരമേശ്വരി ത്രിപഥഗേ ഭാഗീരഥീ സ്വം വപുഃ .. 4..
അഭിനവ-ബിസവല്ലീ-പാദപദ്മസ്യ വിഷ്ണോഃ
മദന-മഥന-മൗലേർമാലതീ-പുഷ്പമാലാ .
ജയതി ജയപതാകാ കാപ്യസൗ മോക്ഷലക്ഷ്മ്യാഃ
ക്ഷപിത-കലികലങ്കാ ജാഹ്നവീ നഃ പുനാതു .. 5..
ഏതത്താല-തമാല-സാല-സരലവ്യാലോല-വല്ലീലതാ-
ച്ഛത്രം സൂര്യകര-പ്രതാപരഹിതം ശംഖേന്ദു-കുന്ദോജ്ജ്വലം .
ഗന്ധർവാമര-സിദ്ധ-കിന്നരവധൂ-തുംഗസ്തനാസ്പാലിതം
സ്നാനായ പ്രതിവാസരം ഭവതു മേ ഗാംഗം ജലം നിർമലം .. 6..
ഗാംഗം വാരി മനോഹാരി മുരാരി-ചരണച്യുതം .
ത്രിപുരാരി-ശിരശ്ചാരി പാപഹാരി പുനാതു മാം .. 7..
പാപാപഹാരി ദുരിതാരി തരംഗധാരി
ശൈലപ്രചാരി ഗിരിരാജ-ഗുഹാവിദാരി .
ഝങ്കാരകാരി ഹരിപാദ-രജോപഹാരി
ഗാംഗം പുനാതു സതതം ശുഭകാരി വാരി .. 8..
ഗംഗാഷ്ടകം പഠതി യഃ പ്രയതഃ പ്രഭാതേ
വാല്മീകിനാ വിരചിതം ശുഭദം മനുഷ്യഃ .
പ്രക്ഷാല്യ ഗാത്ര-കലികല്മഷ-പങ്ക-മാശു
മോക്ഷം ലഭേത് പതതി നൈവ നരോ ഭവാബ്ധൗ .. 9..
.. ഇതി വാല്മീകിവിരചിതം ഗംഗാഷ്ടകം സമ്പൂർണം ..
Encoded and proofread by N.Balasubramanian bbalu@sify.com