ಶ್ರೀಗಣೇಶಾಯ ನಮಃ ..
ಸೂತ ಉವಾಚ --
ಶೃಣುಧ್ವಂ ಮುನಯಃ ಸರ್ವೇ ಗಂಗಾಸ್ತವಮನುತ್ತಮಂ .
ಶೋಕಮೋಹಹರಂ ಪುಂಸಾಮೃಷಿಭಿಃ ಪರಿಕೀರ್ತಿತಂ .. 1..
ಋಷಯ ಊಚುಃ --
ಇಯಂ ಸುರತರಂಗಿಣೀ ಭವನವಾರಿಧೇಸ್ತಾರಿಣೀ
ಸ್ತುತಾ ಹರಿಪದಾಂಬುಜಾದುಪಗತಾ ಜಗತ್ಸಂಸದಃ .
ಸುಮೇರುಶಿಖರಾಮರಪ್ರಿಯಜಲಾಮಲಕ್ಷಾಲಿನೀ
ಪ್ರಸನ್ನವದನಾ ಶುಭಾ ಭವಭಯಸ್ಯ ವಿದ್ರಾವಿಣೀ .. 2..
ಭಗೀರಥರಥಾನುಗಾ ಸುರಕರೀಂದ್ರದರ್ಪಾಪಹಾ
ಮಹೇಶಮುಕುಟಪ್ರಭಾ ಗಿರಿಶಿರಃಪತಾಕಾ ಸಿತಾ .
ಸುರಾಸುರನರೋರಗೈರಜಭವಾಚ್ಯುತೈಃ ಸಂಸ್ತುತಾ
ವಿಮುಕ್ತಿಫಲಶಾಲಿನೀ ಕಲುಷನಾಶಿನೀ ರಾಜತೇ .. 3..
ಪಿತಾಮಹಕಮಂಡಲುಪ್ರಭವಮುಕ್ತಿಬೀಜಾ ಲತಾ
ಶ್ರುತಿಸ್ಮೃತಿಗಣಸ್ತುತದ್ವಿಜಕುಲಾಲವಾಲಾವೃತಾ .
ಸುಮೇರುಶಿಖರಾಭಿದಾ ನಿಪತಿತಾ ತ್ರಿಲೋಕಾವೃತಾ
ಸುಧರ್ಮಫಲಶಾಲಿನೀ ಸುಖಪಲಾಶಿನೀ ರಾಜತೇ .. 4..
ಚರದ್ವಿಹಗಮಾಲಿನೀ ಸಗರವಂಶಮುಕ್ತಿಪ್ರದಾ
ಮುನೀಂದ್ರವರನಂದಿನೀ ದಿವಿ ಮತಾ ಚ ಮಂದಾಕಿನೀ .
ಸದಾ ದುರಿತನಾಶಿನೀ ವಿಮಲವಾರಿಸಂದರ್ಶನ-
ಪ್ರಣಾಮಗುಣಕೀರ್ತನಾದಿಷು ಜಗತ್ಸು ಸಂರಾಜತೇ .. 5..
ಮಹಾಭಿಷಸುತಾಂಗನಾ ಹಿಮಗಿರೀಶಕೂಟಸ್ತನಾ
ಸಫೇನಜಲಹಾಸಿನೀ ಸಿತಮರಾಲಸಚ್ಚಾರಿಣೀ .
ಚಲಲ್ಲಹರಿಸತ್ಕರಾ ವರಸರೋಜಮಾಲಾಧರಾ
ರಸೋಲ್ಲಸಿತಗಾಮಿನೀ ಜಲಧಿಕಾಮಿನೀ ರಾಜತೇ .. 6..
ಕ್ವಚಿನ್ಮುನಿಗಣೈಃ ಸ್ತುತಾ ಕ್ವಚಿದನಂತಸಂಪೂಜಿತಾ
ಕ್ವಚಿತ್ಕಲಕಲಸ್ವನಾ ಕ್ವಚಿದಧೀರಯಾದೋಗಣಾ .
ಕ್ವಚಿದ್ರವಿಕರೋಜ್ಜ್ವಲಾ ಕ್ವಚಿದುದಗ್ರಪಾತಾಕುಲಾ
ಕ್ವಚಿಜ್ಜನವಿಗಾಹಿತಾ ಜಯತಿ ಭೀಷ್ಮಮಾತಾ ಸತೀ .. 7..
ಸ ಏವ ಕುಶಲೀ ಜನಃ ಪ್ರಣಮತೀಹ ಭಾಗೀರಥೀಂ
ಸ ಏವ ತಪಸಾಂ ನಿಧಿರ್ಜಪತಿ ಜಾಹ್ನವೀಮಾದರಾತ್ .
ಸ ಏವ ಪುರುಷೋತ್ತಮಃ ಸ್ಮರತಿ ಸಾಧು ಮಂದಾಕಿನೀಂ
ಸ ಏವ ವಿಜಯೀ ಪ್ರಭುಃ ಸುರತರಂಗಿಣೀಂ ಸೇವತೇ .. 8..
ತವಾಮಲಜಲಾಚಿತಂ ಖಗಸೃಗಾಲಮೀನಕ್ಷತಂ
ಚಲಲ್ಲಹರಿಲೋಲಿತಂ ರುಚಿರತೀರಜಂಬಾಲಿತಂ .
ಕದಾ ನಿಜವಪುರ್ಮುದಾ ಸುರನರೋರಗೈಃ ಸಂಸ್ತುತೋಽಪ್ಯಹಂ
ತ್ರಿಪಥಗಾಮಿನಿ ಪ್ರಿಯಮತೀವ ಪಶ್ಯಾಮ್ಯಹೋ .. 9..
ತ್ವತ್ತೀರೇ ವಸತಿಂ ತವಾಮಲಜಲಸ್ನಾನಂ ತವ ಪ್ರೇಕ್ಷಣಂ
ತ್ವನ್ನಾಮಸ್ಮರಣಂ ತವೋದಯಕಥಾಸಂಲಾಪನಂ ಪಾವನಂ .
ಗಂಗೇ ಮೇ ತವ ಸೇವನೈಕನಿಪುಣೋಽಪ್ಯಾನಂದಿತಶ್ಚಾದೃತಃ
ಸ್ತುತ್ವಾ ಚೋದ್ಗತಪಾತಕೋ ಭುವಿ ಕದಾ ಶಾಂತಶ್ಚರಿಷ್ಯಾಮ್ಯಹಂ .. 10..
ಇತ್ಯೇತದೃಷಿಭಿಃ ಪ್ರೋಕ್ತಂ ಗಂಗಾಸ್ತವನಮುತ್ತಮಂ .
ಸ್ವರ್ಗ್ಯಂ ಯಶ್ಸ್ಯಮಾಯುಷ್ಯಂ ಪಠನಾಚ್ಛ್ರವಣಾದಪಿ .. 11..
ಸರ್ವಪಾಪಹರಂ ಪುಂಸಾಂ ಬಲಮಾಯುರ್ವಿವರ್ಧನಂ .
ಪ್ರಾತರ್ಮಧ್ಯಾಹ್ನಸಾಯಾಹ್ನೇ ಗಂಗಾಸಾನ್ನಿಧ್ಯತಾ ಭವೇತ್ .. 12..
ಇತ್ಯೇತದ್ಭಾರ್ಗವಾಖ್ಯಾನಂ ಶುಕದೇವಾನ್ಮಯಾ ಶ್ರುತಂ .
ಪಠಿತಂ ಶ್ರಾವಿತಂ ಚಾತ್ರ ಪುಣ್ಯಂ ಧನ್ಯಂ ಯಶಸ್ಕರಂ .. 13..
ಅವತಾರಂ ಮಹಾವಿಷ್ಣೋಃ ಕಲ್ಕೇಃ ಪರಮಮದ್ಭುತಂ .
ಪಠತಾಂ ಶೃಣ್ವತಾಂ ಭಕ್ತ್ಯಾ ಸರ್ವಾಶುಭವಿನಾಶನಂ .. 14..
ಇತಿ ಶ್ರೀಕಲ್ಕಿಪುರಾಣೇಽನುಭಾಗವತೇ ಭವಿಷ್ಯೇ ತೃತೀಯಾಂಶೇ
ಋಷಿಕೃತೋ ಗಂಗಾಸ್ತವಃ ಸಂಪೂರ್ಣಃ ..
Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com