మాతః శైలసుతా-సపత్ని వసుధా-శృంగారహారావలి
స్వర్గారోహణ-వైజయంతి భవతీం భాగీరథీం ప్రార్థయే .
త్వత్తీరే వసతః త్వదంబు పిబతస్త్వద్వీచిషు ప్రేంఖతః
త్వన్నామ స్మరతస్త్వదర్పితదృశః స్యాన్మే శరీరవ్యయః .. 1..
త్వత్తీరే తరుకోటరాంతరగతో గంగే విహంగో పరం
త్వన్నీరే నరకాంతకారిణి వరం మత్స్యోఽథవా కచ్ఛపః .
నైవాన్యత్ర మదాంధసింధురఘటాసంఘట్టఘంటారణ-
త్కారస్తత్ర సమస్తవైరివనితా-లబ్ధస్తుతిర్భూపతిః .. 2..
ఉక్షా పక్షీ తురగ ఉరగః కోఽపి వా వారణో వాఽ-
వారీణః స్యాం జనన-మరణ-క్లేశదుఃఖాసహిష్ణుః .
న త్వన్యత్ర ప్రవిరల-రణత్కింకిణీ-క్వాణమిత్రం
వారస్త్రీభిశ్చమరమరుతా వీజితో భూమిపాలః .. 3..
కాకైర్నిష్కుషితం శ్వభిః కవలితం గోమాయుభిర్లుంటితం
స్రోతోభిశ్చలితం తటాంబు-లులితం వీచీభిరాందోలితం .
దివ్యస్త్రీ-కర-చారుచామర-మరుత్సంవీజ్యమానః కదా
ద్రక్ష్యేఽహం పరమేశ్వరి త్రిపథగే భాగీరథీ స్వం వపుః .. 4..
అభినవ-బిసవల్లీ-పాదపద్మస్య విష్ణోః
మదన-మథన-మౌలేర్మాలతీ-పుష్పమాలా .
జయతి జయపతాకా కాప్యసౌ మోక్షలక్ష్మ్యాః
క్షపిత-కలికలంకా జాహ్నవీ నః పునాతు .. 5..
ఏతత్తాల-తమాల-సాల-సరలవ్యాలోల-వల్లీలతా-
చ్ఛత్రం సూర్యకర-ప్రతాపరహితం శంఖేందు-కుందోజ్జ్వలం .
గంధర్వామర-సిద్ధ-కిన్నరవధూ-తుంగస్తనాస్పాలితం
స్నానాయ ప్రతివాసరం భవతు మే గాంగం జలం నిర్మలం .. 6..
గాంగం వారి మనోహారి మురారి-చరణచ్యుతం .
త్రిపురారి-శిరశ్చారి పాపహారి పునాతు మాం .. 7..
పాపాపహారి దురితారి తరంగధారి
శైలప్రచారి గిరిరాజ-గుహావిదారి .
ఝంకారకారి హరిపాద-రజోపహారి
గాంగం పునాతు సతతం శుభకారి వారి .. 8..
గంగాష్టకం పఠతి యః ప్రయతః ప్రభాతే
వాల్మీకినా విరచితం శుభదం మనుష్యః .
ప్రక్షాల్య గాత్ర-కలికల్మష-పంక-మాశు
మోక్షం లభేత్ పతతి నైవ నరో భవాబ్ధౌ .. 9..
.. ఇతి వాల్మీకివిరచితం గంగాష్టకం సంపూర్ణం ..
Encoded and proofread by N.Balasubramanian bbalu@sify.com