#ಗಂಗಾಷ್ಟಕಂ ಸತ್ಯಜ್ಞಾನಾನಂದತೀರ್ಥಕೃತ

 

ಶ್ರೀಗಣೇಶಾಯ ನಮಃ ..

ಯದವಧಿ ತವ ನೀರಂ ಪಾತಕೀ ನೈತಿ ಗಂಗೇ

       ತದವಧಿ ಮಲಜಾಲೈರ್ನೈವ ಮುಕ್ತಃ ಕಲೌ ಸ್ಯಾತ್ .

ತವ ಜಲಕಣಿಕಾಽಲಂ ಪಾಪಿನಾಂ ಪಾಪಶುದ್ಧಯೈ

       ಪತಿತಪರಮದೀನಾಂಸ್ತ್ವಂ ಹಿ ಪಾಸಿ ಪ್ರಪನ್ನಾನ್ .. 1..

ತವ ಶಿವಜಲಲೇಶಂ ವಾಯುನೀತಂ ಸಮೇತ್ಯ

       ಸಪದಿ ನಿರಯಜಾಲಂ ಶೂನ್ಯತಾಮೇತಿ ಗಂಗೇ .

ಶಮಲಗಿರಿಸಮೂಹಾಃ ಪ್ರಸ್ಫುಂಟತಿ ಪ್ರಚಂಡಾಸ್ತ್ವಯಿ

       ಸಖಿ ವಿಶತಾಂ ನಃ ಪಾಪಶಂಕಾ ಕುತಃ ಸ್ಯಾತ್ .. 2..

ತವ ಶಿವಜಲಜಾಲಂ ನಿಃಸೃತಂ ಯರ್ಹಿ

       ಗಂಗೇ ಸಕಲಭುವನಜಾಲಂ ಪೂತಪೂತಂ ತದಾಽಭೂತ್ .

ಯಮಭಟಕಲಿವಾರ್ತಾ ದೇವಿ ಲುಪ್ತಾ ಯಮೋಽಪಿ

       ವ್ಯಧಿಕೃತವರದೇಹಾಃ ಪೂರ್ಣಕಾಮಾಃ ಸಕಾಮಾಃ .. 3..

ಮಧುಮಧುವನಪೂಗೈ ರತ್ನಪೂಗೈರ್ನೃಪೂಗೈರ್-

       ಮಧುಮಧುವನಪೂಗೈರ್ದೇವಪೂಗೈಃ ಸಪೂಗೈಃ .

ಪುರಹರಪರಮಾಂಗೇ ಭಾಸಿ ಮಾಯೇವ ಗಂಗೇ ಶಮಯಸಿ

       ವಿಷತಾಪಂ ದೇವದೇವಸ್ಯ ವಂದ್ಯಂ .. 4..

ಚಲಿತಶಶಿಕುಲಾಭೈರುತ್ತರಂಗೈಸ್ತರಂಗೈರ್-

       ಅಮಿತನದನದೀನಾಮಂಗಸಂಗೈರಸಂಗೈಃ .

ವಿಹರಸಿ ಜಗದಂಡೇ ಖಂಡಂಯತೀ ಗಿರೀಂದ್ರಾನ್ ರಮಯಸಿ

       ನಿಜಕಾಂತಂ  ಸಾಗರಂ ಕಾಂತಕಾತೇ .. 5..

ತವ ಪರಮಹಿಮಾನಂ ಚಿತ್ತವಾಚಾಮಮಾನಂ

       ಹರಿಹರವಿಧಿಶತ್ರ್ಕಾ ನಾಪಿ ಗಂಗೇ ವಿದಂತಿ .

ಶ್ರುತಿಕುಲಮಭಿಧತ್ತೇ ಶಂಕಿತಂ ತಂ ಗುಣಾಂತಂ

       ಗುಣಗಣಸುವಿಲಾಪೈರ್ನೇತಿ ನೇತೀತಿ ಸತ್ಯಂ .. 6..

ತವ ನುತಿನತಿನಾಮಾನ್ಯಪ್ಯಘಂ ಪಾವಯಂತಿ ದದತಿ

       ಪರಮಶಾಂತಿಂ ದಿವ್ಯಭೋಗಾನ್ ಜನಾನಾಂ .

ಇತಿ ಪತಿತಶರಣ್ಯೇ ತ್ವಾಂ ಪ್ರಪನ್ನೋಽಸ್ಮಿ

       ಮಾತರ್ಲಲಿತತರತರಂಗೇ ಚಾಂಗ ಗವೇಪ್ರಸೀದ .. 7..

ಶುಭತರಕೃತಯೋಗಾದ್ವಿಶ್ವನಾಥ-

       ಪ್ರಸಾದಾದ್ಭವಹರವರವಿದ್ಯಾಂ ಪ್ರಾಪ್ಯ ಕಾಶ್ಯಾಂ ಹಿ ಗಂಗೇ .

ಭಗವತಿ ತವ ತೀರೇ ನೀರಸಾರಂ ನಿಪೀಯ

       ಮುದಿತಹೃದಯಕಂಜೇ ನಂದಸೂನುಂ ಭಜೇಽಹಂ .. 8..

ಗಂಗಾಷ್ಟಕಮಿದಂ ಕೃತ್ವಾ ಭುಕ್ತಿಮುಕ್ತಿಪ್ರದಂ ನೃಣಾಂ .

ಸತ್ಯಜ್ಞಾನಾನಂದತೀರ್ಥಯತಿನಾ ಸ್ವರ್ಪಿತಂ ಶಿವೇ .. 9..

ತೇನ ಪ್ರಣಾತು ಭಗವಾನ್ ಶಿವೋ ಗಂಗಾಧರೋ ವಿಭುಃ .

ಕರೋತು ಶಂಕರಃ ಕಾಶ್ಯಾಂ ಜನಾನಾಂ ಸತತಂ ಶಿವಂ .. 10..

ಇತಿ ಸತ್ಯಜ್ಞಾನಾನಂದತೀರ್ಥಯತಿನಾ ವಿರಚಿತಂ ಗಂಗಾಷ್ಟಕಂ ಸಂಪೂರ್ಣಂ ..

Encoded and proofread by Dinesh Agarwal