সমৃদ্ধং সৌভাগ্যং সকলবসুধায়াঃ কিমপি তন্
মহৈশ্বর্যং লীলাজনিতজগতঃ খণ্ডপরশোঃ ।
শ্রুতীনাং সর্বস্বং সুকৃতমথ মূর্তং সুমনসাং
সুধাসোদর্যং তে সলিলমশিবং নঃ শময়তু ॥ ১॥
দরিদ্রাণাং দৈন্যং দুরিতমথ দুর্বাসনহৃদাং
দ্রুতং দূরীকুর্বন্ সকৃদপি গতো দৃষ্টিসরণিম্ ।
অপি দ্রাগাবিদ্যাদ্রুমদলনদীক্ষাগুরুরিহ
প্রবাহস্তে বারাং শ্রিয়ময়মপারাং দিশতু নঃ ॥ ২॥
উদঞ্চন্মার্তণ্ডস্ফুটকপটহেরম্বজননী-
কটাক্ষব্যাক্ষেপক্ষণজনিতসঙ্ক্ষোভনিবহাঃ ।
ভবন্তু ত্বঙ্গন্তো হরশিরসি গঙ্গাতনুভুব-
স্তরঙ্গাঃ প্রোত্তুঙ্গা দুরিতভয়ভঙ্গায় ভবতাম্ ॥ ৩॥
তবালম্বাদম্ব স্ফুরদলঘুগর্বেণ সহসা
ময়া সর্বেঽবজ্ঞাসরণিমথ নীতাঃ সুরগণাঃ ।
ইদানীমৌদাস্যং ভজসি যদি ভাগীরথি তদা
নিরাধারো হা রোদিমি কথয় কেষামিহ পুরঃ ॥ ৪॥
স্মৃতিং যাতা পুংসামকৃতসুকৃতানামপি চ যা
হরত্যন্তস্তন্দ্রাং তিমিরমিব চন্দ্রাংশুসরণিঃ ।
ইয়ং সা তে মূর্তিঃ সকলসুরসংসেব্যসলিলা
মমান্তঃসন্তাপং ত্রিবিধমপি পাপং চ হরতাম্ ॥ ৫॥
অপি প্রাজ্যং রাজ্যং তৃণমিব পরিত্যজ্য সহসা
বিলোলদ্বানীরং তব জননি তীরং শ্রিতবতাম্ ।
সুধাতঃ স্বাদীয়স্সলিলভরমাতৃপ্তি পিবতাং
জনানামানন্দঃ পরিহসতি নির্বাণপদবীম্ ॥ ৬॥
প্রভাতে স্নাতীনাং নৃপতিরমণীনাং কুচতটী-
গতো যাবন্মাতর্মিলতি তব তোয়ৈর্মৃগমদঃ ।
মৃগাস্তাবদ্বৈমানিকশতসহস্রৈঃ পরিবৃতা
বিশন্তি স্বচ্ছন্দং বিমলবপুষো নন্দনবনম্ ॥ ৭॥
স্মৃতং সদ্যঃ স্বান্তং বিরচয়তি শান্তং সকৃদপি
প্রগীতং যৎপাপং ঝটিতি ভবতাপং চ হরতি ।
ইদং তদ্গঙ্গেতি শ্রবণরমণীয়ং খলু পদং
মম প্রাণপ্রান্তে বদনকমলান্তর্বিলসতু ॥ ৮॥
যদন্তঃ খেলন্তো বহুলতরসন্তোষভরিতা
ন কাকা নাকাধীশ্বরনগরসাকাঙ্ক্ষমনসঃ ।
নিবাসাল্লোকানাং জনিমরণশোকাপহরণং
তদেতত্তে তীরং শ্রমশমনধীরং ভবতু নঃ ॥ ৯॥
ন যৎসাক্ষাদ্বেদৈরপি গলিতভেদৈরবসিতং
ন যস্মিন্ জীবানাং প্রসরতি মনোবাগবসরঃ ।
নিরাকারং নিত্যং নিজমহিমনির্বাসিততমো
বিশুদ্ধং যত্তত্ত্বং সুরতটিনি তত্ত্বং ন বিষয়ঃ ॥ ১০॥
মহাদানৈর্ধ্যানৈর্বহুবিধবিতানৈরপি চ যন্
ন লভ্যং ঘোরাভিঃ সুবিমলতপোরাশিভিরপি ।
অচিন্ত্যং তদ্বিষ্ণোঃ পদমখিলসাধারণতয়া
দদানা কেনাসি ত্বমিহ তুলনীয়া কথয় নঃ ॥ ১১॥
নৃণামীক্ষামাত্রাদপি পরিহরন্ত্যা ভবভয়ং
শিবায়াস্তে মূর্তেঃ ক ইহ মহিমানং নিগদতু ।
অমর্ষম্লানায়াঃ পরমমনুরোধং গিরিভুবো
বিহায় শ্রীকণ্ঠঃ শিরসি নিয়তং ধারয়তি যাম্ ॥ ১২॥
বিনিন্দ্যান্যুন্মত্তৈরপি চ পরিহার্যাণি পতিতৈ-
রবাচ্যানি ব্রাত্যৈঃ সপুলকমপাস্যানি পিশুনৈঃ ।
হরন্তী লোকানামনবরতমেনাংসি কিয়তাং
কদাপ্যশ্রান্তা ত্বং জগতি পুনরেকা বিজয়সে ॥ ১৩॥
স্খলন্তী স্বর্লোকাদবনিতলশোকাপহৃতয়ে
জটাজূটগ্রন্থৌ যদসি বিনিবদ্ধা পুরভিদা ।
অয়ে নির্লোভানামপি মনসি লোভং জনয়তাং
গুণানামেবায়ং তব জননি দোষঃ পরিণতঃ ॥ ১৪॥
জডানন্ধান্ পঙ্গূন্ প্রকৃতিবধিরানুক্তিবিকলান্
গ্রহগ্রস্তানস্তাখিলদুরিতনিস্তারসরণীন্ ।
নিলিম্পৈর্নির্মুক্তানপি চ নিরয়ান্তর্নিপততো
নরানম্ব ত্রাতুং ত্বমিহ পরমং ভেষজমসি ॥ ১৫॥
স্বভাবস্বচ্ছানাং সহজশিশিরাণাময়মপা-
মপারস্তে মাতর্জয়তি মহিমা কোঽপি জগতি ।
মুদায়ং গায়ন্তি দ্যুতলমনবদ্যদ্যুতিভৃতঃ
সমাসাদ্যাদ্যাপি স্ফুটপুলকসান্দ্রাঃ সগরজাঃ ॥ ১৬॥
কৃতক্ষুদ্রৈনস্কানথ ঝটিতি সন্তপ্তমনসঃ
সমুদ্ধর্তুং সন্তি ত্রিভুবনতলে তীর্থনিবহাঃ ।
অপি প্রায়শ্চিত্তপ্রসরণপথাতীতচরিতা-
ন্নরানূরীকর্তুং ত্বমিব জননি ত্বং বিজয়সে ॥ ১৭॥
নিধানং ধর্মাণাং কিমপি চ বিধানং নবমুদাং
প্রধানং তীর্থানামমলপরিধানং ত্রিজগতঃ ।
সমাধানং বুদ্ধেরথ খলু তিরোধানমধিয়াং
শ্রিয়ামাধানং নঃ পরিহরতু তাপং তব বপুঃ ॥ ১৮॥
পুরো ধাবং ধাবং দ্রবিণমদিরাঘূর্ণিতদৃশাং
মহীপানাং নানাতরুণতরখেদস্য নিয়তম্ ।
মমৈবায়ং মন্তুঃ স্বহিতশতহন্তুর্জডধিয়ো
বিয়োগস্তে মাতর্যদিহ করুণাতঃ ক্ষণমপি ॥ ১৯॥
মরুল্লীলালোলল্লহরিলুলিতাম্ভোজপটলী-
স্খলৎপাংসুব্রাতচ্ছুরণবিসরৎকৌঙ্কুমরুচি ।
সুরস্ত্রীবক্ষোজক্ষরদগরুজম্বালজটিলং
জলং তে জম্বালং মম জননজালং জরয়তু ॥ ২০॥
সমুৎপত্তিঃ পদ্মারমণপদপদ্মামলনখা-
ন্নিবাসঃ কন্দর্পপ্রতিভটজটাজূটভবনে ।
অথাঽয়ং ব্যাসঙ্গো হতপতিতনিস্তারণবিধৌ
ন কস্মাদুৎকর্ষস্তব জননি জাগর্তু জগতি ॥ ২১॥
নগেভ্যো যান্তীনাং কথয় তটিনীনাং কতময়া
পুরাণাং সংহর্তুঃ সুরধুনি কপর্দোঽধিরুরুহে ।
কয়া বা শ্রীভর্তুঃ পদকমলমক্ষালি সলিলৈ-
স্তুলালেশো যস্যাং তব জননি দীয়েত কবিভিঃ ॥ ২২॥
বিধত্তাং নিঃশঙ্কং নিরবধি সমাধিং বিধিরহো
সুখং শেষে শেতাং হরিরবিরতং নৃত্যতু হরঃ ।
কৃতং প্রায়শ্চিত্তৈরলমথ তপোদানয়জনৈঃ
সবিত্রী কামানাং যদি জগতি জাগর্তি জননী ॥ ২৩॥
অনাথঃ স্নেহার্দ্রাং বিগলিতগতিঃ পুণ্যগতিদাং
পতন্ বিশ্বোদ্ধর্ত্রীং গদবিগলিতঃ সিদ্ধভিষজম্ ।
সুধাসিন্ধুং তৃষ্ণাকুলিতহৃদয়ো মাতরময়ং
শিশুঃ সম্প্রাপ্তস্ত্বামহমিহ বিদধ্যাঃ সমুচিতম্ ॥ ২৪॥
বিলীনো বৈ বৈবস্বতনগরকোলাহলভরো
গতা দূতা দূরং ক্বচিদপি পরেতান্ মৃগয়িতুম্ ।
বিমানানাং ব্রাতো বিদলয়তি বীথির্দিবিষদাং
কথা তে কল্যাণী যদবধি মহীমণ্ডলমগাৎ ॥ ২৫॥
স্ফুরৎকামক্রোধপ্রবলতরসঞ্জাতজটিল-
জ্বরজ্বালাজালজ্বলিতবপুষাং নঃ প্রতিদিনম্ ।
হরন্তাং সন্তাপং কমপি মরুদুল্লাসলহরি-
চ্ছটাচঞ্চৎপাথঃকণসরণয়ো দিব্যসরিতঃ ॥ ২৬॥
ইদং হি ব্রহ্মাণ্ডং সকলভুবনাভোগভবনং
তরঙ্গৈর্যস্যান্তর্লুঠতি পরিতস্তিন্দুকমিব ।
স এষ শ্রীকণ্ঠপ্রবিততজটাজূটজটিলো
জলানাং সঙ্ঘাতস্তব জননি তাপং হরতু নঃ ॥ ২৭॥
ত্রপন্তে তীর্থানি ত্বরিতমিহ যস্যোদ্ধৃতিবিধৌ
করং কর্ণে কুর্বন্ত্যপি কিল কপালিপ্রভৃতয়ঃ ।
ইমং ত্বং মামম্ব ত্বমিয়মনুকম্পার্দ্রহৃদয়ে
পুনানা সর্বেষামঘমথনদর্পং দলয়সি ॥ ২৮॥
শ্বপাকানাং ব্রাতৈরমিতবিচিকিৎসাবিচলিতৈ-
র্বিমুক্তানামেকং কিল সদনমেনঃপরিষদাম্ ।
অহো মামুদ্ধর্তুং জননি ঘটয়ন্ত্যাঃ পরিকরং
তব শ্লাঘাং কর্তুং কথমিব সমর্থো নরপশুঃ ॥ ২৯॥
ন কোঽপ্যেতাবন্তং খলু সময়মারভ্য মিলিতো
যদুদ্ধারাদারাদ্ভবতি জগতো বিস্ময়ভরঃ ।
ইতীমামীহাং তে মনসি চিরকালং স্থিতবতী-
ময়ং সম্প্রাপ্তোঽহং সফলয়িতুমম্ব প্রণয় নঃ ॥ ৩০॥
শ্ববৃত্তিব্যাসঙ্গো নিয়তমথ মিথ্যাপ্রলপনং
কুতর্কেশ্বভ্যাসঃ সততপরপৈশুন্যমননম্ ।
অপি শ্রাবং শ্রাবং মম তু পুনরেবং গুণগণা-
নৃতে ত্বৎকো নাম ক্ষণমপি নিরীক্ষেত বদনম্ ॥ ৩১॥
বিশালাভ্যামাভ্যাং কিমিহ নয়নাভ্যাং খলু ফলং
ন যাভ্যামালীঢা পরমরমণীয়া তব তনুঃ ।
অয়ং হি ন্যক্কারো জননি মনুজস্য শ্রবণয়ো-
র্যযোর্নান্তর্যাতস্তব লহরিলীলাকলকলঃ ॥ ৩২॥
বিমানৈঃ স্বচ্ছন্দং সুরপুরময়ন্তে সুকৃতিনঃ
পতন্তি দ্রাক্ পাপা জননি নরকান্তঃ পরবশাঃ ।
বিভাগোঽয়ং তস্মিন্নশুভময়মূর্তৌ জনপদে
ন যত্র ত্বং লীলাদলিতমনুজাশেষকলুষা ॥ ৩৩॥
অপি ঘ্নন্তো বিপ্রানবিরতমুশন্তো গুরুসতীঃ
পিবন্তো মৈরেয়ং পুনরপি হরন্তশ্চ কনকম্ ।
বিহায় ত্বয়্যন্তে তনুমতনুদানাধ্বরজুষা-
মুপর্যম্ব ক্রীডন্ত্যখিলসুরসম্ভাবিতপদাঃ ॥ ৩৪॥
অলভ্যং সৌরভ্যং হরতি সততং যঃ সুমনসাং
ক্ষণাদেব প্রাণানপি বিরহশস্ত্রক্ষতহৃদাম্ ।
ত্বদীয়ানাং লীলাচলিতলহরীণাং ব্যতিকরাৎ
পুনীতে সোঽপি দ্রাগহহ পবমানস্ত্রিভুবনম্ ॥ ৩৫॥
কিয়ন্তঃ সন্ত্যেকে নিয়তমিহলোকার্থঘটকাঃ
পরে পূতাত্মানঃ কতি চ পরলোকপ্রণয়িনঃ ।
সুখং শেতে মাতস্তব খলু কৃপাতঃ পুনরয়ং
জগন্নাথঃ শশ্বত্ত্বয়ি নিহিতলোকদ্বয়ভরঃ ॥ ৩৬॥
ভবত্যা হি ব্রাত্যাধমপতিতপাখণ্ডপরিষৎ
পরিত্রাণস্নেহঃ শ্লথয়িতুমশক্যঃ খলু যথা ।
মমাপ্যেবং প্রেমা দুরিতনিবহেষ্বম্ব জগতি
স্বভাবোঽয়ং সর্বৈরপি খলু যতো দুষ্পরিহরঃ ॥ ৩৭॥
প্রদোষান্তর্নৃত্যৎপুরমথনলীলোদ্ধৃতজটা-
তটাভোগপ্রেঙ্খল্লহরিভুজসন্তানবিধুতিঃ ।
বিলক্রোডক্রীডজ্জলডমরুটঙ্কারসুভগ-
স্তিরোধত্তাং তাপং ত্রিদশতটিনীতাণ্ডববিধিঃ ॥ ৩৮॥
সদৈব ত্বয়্যেবার্পিতকুশলচিন্তাভরমিমং
যদি ত্বং মামম্ব ত্যজসি সময়েঽস্মিন্সুবিষমে ।
তদা বিশ্বাসোঽয়ং ত্রিভুবনতলাদস্তময়তে
নিরাধারা চেয়ং ভবতি খলু নির্ব্যাজকরুণা ॥ ৩৯॥
কপর্দাদুল্লস্য প্রণয়মিলদর্ধাঙ্গয়ুবতেঃ
পুরারেঃ প্রেঙ্খন্ত্যো মৃদুলতরসীমন্তসরণৌ ।
ভবান্যা সাপত্ন্যস্ফুরিতনয়নং কোমলরুচা
করেণাক্ষিপ্তাস্তে জননি বিজয়ন্তাং লহরয়ঃ ॥ ৪০॥
প্রপদ্যন্তে লোকাঃ কতি ন ভবতীমত্রভবতী-
মুপাধিস্তত্রায়ং স্ফুরতি যদভীষ্টং বিতরসি ।
শপে তুভ্যং মাতর্মম তু পুনরাত্মা সুরধুনি
স্বভাবাদেব ত্বয়্যমিতমনুরাগং বিধৃতবান্ ॥ ৪১॥
ললাটে যা লোকৈরিহ খলু সলীলং তিলকিতা
তমো হন্তুং ধত্তে তরুণতরমার্তণ্ডতুলনাম্ ।
বিলুম্পন্তী সদ্যো বিধিলিখিতদুর্বর্ণসরণিং
ত্বদীয়া সা মৃৎস্না মম হরতু কৃৎস্নামপি শুচম্ ॥ ৪২॥
নরান্ মূঢাংস্তত্তজ্জনপদসমাসক্তমনসো
হসন্তঃ সোল্লাসং বিকচকুসুমব্রাতমিষতঃ ।
পুনানাঃ সৌরভ্যৈঃ সততমলিনো নিত্যমলিনান্
সখায়ো নঃ সন্তু ত্রিদশতটিনীতীরতরবঃ ॥ ৪৩॥
যজন্ত্যেকে দেবান্ কঠিনতরসেবাংস্তদপরে
বিতানব্যাসক্তা যমনিয়মরক্তাঃ কতিপয়ে ।
অহং তু ত্বন্নামস্মরণকৃতকামস্ত্রিপথগে
জগজ্জালং জানে জননি তৃণজালেন সদৃশম্ ॥ ৪৪॥
অবিশ্রান্তং জন্মাবধি সুকৃতজন্মার্জনকৃতাং
সতাং শ্রেয়ঃ কর্তুং কতি ন কৃতিনঃ সন্তি বিবুধাঃ ।
নিরস্তালম্বানামকৃতসুকৃতানাং তু ভবতীং
বিনাঽমুষ্মিংল্লোকে ন পরমবলোকে হিতকরম্ ॥ ৪৫॥
পয়ঃ পীত্বা মাতস্তব সপদি যাতঃ সহচরৈ-
র্বিমূঢৈঃ সংরন্তুং ক্বচিদপি ন বিশ্রান্তিমগমম্ ।
ইদানীমুৎসঙ্গে মৃদুপবনসঞ্চারশিশিরে
চিরাদুন্নিদ্রং মাং সদয়হৃদয়ে শায়য চিরম্ ॥ ৪৬॥
বধান দ্রাগেব দ্রঢিমরমণীয়ং পরিকরং
কিরীটে বালেন্দুং নিয়ময় পুনঃ পন্নগগণৈঃ ।
ন কুর্যাস্ত্বং হেলামিতরজনসাধারণতয়া
জগন্নাথস্যায়ং সুরধুনি সমুদ্ধারসময়ঃ ॥ ৪৭॥
শরচ্চন্দ্রশ্বেতাং শশিশকলশ্বেতালমুকুটাং
করৈঃ কুম্ভাম্ভোজে বরভয়নিরাসৌ চ দধতীম্ ।
সুধাধারাকারাভরণবসনাং শুভ্রমকর-
স্থিতাং ত্বাং যে ধ্যায়ন্ত্যুদয়তি ন তেষাং পরিভবঃ ॥ ৪৮॥
দরস্মিতসমুল্লসদ্বদনকান্তিপূরামৃতৈ-
র্ভবজ্বলনভর্জিতাননিশমূর্জয়ন্তী নরান্ ।
চিদেকময়চন্দ্রিকাচয়চমৎকৃতিং তন্বতী
তনোতু মম শন্তনোঃ সপদি শন্তনোরঙ্গনা ॥ ৪৯॥
মন্ত্রৈর্মীলিতমৌষধৈর্মুকুলিতং ত্রস্তং সুরাণাং গণৈঃ
স্রস্তং সান্দ্রসুধারসৈর্বিদলিতং গারুত্মতৈর্গ্রাবভিঃ ।
বীচিক্ষালিতকালিয়াহিতপদে স্বর্লোককল্লোলিনি
ত্বং তাপং তিরয়াধুনা মম ভবজ্বালাবলীঢাত্মনঃ ॥ ৫০॥
দ্যূতে নাগেন্দ্রকৃত্তিপ্রমথগণমণিশ্রেণিনন্দীন্দুমুখ্যং
সর্বস্বং হারয়িত্বা স্বমথ পুরভিদি দ্রাক্ পণীকর্তুকামে ।
সাকূতং হৈমবত্যা মৃদুলহসিতয়া বীক্ষিতায়াস্তবাম্ব
ব্যালোলোল্লাসিবল্গল্লহরিনটঘটীতাণ্ডবং নঃ পুনাতু ॥ ৫১॥
বিভূষিতানঙ্গরিপূত্তমাঙ্গা সদ্যঃকৃতানেকজনার্তিভঙ্গা ।
মনোহরোত্তুঙ্গচলত্তরঙ্গা গঙ্গা মমাঙ্গান্যমলীকরোতু ॥ ৫২॥
ইমাং পীয়ূষলহরীং জগন্নাথেন নির্মিতাম্ ।
যঃ পঠেত্তস্য সর্বত্র জায়ন্তে সুখসম্পদঃ ॥ ৫৩॥
Encoded and proofread by Arvind Kolhatkar akolhatkar at rogers.com
Proofread by Sunder Hattangadi