శ్రీగణేశాయ నమః ..
సూత ఉవాచ --
శృణుధ్వం మునయః సర్వే గంగాస్తవమనుత్తమం .
శోకమోహహరం పుంసామృషిభిః పరికీర్తితం .. 1..
ఋషయ ఊచుః --
ఇయం సురతరంగిణీ భవనవారిధేస్తారిణీ
స్తుతా హరిపదాంబుజాదుపగతా జగత్సంసదః .
సుమేరుశిఖరామరప్రియజలామలక్షాలినీ
ప్రసన్నవదనా శుభా భవభయస్య విద్రావిణీ .. 2..
భగీరథరథానుగా సురకరీంద్రదర్పాపహా
మహేశముకుటప్రభా గిరిశిరఃపతాకా సితా .
సురాసురనరోరగైరజభవాచ్యుతైః సంస్తుతా
విముక్తిఫలశాలినీ కలుషనాశినీ రాజతే .. 3..
పితామహకమండలుప్రభవముక్తిబీజా లతా
శ్రుతిస్మృతిగణస్తుతద్విజకులాలవాలావృతా .
సుమేరుశిఖరాభిదా నిపతితా త్రిలోకావృతా
సుధర్మఫలశాలినీ సుఖపలాశినీ రాజతే .. 4..
చరద్విహగమాలినీ సగరవంశముక్తిప్రదా
మునీంద్రవరనందినీ దివి మతా చ మందాకినీ .
సదా దురితనాశినీ విమలవారిసందర్శన-
ప్రణామగుణకీర్తనాదిషు జగత్సు సంరాజతే .. 5..
మహాభిషసుతాంగనా హిమగిరీశకూటస్తనా
సఫేనజలహాసినీ సితమరాలసచ్చారిణీ .
చలల్లహరిసత్కరా వరసరోజమాలాధరా
రసోల్లసితగామినీ జలధికామినీ రాజతే .. 6..
క్వచిన్మునిగణైః స్తుతా క్వచిదనంతసంపూజితా
క్వచిత్కలకలస్వనా క్వచిదధీరయాదోగణా .
క్వచిద్రవికరోజ్జ్వలా క్వచిదుదగ్రపాతాకులా
క్వచిజ్జనవిగాహితా జయతి భీష్మమాతా సతీ .. 7..
స ఏవ కుశలీ జనః ప్రణమతీహ భాగీరథీం
స ఏవ తపసాం నిధిర్జపతి జాహ్నవీమాదరాత్ .
స ఏవ పురుషోత్తమః స్మరతి సాధు మందాకినీం
స ఏవ విజయీ ప్రభుః సురతరంగిణీం సేవతే .. 8..
తవామలజలాచితం ఖగసృగాలమీనక్షతం
చలల్లహరిలోలితం రుచిరతీరజంబాలితం .
కదా నిజవపుర్ముదా సురనరోరగైః సంస్తుతోఽప్యహం
త్రిపథగామిని ప్రియమతీవ పశ్యామ్యహో .. 9..
త్వత్తీరే వసతిం తవామలజలస్నానం తవ ప్రేక్షణం
త్వన్నామస్మరణం తవోదయకథాసంలాపనం పావనం .
గంగే మే తవ సేవనైకనిపుణోఽప్యానందితశ్చాదృతః
స్తుత్వా చోద్గతపాతకో భువి కదా శాంతశ్చరిష్యామ్యహం .. 10..
ఇత్యేతదృషిభిః ప్రోక్తం గంగాస్తవనముత్తమం .
స్వర్గ్యం యశ్స్యమాయుష్యం పఠనాచ్ఛ్రవణాదపి .. 11..
సర్వపాపహరం పుంసాం బలమాయుర్వివర్ధనం .
ప్రాతర్మధ్యాహ్నసాయాహ్నే గంగాసాన్నిధ్యతా భవేత్ .. 12..
ఇత్యేతద్భార్గవాఖ్యానం శుకదేవాన్మయా శ్రుతం .
పఠితం శ్రావితం చాత్ర పుణ్యం ధన్యం యశస్కరం .. 13..
అవతారం మహావిష్ణోః కల్కేః పరమమద్భుతం .
పఠతాం శృణ్వతాం భక్త్యా సర్వాశుభవినాశనం .. 14..
ఇతి శ్రీకల్కిపురాణేఽనుభాగవతే భవిష్యే తృతీయాంశే
ఋషికృతో గంగాస్తవః సంపూర్ణః ..
Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com