#શ્રીગઙ્ગાસહસ્રનામસ્તોત્રમ્

અકારાદિક્ષકારાન્ત નામઘટિતં સ્કન્દપુરાણાન્તર્ગતં

અગસ્ત્ય ઉવાચ

વિના સ્નાનેન ગઙ્ગાયાં નૃણાં જન્મ નિરર્થકમ્ .

ઉપાયાન્તરમસ્ત્યન્યદ્ યેન સ્નાનફલં લભેત્ .. ૧..

અશક્તાનાં ચ પઙ્ગૂનામાલસ્યોપહતાત્મનામ્ .

દૂરદેશાન્તરસ્થાનાં ગઙ્ગાસ્નાનં કથં ભવેત્ .. ૨..

દાનં વાથ વ્રતં વાથ મન્ત્રઃ સ્તોત્રં જપોઽથવા .

તીર્થાન્તરાભિષેકો વા દેવતોપાસનં તુ વા .. ૩..

યદ્યસ્તિ કિઞ્ચિત્ ષડ્વક્ત્ર ગઙ્ગાસ્નાનફલપ્રદમ્ .

વિધાનાન્તરમાત્રેણ તદ્ વદ પ્રણતાય મે .. ૪..

ત્વત્તો ન વેદ સ્કન્દાન્યો ગઙ્ગાગર્ભસમુદ્ભવ .

પરં સ્વર્ગતરઙ્ગિણ્યાં મહિમાનં મહામતે .. ૫..

સ્કન્દ ઉવાચ

સન્તિ પુણ્યજલાનીહ સરાંસિ સરિતો મુને .

સ્થાને સ્થાને ચ તીર્થાનિ જિતાત્માધ્યુષિતાનિ ચ .. ૬..

દૃષ્ટપ્રત્યયકારીણિ મહામહિમભાઞ્જ્યપિ .

પરં સ્વર્ગતરઙ્ગિણ્યાઃ કોટ્યંશોઽપિ ન તત્ર વૈ .. ૭..

અનેનૈવાનુમાનેન બુદ્ધ્યસ્વ કલશોદ્ભવ .

દધ્રે ગઙ્ગોત્તમાઙ્ગેન દેવદેવેન શમ્ભુના .. ૮..

સ્નાનકાલેઽન્યતીર્થેષુ જપ્યતે જાહ્નવી જનૈઃ .

વિના વિષ્ણુપદીં ક્વાન્યત્ સમર્થમઘમોચને .. ૯..

ગઙ્ગાસ્નાનફલં બ્રહ્મન્ ગઙ્ગાયામેવ લભ્યતે .

યથા દ્રાક્ષાફલસ્વાદો દ્રાક્ષાયામેવ નાન્યતઃ .. ૧૦..

અસ્ત્યુપાય ઇહ ત્વેકઃ સ્યાદ્ યેનાવિકલં ફલમ્ .

સ્નાનસ્ય દેવસરિતો મહાગુહ્યતમો મુને .. ૧૧..

શિવભક્તાય શાન્તાય વિષ્ણુભક્તિપરાય ચ .

શ્રદ્ધાલવે ત્વાસ્તિકાય ગર્ભવાસમુમુક્ષવે .. ૧૨..

કથનીયં ન ચાન્યસ્ય કસ્યચિત્ કેનચિત્ ક્વચિત્ .

ઇદં રહસ્યં પરમં મહાપાતકનાશનમ્ .. ૧૩..

મહાશ્રેયસ્કરં પુણ્યં મનોરથકરં પરમ્ .

દ્યુનદીપ્રીતિજનકં શિવસન્તોષસન્તતિઃ .. ૧૪..

નામ્નાં સહસ્રં ગઙ્ગાયાઃ સ્તવરાજેષુ શોભનમ્ .

જપ્યાનાં પરમં જપ્યં વેદોપનિષદાં સમમ્ .. ૧૫..

જપનીયં પ્રયત્નેન મૌનિના વાચકં વિના .

શુચિસ્થાનેષુ શુચિના સુસ્પષ્ટાક્ષરમેવ ચ .. ૧૬..

ધ્યાનમ્ -

શૈલેન્દ્રાદવતારિણી નિજજલે મજ્જદ્જનોત્તારિણી

પારાવારવિહારિણી ભવભયશ્રેણી સમુત્સારિણી .

શેષાહેરનુકારિણી હરશિરોવલ્લીદલાકારિણી

કાશીપ્રાન્તવિહારિણી વિજયતે ગઙ્ગા મનોહારિણી ..

ૐ નમો ગઙ્ગાદેવ્યૈ  ..

ઓંકારરૂપિણ્યજરાઽતુલાઽનન્તાઽમૃતસ્રવા .

અત્યુદારાઽભયાઽશોકાઽલકનન્દાઽમૃતાઽમલા .. ૧૭..

અનાથવત્સલાઽમોઘાઽપાંયોનિરમૃતપ્રદા .

અવ્યક્તલક્ષણાઽક્ષોભ્યાઽનવચ્છિન્નાઽપરાઽજિતા .. ૧૮..

અનાથનાથાઽભીષ્ટાર્થસિદ્ધિદાઽનઙ્ગવર્ધિની .

અણિમાદિગુણાઽધારાઽગ્રગણ્યાઽલીકહારિણી .. ૧૯..

અચિન્ત્યશક્તિરનઘાઽદ્ભુતરૂપાઽઘહારિણી .

અદ્રિરાજસુતાઽષ્ટાઙ્ગયોગસિદ્ધિપ્રદાઽચ્યુતા .. ૨૦..

અક્ષુણ્ણશક્તિરસુદાઽનન્તતીર્થાઽમૃતોદકા .

અનન્તમહિમાઽપારાઽનન્તસૌખ્યપ્રદાઽન્નદા .. ૨૧..

અશેષદેવતામૂર્તિરઘોરાઽમૃતરૂપિણી .

અવિદ્યાજાલશમની હ્યપ્રતર્ક્યગતિપ્રદા .. ૨૨..

અશેષવિઘ્નસંહર્ત્રી ત્વશેષગુણગુમ્ફિતા .

અજ્ઞાનતિમિરજ્યોતિરનુગ્રહપરાયણા .. ૨૩..

અભિરામાઽનવદ્યાઙ્ગ્યનન્તસારાઽકલઙ્કિની .

આરોગ્યદાઽઽનન્દવલ્લી ત્વાપન્નાર્તિવિનાશિની .. ૨૪..

આશ્ચર્યમૂર્તિરાયુષ્યા હ્યાઢ્યાઽઽદ્યાઽઽપ્રાઽઽર્યસેવિતા .

આપ્યાયિન્યાપ્તવિદ્યાખ્યા ત્વાનન્દાઽઽશ્વાસદાયિની .. ૨૫..

આલસ્યઘ્ન્યાપદાં હન્ત્રી હ્યાનન્દામૃતવર્ષિણી .

ઇરાવતીષ્ટદાત્રીષ્ટા ત્વિષ્ટાપૂર્તફલપ્રદા .. ૨૬..

ઇતિહાસશ્રુતીડ્યાર્થા ત્વિહામુત્રશુભપ્રદા .

ઇજ્યાશીલસમિજ્યેષ્ઠા ત્વિન્દ્રાદિપરિવન્દિતા .. ૨૭..

ઇલાલઙ્કારમાલેદ્ધા ત્વિન્દિરારમ્યમન્દિરા .

ઇદિન્દિરાદિસંસેવ્યા ત્વીશ્વરીશ્વરવલ્લભા .. ૨૮..

ઈતિભીતિહરેડ્યા ચ ત્વીડનીયચરિત્રભૃત્ .

ઉત્કૃષ્ટશક્તિરુત્કૃષ્ટોડુપમણ્ડલચારિણી .. ૨૯..

ઉદિતામ્બરમાર્ગોસ્રોરગલોકવિહારિણી .

ઉક્ષોર્વરોત્પલોત્કુમ્ભા ઉપેન્દ્રચરણદ્રવા .. ૩૦..

ઉદન્વત્પૂર્તિહેતુશ્ચોદારોત્સાહપ્રવર્ધિની .

ઉદ્વેગઘ્ન્યુષ્ણશમની હ્યુષ્ણરશ્મિસુતાપ્રિયા .. ૩૧..

ઉત્પત્તિસ્થિતિસંહારકારિણ્યુપરિચારિણી .

ઊર્જં વહન્ત્યૂર્જધરોર્જાવતી ચોર્મિમાલિની  .. ૩૨..

ઊર્ધ્વરેતઃપ્રિયોર્ધ્વાધ્વા હ્યૂર્મિલોર્ધ્વગતિપ્રદા .

ઋષિવૃન્દસ્તુતર્દ્ધિશ્ચ ઋણત્રયવિનાશિની .. ૩૩..

ઋતમ્ભરર્દ્ધિદાત્રી ચ ઋક્સ્વરૂપા ઋજુપ્રિયા .

ઋક્ષમાર્ગવહર્ક્ષાર્ચિરૃજુમાર્ગપ્રદર્શિની .. ૩૪..

એધિતાખિલધર્માર્થા ત્વેકૈકામૃતદાયિની .

એધનીયસ્વભાવૈજ્યા ત્વેજિતાશેષપાતકા  .. ૩૫..

ઐશ્વર્યદૈશ્વર્યરૂપા હ્યૈતિહ્યં હ્યૈન્દવીદ્યુતિઃ .

ઓજસ્વિન્યોષધીક્ષેત્રમોજોદૌદનદાયિની .. ૩૬..

ઓષ્ઠામૃતૌન્નત્યદાત્રી ત્વૌષધં ભવરોગિણામ્ .

ઔદાર્યચઞ્ચુરૌપેન્દ્રી ત્વૌગ્રી હ્યૌમેયરૂપિણી .. ૩૭..

અમ્બરાધ્વવહામ્બષ્ઠામ્બરમાલામ્બુજેક્ષણા .

અમ્બિકામ્બુમહાયોનિરન્ધોદાન્ધકહારિણી .. ૩૮..

અંશુમાલા હ્યંશુમતી ત્વઙ્ગીકૃતષડાનના .

અન્ધતામિસ્રહન્ત્ર્યન્ધુરઞ્જના હ્યઞ્જનાવતી .. ૩૯..

કલ્યાણકારિણી કામ્યા કમલોત્પલગન્ધિની .

કુમુદ્વતી કમલિની કાન્તિઃ કલ્પિતદાયિની .. ૪૦..

કાઞ્ચનાક્ષી કામધેનુઃ કીર્તિકૃત્ ક્લેશનાશિની .

ક્રતુશ્રેષ્ઠા ક્રતુફલા કર્મબન્ધવિભેદિની  .. ૪૧..

કમલાક્ષી ક્લમહરા કૃશાનુતપનદ્યુતિઃ .

કરુણાર્દ્રા ચ કલ્યાણી કલિકલ્મષનાશિની .. ૪૨..

કામરૂપા ક્રિયાશક્તિઃ કમલોત્પલમાલિની .

કૂટસ્થા કરુણા કાન્તા કૂર્મયાના કલાવતી .. ૪૩..

કમલા કલ્પલતિકા કાલી કલુષવૈરિણી .

કમનીયજલા કમ્રા કપર્દિસુકપર્દગા .. ૪૪..

કાલકૂટપ્રશમની કદમ્બકુસુમપ્રિયા .

કાલિન્દી કેલિલલિતા કલકલ્લોલમાલિકા .. ૪૫..

ક્રાન્તલોકત્રયા કણ્ડૂઃ  કણ્ડૂતનયવત્સલા .

ખડ્ગિની ખડ્ગધારાભા ખગા ખણ્ડેન્દુધારિણી  .. ૪૬..

ખેખેલગામિની ખસ્થા ખણ્ડેન્દુતિલકપ્રિયા .

ખેચરી ખેચરીવન્દ્યા ખ્યાતિઃ ખ્યાતિપ્રદાયિની .. ૪૭..

ખણ્ડિતપ્રણતાઘૌઘા ખલબુદ્ધિવિનાશિની .

ખાતૈનઃ કન્દસન્દોહા ખડ્ગખટ્વાઙ્ગ ખેટિની .. ૪૮..

ખરસન્તાપશમની ખનિઃ પીયૂષપાથસામ્ .

ગઙ્ગા ગન્ધવતી ગૌરી ગન્ધર્વનગરપ્રિયા .. ૪૯..

ગમ્ભીરાઙ્ગી ગુણમયી ગતાતઙ્કા ગતિપ્રિયા .

ગણનાથામ્બિકા ગીતા ગદ્યપદ્યપરિષ્ટુતા .. ૫૦..

ગાન્ધારી ગર્ભશમની ગતિભ્રષ્ટગતિપ્રદા .

ગોમતી ગુહ્યવિદ્યા ગૌર્ગોપ્ત્રી ગગનગામિની .. ૫૧..

ગોત્રપ્રવર્ધિની ગુણ્યા ગુણાતીતા ગુણાગ્રણીઃ .

ગુહામ્બિકા ગિરિસુતા ગોવિન્દાઙ્ઘ્રિસમુદ્ભવા .. ૫૨..

ગુણનીયચરિત્રા ચ ગાયત્રી ગિરિશપ્રિયા .

ગૂઢરૂપા ગુણવતી ગુર્વી ગૌરવવર્ધિની .. ૫૩..

ગ્રહપીડાહરા ગુન્દ્રા ગરઘ્ની ગાનવત્સલા .

ઘર્મહન્ત્રી ઘૃતવતી ઘૃતતુષ્ટિપ્રદાયિની .. ૫૪..

ઘણ્ટારવપ્રિયા ઘોરાઘૌઘવિધ્વંસકારિણી .

ઘ્રાણતુષ્ટિકરી ઘોષા ઘનાનન્દા ઘનપ્રિયા .. ૫૫..

ઘાતુકા ઘૂર્ણિતજલા ઘૃષ્ટપાતકસન્તતિઃ .

ઘટકોટિપ્રપીતાપા ઘટિતાશેષમઙ્ગલા .. ૫૬..

ઘૃણાવતી ઘૃણિનિધિર્ઘસ્મરા ઘૂકનાદિની .

ઘુસૃણાપિઞ્જરતનુર્ઘર્ઘરા ઘર્ઘરસ્વના .. ૫૭..

ચન્દ્રિકા ચન્દ્રકાન્તામ્બુશ્ચઞ્ચદાપા ચલદ્યુતિઃ .

ચિન્મયી ચિતિરૂપા ચ ચન્દ્રાયુતશતાનના .. ૫૮..

ચામ્પેયલોચના ચારુશ્ચાર્વઙ્ગી ચારુગામિની .

ચાર્યા ચારિત્રનિલયા ચિત્રકૃચ્ચિત્રરૂપિણી .. ૫૯..

ચમ્પૂશ્ચન્દનશુચ્યમ્બુશ્ચર્ચનીયા ચિરસ્થિરા .

ચારુચમ્પકમાલાઢ્યા ચમિતાશેષદુષ્કૃતા .. ૬૦..

ચિદાકાશવહા ચિન્ત્યા ચઞ્ચચ્ચામરવીજિતા .

ચોરિતાશેષવૃજિના ચરિતાશેષમણ્ડલા .. ૬૧..

છેદિતાખિલપાપૌઘા છદ્મઘ્ની છલહારિણી .

છન્નત્રિવિષ્ટપતલા છોટિતાશેષબન્ધના .. ૬૨..

છુરિતામૃતધારૌઘા છિન્નૈનાશ્છન્દગામિની .

છત્રીકૃતમરાલૌઘા છટીકૃતનિજામૃતા .. ૬૩..

જાહ્નવી જ્યા જગન્માતા જપ્યા જઙ્ઘાલવીચિકા .

જયા જનાર્દનપ્રીતા જુષણીયા જગદ્ધિતા .. ૬૪..

જીવનં જીવનપ્રાણા જગજ્જ્યેષ્ઠા જગન્મયી .

જીવજીવાતુલતિકા જન્મિજન્મનિબર્હિણી .. ૬૫..

જાડ્યવિધ્વંસનકરી જગદ્યોનિર્જલાવિલા .

જગદાનન્દજનની જલજા જલજેક્ષણા .. ૬૬..

જનલોચનપીયૂષા જટાતટવિહારિણી .

જયન્તી જઞ્જપૂકઘ્ની જનિતજ્ઞાનવિગ્રહા .. ૬૭..

ઝલ્લરીવાદ્યકુશલા ઝલજ્ઝાલજલાવૃતા .

ઝિણ્ટીશવન્દ્યા ઝઙ્કારકારિણી ઝર્ઝરાવતી .. ૬૮..

ટીકિતાશેષપાતાલા ટઙ્કિકૈનોઽદ્રિપાટને .

ટઙ્કારનૃત્યત્કલ્લોલા ટીકનીયમહાતટા .. ૬૯..

ડમ્બરપ્રવહા ડીનરાજહંસકુલાકુલા .

ડમડ્ડમરુહસ્તા ચ ડામરોક્તમહાણ્ડકા .. ૭૦..

ઢૌકિતાશેષનિર્વાણા ઢક્કાનાદચલજ્જલા  .

ઢુણ્ઢિવિઘ્નેશજનની ઢણડ્ઢુણિતપાતકા .. ૭૧..

તર્પણી તીર્થતીર્થા ચ ત્રિપથા ત્રિદશેશ્વરી .

ત્રિલોકગોપ્ત્રી તોયેશી ત્રૈલોક્યપરિવન્દિતા .. ૭૨..

તાપત્રિતયસંહર્ત્રી તેજોબલવિવર્ધિની .

ત્રિલક્ષ્યા તારણી તારા તારાપતિકરાર્ચિતા .. ૭૩..

ત્રૈલોક્યપાવની પુણ્યા તુષ્ટિદા તુષ્ટિરૂપિણી .

તૃષ્ણાચ્છેત્રી તીર્થમાતા ત્રિવિક્રમપદોદ્ભવા .. ૭૪..

તપોમયી તપોરૂપા તપઃસ્તોમફલપ્રદા .  var  પદપ્રદા

ત્રૈલોક્યવ્યાપિની તૃપ્તિસ્તૃપ્તિકૃત્તત્ત્વરૂપિણી .. ૭૫..

ત્રૈલોક્યસુન્દરી તુર્યા તુર્યાતીતફલપ્રદા .

ત્રૈલોક્યલક્ષ્મીસ્ત્રિપદી તથ્યા તિમિરચન્દ્રિકા .. ૭૬..

તેજોગર્ભા તપસ્સારા ત્રિપુરારિશિરોગૃહા .

ત્રયીસ્વરૂપિણી તન્વી તપનાઙ્ગજભીતિનુત્ .. ૭૭..

તરિસ્તરણિજામિત્રં તર્પિતાશેષપૂર્વજા .

તુલાવિરહિતા તીવ્રપાપતૂલતનૂનપાત્ .. ૭૮..

દારિદ્ર્યદમની દક્ષા દુષ્પ્રેક્ષા દિવ્યમણ્ડના .

દીક્ષાવતી દુરાવાપ્યા દ્રાક્ષામધુરવારિભૃત્ .. ૭૯..

દર્શિતાનેકકુતુકા દુષ્ટદુર્જયદુઃખહૃત્ .

દૈન્યહૃદ્દુરિતઘ્ની ચ દાનવારિપદાબ્જજા .. ૮૦..

દન્દશૂકવિષઘ્ની ચ દારિતાઘૌઘસન્તતિઃ .

દ્રુતા દેવદ્રુમચ્છન્ના દુર્વારાઘવિઘાતિની .. ૮૧..

દમગ્રાહ્યા દેવમાતા દેવલોકપ્રદર્શિની .

દેવદેવપ્રિયા દેવી દિક્પાલપદદાયિની .. ૮૨..

દીર્ઘાયુઃ કારિણી દીર્ઘા દોગ્ધ્રી દૂષણવર્જિતા .

દુગ્ધામ્બુવાહિની દોહ્યા દિવ્યા દિવ્યગતિપ્રદા .. ૮૩..

દ્યુનદી દીનશરણં દેહિદેહનિવારિણી .

દ્રાઘીયસી દાઘહન્ત્રી દિતપાતકસન્તતિઃ .. ૮૪..

દૂરદેશાન્તરચરી દુર્ગમા દેવવલ્લભા .

દુર્વૃત્તઘ્ની દુર્વિગાહ્યા દયાધારા દયાવતી .. ૮૫..

દુરાસદા દાનશીલા દ્રાવિણી દ્રુહિણસ્તુતા .

દૈત્યદાનવસંશુદ્ધિકર્ત્રી દુર્બુદ્ધિહારિણી .. ૮૬..

દાનસારા દયાસારા દ્યાવાભૂમિવિગાહિની .

દૃષ્ટાદૃષ્ટફલપ્રાપ્તિર્દેવતાવૃન્દવન્દિતા .. ૮૭..

દીર્ઘવ્રતા દીર્ઘદૃષ્ટિર્દીપ્તતોયા દુરાલભા .

દણ્ડયિત્રી દણ્ડનીતિર્દુષ્ટદણ્ડધરાર્ચિતા .. ૮૮..

દુરોદરઘ્ની દાવાર્ચિર્દ્રવદ્દ્રવ્યૈકશેવધિઃ .

દીનસન્તાપશમની દાત્રી દવથુવૈરિણી .. ૮૯..

દરીવિદારણપરા દાન્તા દાન્તજનપ્રિયા .

દારિતાદ્રિતટા દુર્ગા દુર્ગારણ્યપ્રચારિણી .. ૯૦..

ધર્મદ્રવા ધર્મધુરા ધેનુર્ધીરા ધૃતિર્ધ્રુવા .

ધેનુદાનફલસ્પર્શા ધર્મકામાર્થમોક્ષદા .. ૯૧..

ધર્મોર્મિવાહિની ધુર્યા ધાત્રી ધાત્રીવિભૂષણમ્ .

ધર્મિણી ધર્મશીલા ચ ધન્વિકોટિકૃતાવના .. ૯૨..

ધ્યાતૃપાપહરા ધ્યેયા ધાવની ધૂતકલ્મષા .

ધર્મધારા ધર્મસારા ધનદા ધનવર્ધિની .. ૯૩..

ધર્માધર્મગુણચ્છેત્રી ધત્તૂરકુસુમપ્રિયા .

ધર્મેશી ધર્મશાસ્ત્રજ્ઞા ધનધાન્યસમૃદ્ધિકૃત્ .. ૯૪..

ધર્મલભ્યા ધર્મજલા ધર્મપ્રસવધર્મિણી .

ધ્યાનગમ્યસ્વરૂપા ચ ધરણી ધાતૃપૂજિતા .. ૯૫..

ધૂર્ધૂર્જટિજટાસંસ્થા ધન્યા ધીર્ધારણાવતી .

નન્દા નિર્વાણજનની નન્દિની નુન્નપાતકા .. ૯૬..

નિષિદ્ધવિઘ્નનિચયા નિજાનન્દપ્રકાશિની .

નભોઽઙ્ગણચરી નૂતિર્નમ્યા નારાયણી નુતા .. ૯૭..

નિર્મલા નિર્મલાખ્યાના નાશિની તાપસમ્પદામ્ .

નિયતા નિત્યસુખદા નાનાશ્ચર્યમહાનિધિઃ .. ૯૮..

નદી નદસરોમાતા નાયિકા નાકદીર્ઘિકા .

નષ્ટોદ્ધરણધીરા ચ નન્દના નન્દદાયિની .. ૯૯..

નિર્ણિક્તાશેષભુવના નિઃસઙ્ગા નિરુપદ્રવા .

નિરાલમ્બા નિષ્પ્રપઞ્ચા નિર્ણાશિતમહામલા .. ૧૦૦..

નિર્મલજ્ઞાનજનની નિઃશેષપ્રાણિતાપહૃત્ .

નિત્યોત્સવા નિત્યતૃપ્તા નમસ્કાર્યા નિરઞ્જના .. ૧૦૧..

નિષ્ઠાવતી નિરાતઙ્કા નિર્લેપા નિશ્ચલાત્મિકા .

નિરવદ્યા નિરીહા ચ નીલલોહિતમૂર્ધગા .. ૧૦૨..

નન્દિભૃઙ્ગિગણસ્તુત્યા નાગા નન્દા નગાત્મજા .

નિષ્પ્રત્યૂહા નાકનદી નિરયાર્ણવદીર્ઘનૌઃ .. ૧૦૩..

પુણ્યપ્રદા પુણ્યગર્ભા પુણ્યા પુણ્યતરઙ્ગિણી .

પૃથુઃ પૃથુફલા પૂર્ણા પ્રણતાર્તિપ્રભઞ્જની .. ૧૦૪..

પ્રાણદા પ્રાણિજનની પ્રાણેશી પ્રાણરૂપિણી .

પદ્માલયા પરાશક્તિઃ પુરજિત્પરમપ્રિયા .. ૧૦૫..

પરા પરફલપ્રાપ્તિઃ પાવની ચ પયસ્વિની .

પરાનન્દા પ્રકૃષ્ટાર્થા પ્રતિષ્ઠા પાલિની પરા .. ૧૦૬..  var  પાલની

પુરાણપઠિતા પ્રીતા પ્રણવાક્ષરરૂપિણી .

પાર્વતી પ્રેમસમ્પન્ના પશુપાશવિમોચની .. ૧૦૭..

પરમાત્મસ્વરૂપા ચ પરબ્રહ્મપ્રકાશિની .

પરમાનન્દનિષ્યન્દા પ્રાયશ્ચિત્તસ્વરૂપિણી .. ૧૦૮..  var  નિષ્પન્દા

પાનીયરૂપનિર્વાણા પરિત્રાણપરાયણા .

પાપેન્ધનદવજ્વાલા પાપારિઃ પાપનામનુત્ .. ૧૦૯..

પરમૈશ્વર્યજનની પ્રજ્ઞા પ્રાજ્ઞા પરાપરા .

પ્રત્યક્ષલક્ષ્મીઃ પદ્માક્ષી પરવ્યોમામૃતસ્રવા .. ૧૧૦..

પ્રસન્નરૂપા પ્રણિધિઃ પૂતા પ્રત્યક્ષદેવતા .

પિનાકિપરમપ્રીતા પરમેષ્ઠિકમણ્ડલુઃ .. ૧૧૧..

પદ્મનાભપદાર્ઘ્યેણ પ્રસૂતા પદ્મમાલિની .

પરર્દ્ધિદા પુષ્ટિકરી પથ્યા પૂર્તિઃ પ્રભાવતી .. ૧૧૨..

પુનાના પીતગર્ભઘ્ની પાપપર્વતનાશિની .

ફલિની ફલહસ્તા ચ ફુલ્લામ્બુજવિલોચના .. ૧૧૩..

ફાલિતૈનોમહાક્ષેત્રા ફણિલોકવિભૂષણમ્ .

ફેનચ્છલપ્રણુન્નૈનાઃ ફુલ્લકૈરવગન્ધિની .. ૧૧૪..

ફેનિલાચ્છામ્બુધારાભા ફડુચ્ચાટિતપાતકા .

ફાણિતસ્વાદુસલિલા ફાણ્ટપથ્યજલાવિલા .. ૧૧૫..

વિશ્વમાતા ચ વિશ્વેશી વિશ્વા વિશ્વેશ્વરપ્રિયા .

બ્રહ્મણ્યા બ્રહ્મકૃદ્ બ્રાહ્મી બ્રહ્મિષ્ઠા વિમલોદકા .. ૧૧૬..

વિભાવરી ચ વિરજા વિક્રાન્તાનેકવિષ્ટપા .

વિશ્વમિત્રં વિષ્ણુપદી વૈષ્ણવી વૈષ્ણવપ્રિયા .. ૧૧૭..

વિરૂપાક્ષપ્રિયકરી વિભૂતિર્વિશ્વતોમુખી .

વિપાશા વૈબુધી વેદ્યા વેદાક્ષરરસસ્રવા .. ૧૧૮..

વિદ્યા વેગવતી વન્દ્યા બૃંહણી બ્રહ્મવાદિની .

વરદા વિપ્રકૃષ્ટા ચ વરિષ્ઠા ચ વિશોધની .. ૧૧૯..

વિદ્યાધરી વિશોકા ચ વયોવૃન્દનિષેવિતા .

બહૂદકા બલવતી વ્યોમસ્થા વિબુધપ્રિયા .. ૧૨૦..

વાણી વેદવતી વિત્તા બ્રહ્મવિદ્યાતરઙ્ગિણી .

બ્રહ્માણ્ડકોટિવ્યાપ્તામ્બુર્બ્રહ્મહત્યાપહારિણી .. ૧૨૧..

બ્રહ્મેશવિષ્ણુરૂપા ચ બુદ્ધિર્વિભવવર્ધિની .

વિલાસિસુખદા વશ્યા વ્યાપિની ચ વૃષારણિઃ .. ૧૨૨..

વૃષાઙ્કમૌલિનિલયા વિપન્નાર્તિપ્રભઞ્જની .

વિનીતા વિનતા બ્રધ્નતનયા વિનયાન્વિતા .. ૧૨૩..

વિપઞ્ચી વાદ્યકુશલા વેણુશ્રુતિવિચક્ષણા .

વર્ચસ્કરી બલકરી બલોન્મૂલિતકલ્મષા .. ૧૨૪..

વિપાપ્મા વિગતાતઙ્કા વિકલ્પપરિવર્જિતા .

વૃષ્ટિકર્ત્રી વૃષ્ટિજલા વિધિર્વિચ્છિન્નબન્ધના .. ૧૨૫..

વ્રતરૂપા વિત્તરૂપા બહુવિઘ્નવિનાશકૃત્ .

વસુધારા વસુમતી વિચિત્રાઙ્ગી વિભાવસુઃ .. ૧૨૬..

વિજયા વિશ્વબીજં ચ વામદેવી વરપ્રદા .

વૃષાશ્રિતા વિષઘ્ની ચ વિજ્ઞાનોર્મ્યંશુમાલિની .. ૧૨૭..

ભવ્યા ભોગવતી ભદ્રા ભવાની ભૂતભાવિની .

ભૂતધાત્રી ભયહરા ભક્તદારિદ્ર્યઘાતિની .. ૧૨૮..

ભુક્તિમુક્તિપ્રદા ભેશી ભક્તસ્વર્ગાપવર્ગદા .

ભાગીરથી ભાનુમતી ભાગ્યં ભોગવતી ભૃતિઃ .. ૧૨૯..

ભવપ્રિયા ભવદ્વેષ્ટ્રી ભૂતિદા ભૂતિભૂષણા .

ભાલલોચનભાવજ્ઞા ભૂતભવ્યભવત્પ્રભુઃ .. ૧૩૦..

ભ્રાન્તિજ્ઞાનપ્રશમની ભિન્નબ્રહ્માણ્ડમણ્ડપા .

ભૂરિદા ભક્તસુલભા ભાગ્યવદ્દૃષ્ટિગોચરી .. ૧૩૧..

ભઞ્જિતોપપ્લવકુલા ભક્ષ્યભોજ્યસુખપ્રદા .

ભિક્ષણીયા ભિક્ષુમાતા ભાવા ભાવસ્વરૂપિણી .. ૧૩૨..

મન્દાકિની મહાનન્દા માતા મુક્તિતરઙ્ગિણી .

મહોદયા મધુમતી મહાપુણ્યા મુદાકરી .. ૧૩૩..

મુનિસ્તુતા મોહહન્ત્રી મહાતીર્થા મધુસ્રવા .

માધવી માનિની માન્યા મનોરથપથાતિગા .. ૧૩૪..

મોક્ષદા મતિદા મુખ્યા મહાભાગ્યજનાશ્રિતા .

મહાવેગવતી મેધ્યા મહા મહિમભૂષણા .. ૧૩૫..

મહાપ્રભાવા મહતી મીનચઞ્ચલલોચના .

મહાકારુણ્યસમ્પૂર્ણા મહર્દ્ધિશ્ચ મહોત્પલા .. ૧૩૬..

મૂર્તિમન્મુક્તિરમણી મણિમાણિક્યભૂષણા .

મુક્તાકલાપનેપથ્યા મનોનયનનન્દિની .. ૧૩૭..

મહાપાતકરાશિઘ્ની મહાદેવાર્ધહારિણી .

મહોર્મિમાલિની મુક્તા મહાદેવી મનોન્મની .. ૧૩૮..

મહાપુણ્યોદયપ્રાપ્યા માયાતિમિરચન્દ્રિકા .

મહાવિદ્યા મહામાયા મહામેધા મહૌષધમ્ .. ૧૩૯..

માલાધરી મહોપાયા મહોરગવિભૂષણા .

મહામોહપ્રશમની મહામઙ્ગલમઙ્ગલમ્ .. ૧૪૦..

માર્તણ્ડમણ્ડલચરી મહાલક્ષ્મીર્મદોજ્ઝિતા .

યશસ્વિની યશોદા ચ યોગ્યા યુક્તાત્મસેવિતા .. ૧૪૧..

યોગસિદ્ધિપ્રદા યાજ્યા યજ્ઞેશપરિપૂરિતા .

યજ્ઞેશી યજ્ઞફલદા યજનીયા યશસ્કરી .. ૧૪૨..

યમિસેવ્યા યોગયોનિર્યોગિની યુક્તબુદ્ધિદા .

યોગજ્ઞાનપ્રદા યુક્તા યમાદ્યષ્ટાઙ્ગયોગયુક્ .. ૧૪૩..

યન્ત્રિતાઘૌઘસઞ્ચારા યમલોકનિવારિણી .

યાતાયાતપ્રશમની યાતનાનામકૃન્તની .. ૧૪૪..

યામિનીશહિમાચ્છોદા યુગધર્મવિવર્જિતા .

રેવતી રતિકૃદ્ રમ્યા રત્નગર્ભા રમા રતિઃ .. ૧૪૫..

રત્નાકરપ્રેમપાત્રં રસજ્ઞા રસરૂપિણી .

રત્નપ્રાસાદગર્ભા ચ રમણીયતરઙ્ગિણી .. ૧૪૬..

રત્નાર્ચી રુદ્રરમણી રાગદ્વેષવિનાશિની .

રમા રામા રમ્યરૂપા રોગિજીવાનુરૂપિણી .. ૧૪૭..

રુચિકૃદ્ રોચની રમ્યા રુચિરા રોગહારિણી .

રાજહંસા રત્નવતી રાજત્કલ્લોલરાજિકા .. ૧૪૮..

રામણીયકરેખા ચ રુજારી રોગરોષિણી .  var  રોગશોષિણી

રાકા રઙ્કાર્તિશમની રમ્યા રોલમ્બરાવિણી .. ૧૪૯..

રાગિણી રઞ્જિતશિવા રૂપલાવણ્યશેવધિઃ .

લોકપ્રસૂર્લોકવન્દ્યા લોલત્કલ્લોલમાલિની .. ૧૫૦..

લીલાવતી લોકભૂમિર્લોકલોચનચન્દ્રિકા .

લેખસ્રવન્તી લટભા લઘુવેગા લઘુત્વહૃત્ .. ૧૫૧..

લાસ્યત્તરઙ્ગહસ્તા ચ લલિતા લયભઙ્ગિગા .

લોકબન્ધુર્લોકધાત્રી લોકોત્તરગુણોર્જિતા .. ૧૫૨..

લોકત્રયહિતા લોકા લક્ષ્મીર્લક્ષણલક્ષિતા .

લીલા લક્ષિતનિર્વાણા લાવણ્યામૃતવર્ષિણી .. ૧૫૩..

વૈશ્વાનરી વાસવેડ્યા વન્ધ્યત્વપરિહારિણી .

વાસુદેવાઙ્ઘ્રિરેણુઘ્ની વજ્રિવજ્રનિવારિણી .. ૧૫૪..

શુભાવતી શુભફલા શાન્તિઃ શન્તનુવલ્લભા .  var  શાન્તનુ

શૂલિની શૈશવવયાઃ શીતલામૃતવાહિની .. ૧૫૫..

શોભાવતી શીલવતી શોષિતાશેષકિલ્બિષા .

શરણ્યા શિવદા શિષ્ટા શરજન્મપ્રસૂઃશિવા .. ૧૫૬..

શક્તિઃ શશાઙ્કવિમલા શમનસ્વસૃસમ્મતા .

શમા શમનમાર્ગઘ્ની શિતિકણ્ઠમહાપ્રિયા .. ૧૫૭..

શુચિઃ શુચિકરી શેષા શેષશાયિપદોદ્ભવા .

શ્રીનિવાસશ્રુતિઃ શ્રદ્ધા શ્રીમતી શ્રીઃ શુભવ્રતા .. ૧૫૮..

શુદ્ધવિદ્યા શુભાવર્તા શ્રુતાનન્દા શ્રુતિસ્તુતિઃ .

શિવેતરઘ્ની શબરી શામ્બરીરૂપધારિણી .. ૧૫૯..

શ્મશાનશોધની શાન્તા શશ્વચ્છતધૃતિસ્તુતા .

શાલિની શાલિશોભાઢ્યા શિખિવાહનગર્ભભૃત્ .. ૧૬૦..

શંસનીયચરિત્રા ચ શાતિતાશેષપાતકા .

ષડ્ગુણૈશ્વર્યસમ્પન્ના ષડઙ્ગશ્રુતિરૂપિણી .. ૧૬૧..

ષણ્ઢતાહારિસલિલા સ્ત્યાયન્નદનદીશતા .

સરિદ્વારા ચ સુરસા સુપ્રભા સુરદીર્ઘિકા .. ૧૬૨..

સ્વઃ સિન્ધુઃ સર્વદુઃખઘ્ની સર્વવ્યાધિમહૌષધમ્ .

સેવ્યા સિદ્ધિઃ સતી સૂક્તિઃ સ્કન્દસૂશ્ચ સરસ્વતી .. ૧૬૩..

સમ્પત્તરઙ્ગિણી સ્તુત્યા સ્થાણુમૌલિકૃતાલયા .

સ્થૈર્યદા સુભગા સૌખ્યા સ્ત્રીષુ સૌભાગ્યદાયિની .. ૧૬૪..

સ્વર્ગનિઃશ્રેણિકા સૂમા સ્વધા સ્વાહા સુધાજલા .  var  સૂક્ષ્મા

સમુદ્રરૂપિણી સ્વર્ગ્યા સર્વપાતકવૈરિણી .. ૧૬૫..

સ્મૃતાઘહારિણી સીતા સંસારાબ્ધિતરણ્ડિકા .

સૌભાગ્યસુન્દરી સન્ધ્યા સર્વસારસમન્વિતા .. ૧૬૬..

હરપ્રિયા હૃષીકેશી હંસરૂપા હિરણ્મયી .

હૃતાઘસઙ્ઘા હિતકૃદ્ધેલા હેલાઘગર્વહૃત્ .. ૧૬૭..

ક્ષેમદા ક્ષાલિતાઘૌઘા ક્ષુદ્રવિદ્રાવિણી ક્ષમા .

ગઙ્ગેતિ નામસાહસ્રં ગઙ્ગાયાઃ કલશોદ્ભવ .  var  ઇતિ નામસહસ્રં હિ

કીર્તયિત્વા નરઃ સમ્યગ્ગઙ્ગાસ્નાનફલં લભેત્ .. ૧૬૮..

સર્વપાપપ્રશમનં સર્વવિઘ્નવિનાશનમ્ .

સર્વસ્તોત્રજપાચ્છ્રેષ્ઠં સર્વપાવનપાવનમ્ .. ૧૬૯..

શ્રદ્ધયાભીષ્ટફલદં ચતુર્વર્ગસમૃદ્ધિકૃત્ .

સકૃજ્જપાદવાપ્નોતિ હ્યેકક્રતુફલં મુને .. ૧૭૦..

સર્વતીર્થેષુ યઃ સ્નાતઃ સર્વયજ્ઞેષુ દીક્ષિતઃ .

તસ્ય યત્ફલમુદ્દિષ્ટં ત્રિકાલપઠનાચ્ચ તત્ .. ૧૭૧..

સર્વવ્રતેષુ યત્પુણ્યં સમ્યક્ચીર્ણેષુ વાડવ .

તત્ફલં સમવાપ્નોતિ ત્રિસન્ધ્યં નિયતઃ પઠન્ .. ૧૭૨..

સ્નાનકાલે પઠેદ્યસ્તુ યત્ર કુત્ર જલાશયે .

તત્ર સન્નિહિતા નૂનં ગઙ્ગા ત્રિપથગા મુને .. ૧૭૩..

શ્રેયોઽર્થી લભતે શ્રેયો ધનાર્થી લભતે ધનમ્ .

કામી કામાનવાપ્નોતિ મોક્ષાર્થી મોક્ષમાપ્નુયાત્ .. ૧૭૪..

વર્ષં ત્રિકાલપઠનાચ્છ્રદ્ધયા શુચિમાનસઃ .

ઋતુકાલાભિગમનાદપુત્રઃ  પુત્રવાન્ ભવેત્ .. ૧૭૫..

નાકાલમરણં તસ્ય નાગ્નિચોરાહિસાધ્વસમ્ .

નામ્નાં સહસ્રં ગઙ્ગાયા યો જપેચ્છ્રદ્ધયા મુને .. ૧૭૬..

ગઙ્ગાનામસહસ્રં તુ જપ્ત્વા ગ્રામાન્તરં વ્રજેત્ .

કાર્યસિદ્ધિમવાપ્નોતિ નિર્વિઘ્નો ગેહમાવિશેત્ .. ૧૭૭..

તિથિવારર્ક્ષયોગાનાં ન દોષઃ પ્રભવેત્તદા .

યદા જપ્ત્વા વ્રજેદેતત્ સ્તોત્રં ગ્રામાન્તરં નરઃ .. ૧૭૮..

આયુરારોગ્યજનનં સર્વોપદ્રવનાશનમ્ .

સર્વસિદ્ધિકરં પુંસાં ગઙ્ગાનામસહસ્રકમ્ .. ૧૭૯..

જન્માન્તરસહસ્રેષુ યત્પાપં સમ્યગર્જિતમ્ .

ગઙ્ગાનામસહસ્રસ્ય જપનાત્તત્ક્ષયં વ્રજેત્ .. ૧૮૦..

બ્રહ્મઘ્નો મદ્યપઃ સ્વર્ણસ્તેયી ચ ગુરુતલ્પગઃ .

તત્સંયોગી ભ્રૂણહન્તા માતૃહા પિતૃહા મુને .. ૧૮૧..

વિશ્વાસઘાતી ગરદઃ કૃતઘ્નો મિત્રઘાતકઃ .

અગ્નિદો ગોવધકરો ગુરુદ્રવ્યાપહારકઃ .. ૧૮૨..

મહાપાતકયુક્તોઽપિ સંયુક્તોઽપ્યુપપાતકૈઃ .

મુચ્યતે શ્રદ્ધયા જપ્ત્વા ગઙ્ગાનામસહસ્રકમ્ .. ૧૮૩..

આધિવ્યાધિપરિક્ષિપ્તો ઘોરતાપપરિપ્લુતઃ .

મુચ્યતે સર્વદુઃખેભ્યઃ સ્તવસ્યાસ્યાનુકીર્તનાત્ .. ૧૮૪..

સંવત્સરેણ યુક્તાત્મા પઠન્ ભક્તિપરાયણઃ .

અભીપ્સિતાં લભેત્સિદ્ધિં સર્વૈઃ પાપૈઃ પ્રમુચ્યતે .. ૧૮૫..

સંશયાવિષ્ટચિત્તસ્ય ધર્મવિદ્વેષિણોઽપિ ચ .

દામ્ભિકસ્યાપિ હિંસ્રસ્ય ચેતો ધર્મપરં ભવેત્ .. ૧૮૬..

વર્ણાશ્રમપથીનસ્તુ કામક્રોધવિવર્જિતઃ .

યત્ફલં લભતે જ્ઞાની તદાપ્નોત્યસ્ય કીર્તનાત્ .. ૧૮૭..

ગાયત્ર્યયુતજપ્યેન યત્ફલં સમુપાર્જિતમ્ .

સકૃત્પઠનતઃ સમ્યક્તદશેષમવાપ્નુયાત્ .. ૧૮૮..

ગાં દત્ત્વા વેદવિદુષે યત્ફલં લભતે કૃતી .

તત્પુણ્યં સમ્યગાખ્યાતં સ્તવરાજસકૃજ્જપાત્ .. ૧૮૯..

ગુરુશુશ્રૂષણં કુર્વન્ યાવજ્જીવં નરોત્તમઃ .

યત્પુણ્યમર્જયેત્તદ્ભાગ્વર્ષં ત્રિષવણં જપન્ .. ૧૯૦..

વેદપારાયણાત્પુણ્યં યદત્ર પરિપઠ્યતે .

તત્ષણ્માસેન લભતે ત્રિસન્ધ્યં પરિકીર્તનાત્ .. ૧૯૧..

ગઙ્ગાયાઃ સ્તવરાજસ્ય પ્રત્યહં પરિશીલનાત્ .

શિવભક્તિમવાપ્નોતિ વિષ્ણુભક્તોઽથવા ભવેત્ .. ૧૯૨..

યઃ કીર્તયેદનુદિનં ગઙ્ગાનામસહસ્રકમ્ .

તત્સમીપે સહચરી ગઙ્ગાદેવી સદા ભવેત્ .. ૧૯૩..

સર્વત્ર પૂજ્યો ભવતિ સર્વત્ર વિજયી ભવેત્ .

સર્વત્ર સુખમાપ્નોતિ જાહ્નવીસ્તોત્રપાઠતઃ .. ૧૯૪..

સદાચારી સ વિજ્ઞેયઃ સ શુચિસ્તુ સદૈવ હિ .

કૃતસર્વસુરાર્ચઃ સ કીર્તયેદ્ય ઇમાં સ્તુતિમ્ .. ૧૯૫..

તસ્મિંસ્તૃપ્તે ભવેત્ તૃપ્તા જાહ્નવી નાત્ર સંશયઃ .

તસ્માત્સર્વપ્રયત્નેન ગઙ્ગાભક્તં સમર્ચયેત્ .. ૧૯૬..

સ્તવરાજમિમં ગાઙ્ગં શૃણુયાદ્યશ્ચ વૈ પઠેત્ .

શ્રાવયેદથ તદ્ભક્તાન્ દમ્ભલોભવિવર્જિતઃ .. ૧૯૭..

મુચ્યતે ત્રિવિધૈઃ પાપૈર્મનોવાક્કાયસમ્ભવૈઃ .

ક્ષણાન્નિષ્પાપતામેતિ પિતૄણાં ચ પ્રિયો ભવેત્ .. ૧૯૮..

સર્વદેવપ્રિયશ્ચાપિ સર્વર્ષિગણસમ્મતઃ .

અન્તે વિમાનમારુહ્યં દિવ્યસ્ત્રીશતસંવૃતઃ .. ૧૯૯..

દિવ્યાભરણસમ્પન્નો દિવ્યભોગસમન્વિતઃ .

નન્દનાદિવને સ્વૈરં દેવવત્સ પ્રમોદતે .. ૨૦૦..

ભુજ્યમાનેષુ વિપ્રેષુ શ્રાદ્ધકાલે વિશેષતઃ .

જપન્નિદં મહાસ્તોત્રં પિતૄણાં તૃપ્તિકારકમ્ .. ૨૦૧..

યાવન્તિ તત્ર સિક્થાનિ યાવન્તોઽમ્બુકણાઃ સ્થિતાઃ .

તાવન્ત્યેવ હિ વર્ષાણિ મોદન્તે સ્વપિતામહાઃ .. ૨૦૨..

યથા પ્રીણન્તિ પિતરો પ્રીણન્તિ ગઙ્ગાયાં પિણ્ડદાનતઃ .

તથૈવ તૃપ્નુયુઃ શ્રાદ્ધે સ્તવસ્યાસ્યાનુસંશ્રવાત્  .. ૨૦૩..

એતત્સ્તોત્રં ગૃહે યસ્ય લિખિતં પરિપૂજ્યતે .

તત્ર પાપભયં નાસ્તિ શુચિ તદ્ભવનં સદા .. ૨૦૪..

અગસ્તે કિં બહૂક્તેન શૃણુ મે નિશ્ચિતં વચઃ .

સંશયો નાત્ર કર્તવ્યઃ સન્દેગ્ધરિ ફલં નહિ .. ૨૦૫..

યાવન્તિ મર્ત્યે સ્તોત્રાણિ મન્ત્રજાલાન્યનેકશઃ .

તાવન્તિ સ્તવરાજસ્ય ગાઙ્ગેયસ્ય સમાનિ ન .. ૨૦૬..

યાવજ્જન્મ જપેદ્યસ્તુ નામ્નામેતત્સહસ્રકમ્ .

સ કીકટેષ્વપિ મૃતો ન પુનર્ગર્ભમાવિશેત્ .. ૨૦૭..

નિત્યં નિયમવાનેતદ્યો જપેત્સ્તોત્રમુત્તમમ્ .

અન્યત્રાપિ વિપન્નઃ સ ગઙ્ગાતીરે મૃતો ભવેત્ .. ૨૦૮..

એતત્સ્તોત્રવરં રમ્યં પુરા પ્રોક્તં પિનાકિના .

વિષ્ણવે નિજભક્તાય મુક્તિબીજાક્ષરાસ્પદમ્ .. ૨૦૯..

ગઙ્ગાસ્નાનપ્રતિનિધિઃ સ્તોત્રમેતન્મયેરિતમ્ .

સિસ્નાસુર્જાહ્નવીં તસ્માદેતત્સ્તોત્રં જપેત્સુધીઃ .. ૨૧૦..

.. ઇતિ શ્રીસ્કન્દપુરાણે એકાશીતિસાહસ્ર્યાં

સંહિતાયાં ચતુર્થૈકાશીખણ્ડેપૂર્વાર્ધે

ગઙ્ગાસહસ્રનામકથનં નામૈકોનત્રિંશત્તમોઽધ્યાયઃ ..

સિતમકરનિષણ્ણાં શુભ્રવર્ણાં ત્રિનેત્રાં

    કરધૃતકલશોદ્યત્સોપલાભીત્યભીષ્ટામ્ .

વિધિહરિરૂપાં સેન્દુકોટીરજૂટાં

    કલિતસિતદુકૂલાં જાહ્નવી તાં નમામિ ..

Encoded and proofread by DPD, Kirk Wortman