#যমুনাষ্টকম্ ১

 

        ॥ শ্রীঃ ॥

মুরারিকায়কালিমাললামবারিধারিণী
তৃণীকৃতত্রিবিষ্টপা ত্রিলোকশোকহারিণী ।
মনোঽনুকূলকূলকুঞ্জপুঞ্জধূতদুর্মদা
ধুনোতু নো মনোমলং কলিন্দনন্দিনী সদা ॥ ১॥

মলাপহারিবারিপূরিভূরিমণ্ডিতামৃতা
ভৃশং প্রবাতকপ্রপঞ্চনাতিপণ্ডিতানিশা ।
সুনন্দনন্দিনাঙ্গসঙ্গরাগরঞ্জিতা হিতা
ধুনোতু নো মনোমলং কলিন্দনন্দিনী সদা ॥ ২॥

লসত্তরঙ্গসঙ্গধূতভূতজাতপাতকা
নবীনমাধুরীধুরীণভক্তিজাতচাতকা ।
তটান্তবাসদাসহংসসংসৃতাহ্নিকামদা
 var1  সংসৃতা হি কামদা  var2 সম্বৃতাহ্নিকামদা
ধুনোতু নো মনোমলং কলিন্দনন্দিনী সদা ॥ ৩॥

বিহাররাসস্বেদভেদধীরতীরমারুতা
গতা গিরামগোচরে যদীয়নীরচারুতা ।
প্রবাহসাহচর্যপূতমেদিনীনদীনদা
ধুনোতু নো মনোমলং কলিন্দনন্দিনী সদা ॥ ৪॥

তরঙ্গসঙ্গসৈকতান্তরাতিতং সদাসিতা
শরন্নিশাকরাংশুমঞ্জুমঞ্জরী সভাজিতা ।
ভবার্চনাপ্রচারুণাম্বুনাধুনা বিশারদা
ধুনোতু নো মনোমলং কলিন্দনন্দিনী সদা ॥ ৫॥

জলান্তকেলিকারিচারুরাধিকাঙ্গরাগিণী
স্বভর্তুরন্যদুর্লভাঙ্গতাঙ্গতাংশভাগিনী ।
স্বদত্তসুপ্তসপ্তসিন্ধুভেদিনাতিকোবিদা
ধুনোতু নো মনোমলং কলিন্দনন্দিনী সদা ॥ ৬॥

জলচ্যুতাচ্যুতাঙ্গরাগলম্পটালিশালিনী
বিলোলরাধিকাকচান্তচম্পকালিমালিনী ।
সদাবগাহনাবতীর্ণভর্তৃভৃত্যনারদা
ধুনোতু নো মনোমলং কলিন্দনন্দিনী সদা ॥ ৭॥

সদৈব নন্দিনন্দকেলিশালিকুঞ্জমঞ্জুলা
তটোত্থফুল্লমল্লিকাকদম্বরেণুসূজ্জ্বলা ।
জলাবগাহিনাং নৃণাং ভবাব্ধিসিন্ধুপারদা
ধুনোতু নো মনোমলং কলিন্দনন্দিনী সদা ॥ ৮॥

ইতি শ্রীমৎপরমহংসপরিব্রাজকাচার্যস্য
শ্রীগোবিন্দভগবৎপূজ্যপাদশিষ্যস্য
শ্রীমচ্ছঙ্করভগবতঃ কৃতৌ
যমুনাষ্টকম্ সম্পূর্ণম্  ॥



Encoded and proofread by Sridhar Seshagiri