#ଯମୁନାଷ୍ଟକମ୍ ୧

 

        ॥ ଶ୍ରୀଃ ॥

ମୁରାରିକାୟକାଲିମାଲଲାମବାରିଧାରିଣୀ
ତୃଣୀକୃତତ୍ରିବିଷ୍ଟପା ତ୍ରିଲୋକଶୋକହାରିଣୀ ।
ମନୋଽନୁକୂଲକୂଲକୁଞ୍ଜପୁଞ୍ଜଧୂତଦୁର୍ମଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୧॥

ମଲାପହାରିବାରିପୂରିଭୂରିମଣ୍ଡିତାମୃତା
ଭୃଶଂ ପ୍ରବାତକପ୍ରପଞ୍ଚନାତିପଣ୍ଡିତାନିଶା ।
ସୁନନ୍ଦନନ୍ଦିନାଙ୍ଗସଙ୍ଗରାଗରଞ୍ଜିତା ହିତା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୨॥

ଲସତ୍ତରଙ୍ଗସଙ୍ଗଧୂତଭୂତଜାତପାତକା
ନବୀନମାଧୁରୀଧୁରୀଣଭକ୍ତିଜାତଚାତକା ।
ତଟାନ୍ତବାସଦାସହଂସସଂସୃତାହ୍ନିକାମଦା
 var1  ସଂସୃତା ହି କାମଦା  var2 ସମ୍ବୃତାହ୍ନିକାମଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୩॥

ବିହାରରାସସ୍ୱେଦଭେଦଧୀରତୀରମାରୁତା
ଗତା ଗିରାମଗୋଚରେ ଯଦୀୟନୀରଚାରୁତା ।
ପ୍ରବାହସାହଚର୍ୟପୂତମେଦିନୀନଦୀନଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୪॥

ତରଙ୍ଗସଙ୍ଗସୈକତାନ୍ତରାତିତଂ ସଦାସିତା
ଶରନ୍ନିଶାକରାଂଶୁମଞ୍ଜୁମଞ୍ଜରୀ ସଭାଜିତା ।
ଭବାର୍ଚନାପ୍ରଚାରୁଣାମ୍ବୁନାଧୁନା ବିଶାରଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୫॥

ଜଲାନ୍ତକେଲିକାରିଚାରୁରାଧିକାଙ୍ଗରାଗିଣୀ
ସ୍ୱଭର୍ତୁରନ୍ୟଦୁର୍ଲଭାଙ୍ଗତାଙ୍ଗତାଂଶଭାଗିନୀ ।
ସ୍ୱଦତ୍ତସୁପ୍ତସପ୍ତସିନ୍ଧୁଭେଦିନାତିକୋବିଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୬॥

ଜଲଚ୍ୟୁତାଚ୍ୟୁତାଙ୍ଗରାଗଲମ୍ପଟାଲିଶାଲିନୀ
ବିଲୋଲରାଧିକାକଚାନ୍ତଚମ୍ପକାଲିମାଲିନୀ ।
ସଦାବଗାହନାବତୀର୍ଣଭର୍ତୃଭୃତ୍ୟନାରଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୭॥

ସଦୈବ ନନ୍ଦିନନ୍ଦକେଲିଶାଲିକୁଞ୍ଜମଞ୍ଜୁଲା
ତଟୋତ୍ଥଫୁଲ୍ଲମଲ୍ଲିକାକଦମ୍ବରେଣୁସୂଜ୍ଜ୍ୱଲା ।
ଜଲାବଗାହିନାଂ ନୃଣାଂ ଭବାବ୍ଧିସିନ୍ଧୁପାରଦା
ଧୁନୋତୁ ନୋ ମନୋମଲଂ କଲିନ୍ଦନନ୍ଦିନୀ ସଦା ॥ ୮॥

ଇତି ଶ୍ରୀମତ୍ପରମହଂସପରିବ୍ରାଜକାଚାର୍ୟସ୍ୟ
ଶ୍ରୀଗୋବିନ୍ଦଭଗବତ୍ପୂଜ୍ୟପାଦଶିଷ୍ୟସ୍ୟ
ଶ୍ରୀମଚ୍ଛଙ୍କରଭଗବତଃ କୃତୌ
ଯମୁନାଷ୍ଟକମ୍ ସମ୍ପୂର୍ଣମ୍  ॥



Encoded and proofread by Sridhar Seshagiri