#ଯମୁନାଷ୍ଟକମ୍ ୨

 

        ॥ ଶ୍ରୀଃ॥

କୃପାପାରାବାରାଂ ତପନତନୟାଂ ତାପଶମନୀଂ
ମୁରାରିପ୍ରେୟସ୍ୟାଂ ଭବଭୟଦବାଂ ଭକ୍ତିବରଦାମ୍ ।
ବିୟଜ୍ଜ୍ୱାଲୋନ୍ମୁକ୍ତାଂ ଶ୍ରିୟମପି ସୁଖାପ୍ତେଃ ପରିଦିନଂ
ସଦା ଧୀରୋ ନୂନଂ ଭଜତି ଯମୁନାଂ ନିତ୍ୟଫଲଦାମ୍ ॥ ୧॥

ମଧୁବନଚାରିଣି ଭାସ୍କରବାହିନି ଜାହ୍ନବିସଙ୍ଗିନି ସିନ୍ଧୁସୁତେ
ମଧୁରିପୁଭୂଷଣି ମାଧବତୋଷିଣି ଗୋକୁଲଭୀତିବିନାଶକୃତେ ।
ଜଗଦଘମୋଚିନି ମାନସଦାୟିନି କେଶବକେଲିନିଦାନଗତେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୨॥

ଅୟି ମଧୁରେ ମଧୁମୋଦବିଲାସିନି ଶୈଲବିଦାରିଣି ବେଗପରେ
ପରିଜନପାଲିନି ଦୁଷ୍ଟନିଷୂଦିନି ବାଞ୍ଛିତକାମବିଲାସଧରେ ।
ବ୍ରଜପୁରବାସିଜନାର୍ଜିତପାତକହାରିଣି ବିଶ୍ୱଜନୋଦ୍ଧରିକେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୩॥

ଅତିବିପଦମ୍ବୁଧିମଗ୍ନଜନଂ ଭବତାପଶତାକୁଲମାନସକଂ
ଗତିମତିହୀନମଶେଷଭୟାକୁଲମାଗତପାଦସରୋଜୟୁଗମ୍ ।
ଋଣଭୟଭୀତିମନିଷ୍କୃତିପାତକକୋଟିଶତାୟୁତପୁଞ୍ଜତରଂ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୪॥

ନବଜଲଦଦ୍ୟୁତିକୋଟିଲସତ୍ତନୁହେମଭୟାଭରରଞ୍ଜିତକେ
ତଡିଦବହେଲିପଦାଞ୍ଚଲଚଞ୍ଚଲଶୋଭିତପୀତସୁଚେଲଧରେ ।
ମଣିମୟଭୂଷଣଚିତ୍ରପଟାସନରଞ୍ଜିତଗଞ୍ଜିତଭାନୁକରେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୫॥

ଶୁଭପୁଲିନେ ମଧୁମତ୍ତୟଦୂଦ୍ଭବରାସମହୋତ୍ସବକେଲିଭରେ
ଉଚ୍ଚକୁଲାଚଲରାଜିତମୌକ୍ତିକହାରମୟାଭରରୋଦସିକେ ।
ନବମଣିକୋଟିକଭାସ୍କରକଞ୍ଚୁକିଶୋଭିତତାରକହାରୟୁତେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୬॥

କରିବରମୌକ୍ତିକନାସିକଭୂଷଣବାତଚମତ୍କୃତଚଞ୍ଚଲକେ
ମୁଖକମଲାମଲସୌରଭଚଞ୍ଚଲମତ୍ତମଧୁବ୍ରତଲୋଚନିକେ ।
ମଣିଗଣକୁଣ୍ଡଲଲୋଲପରିସ୍ଫୁରଦାକୁଲଗଣ୍ଡୟୁଗାମଲକେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୭॥

କଲରବନୂପୁରହେମମୟାଚିତପାଦସରୋରୁହସାରୁଣିକେ
ଧିମିଧିମିଧିମିଧିମିତାଲବିନୋଦିତମାନସମଞ୍ଜୁଲପାଦଗତେ ।
ତବ ପଦପଙ୍କଜମାଶ୍ରିତମାନବଚିତ୍ତସଦାଖିଲତାପହରେ
ଜୟ ଯମୁନେ ଜୟ ଭୀତିନିବାରିଣି ସଙ୍କଟନାଶିନି ପାବୟ ମାମ୍ ॥ ୮॥

ଭବୋତ୍ତାପାମ୍ଭୋଧୌ ନିପତିତଜନୋ ଦୁର୍ଗତିୟୁତୋ
ଯଦି ସ୍ତୌତି ପ୍ରାତଃ ପ୍ରତିଦିନମନ୍ୟାଶ୍ରୟତୟା ।
ହୟାହ୍ରେଷୈଃ କାମଂ କରକୁସୁମପୁଞ୍ଜୈ ରବିସୁତାଂ
ସଦା ଭୋକ୍ତା ଭୋଗାନ୍ମରଣସମୟେ ଯାତି ହରିତାମ୍ ॥ ୯॥

ଇତି ଶ୍ରୀମତ୍ପରମହଂସପରିବ୍ରାଜକାଚାର୍ୟସ୍ୟ
ଶ୍ରୀଗୋବିନ୍ଦଭଗବତ୍ପୂଜ୍ୟପାଦଶିଷ୍ୟସ୍ୟ
ଶ୍ରୀମଚ୍ଛଙ୍କରଭଗବତଃ କୃତୌ
ଯମୁନାଷ୍ଟକମ୍ ସମ୍ପୂର୍ଣମ୍ ॥



Encoded by Sridhar Seshagiri