#যমুনাষ্টকম্ ২

 
        ॥ শ্রীঃ॥

কৃপাপারাবারাং তপনতনয়াং তাপশমনীং
মুরারিপ্রেয়স্যাং ভবভয়দবাং ভক্তিবরদাম্ ।
বিয়জ্জ্বালোন্মুক্তাং শ্রিয়মপি সুখাপ্তেঃ পরিদিনং
সদা ধীরো নূনং ভজতি যমুনাং নিত্যফলদাম্ ॥ ১॥

মধুবনচারিণি ভাস্করবাহিনি জাহ্নবিসঙ্গিনি সিন্ধুসুতে
মধুরিপুভূষণি মাধবতোষিণি গোকুলভীতিবিনাশকৃতে ।
জগদঘমোচিনি মানসদায়িনি কেশবকেলিনিদানগতে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ২॥

অয়ি মধুরে মধুমোদবিলাসিনি শৈলবিদারিণি বেগপরে
পরিজনপালিনি দুষ্টনিষূদিনি বাঞ্ছিতকামবিলাসধরে ।
ব্রজপুরবাসিজনার্জিতপাতকহারিণি বিশ্বজনোদ্ধরিকে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৩॥

অতিবিপদম্বুধিমগ্নজনং ভবতাপশতাকুলমানসকং
গতিমতিহীনমশেষভয়াকুলমাগতপাদসরোজয়ুগম্ ।
ঋণভয়ভীতিমনিষ্কৃতিপাতককোটিশতায়ুতপুঞ্জতরং
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৪॥

নবজলদদ্যুতিকোটিলসত্তনুহেমভয়াভররঞ্জিতকে
তডিদবহেলিপদাঞ্চলচঞ্চলশোভিতপীতসুচেলধরে ।
মণিময়ভূষণচিত্রপটাসনরঞ্জিতগঞ্জিতভানুকরে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৫॥

শুভপুলিনে মধুমত্তয়দূদ্ভবরাসমহোৎসবকেলিভরে
উচ্চকুলাচলরাজিতমৌক্তিকহারময়াভররোদসিকে ।
নবমণিকোটিকভাস্করকঞ্চুকিশোভিততারকহারয়ুতে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৬॥

করিবরমৌক্তিকনাসিকভূষণবাতচমৎকৃতচঞ্চলকে
মুখকমলামলসৌরভচঞ্চলমত্তমধুব্রতলোচনিকে ।
মণিগণকুণ্ডললোলপরিস্ফুরদাকুলগণ্ডয়ুগামলকে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৭॥

কলরবনূপুরহেমময়াচিতপাদসরোরুহসারুণিকে
ধিমিধিমিধিমিধিমিতালবিনোদিতমানসমঞ্জুলপাদগতে ।
তব পদপঙ্কজমাশ্রিতমানবচিত্তসদাখিলতাপহরে
জয় যমুনে জয় ভীতিনিবারিণি সঙ্কটনাশিনি পাবয় মাম্ ॥ ৮॥

ভবোত্তাপাম্ভোধৌ নিপতিতজনো দুর্গতিয়ুতো
যদি স্তৌতি প্রাতঃ প্রতিদিনমন্যাশ্রয়তয়া ।
হয়াহ্রেষৈঃ কামং করকুসুমপুঞ্জৈ রবিসুতাং
সদা ভোক্তা ভোগান্মরণসময়ে যাতি হরিতাম্ ॥ ৯॥

ইতি শ্রীমৎপরমহংসপরিব্রাজকাচার্যস্য
শ্রীগোবিন্দভগবৎপূজ্যপাদশিষ্যস্য
শ্রীমচ্ছঙ্করভগবতঃ কৃতৌ
যমুনাষ্টকম্ সম্পূর্ণম্ ॥



Encoded by Sridhar Seshagiri