શ્રીગણેશાય નમઃ ..
સૂત ઉવાચ --
શૃણુધ્વં મુનયઃ સર્વે ગઙ્ગાસ્તવમનુત્તમમ્ .
શોકમોહહરં પુંસામૃષિભિઃ પરિકીર્તિતમ્ .. ૧..
ઋષય ઊચુઃ --
ઇયં સુરતરઙ્ગિણી ભવનવારિધેસ્તારિણી
સ્તુતા હરિપદામ્બુજાદુપગતા જગત્સંસદઃ .
સુમેરુશિખરામરપ્રિયજલામલક્ષાલિની
પ્રસન્નવદના શુભા ભવભયસ્ય વિદ્રાવિણી .. ૨..
ભગીરથરથાનુગા સુરકરીન્દ્રદર્પાપહા
મહેશમુકુટપ્રભા ગિરિશિરઃપતાકા સિતા .
સુરાસુરનરોરગૈરજભવાચ્યુતૈઃ સંસ્તુતા
વિમુક્તિફલશાલિની કલુષનાશિની રાજતે .. ૩..
પિતામહકમણ્ડલુપ્રભવમુક્તિબીજા લતા
શ્રુતિસ્મૃતિગણસ્તુતદ્વિજકુલાલવાલાવૃતા .
સુમેરુશિખરાભિદા નિપતિતા ત્રિલોકાવૃતા
સુધર્મફલશાલિની સુખપલાશિની રાજતે .. ૪..
ચરદ્વિહગમાલિની સગરવંશમુક્તિપ્રદા
મુનીન્દ્રવરનન્દિની દિવિ મતા ચ મન્દાકિની .
સદા દુરિતનાશિની વિમલવારિસન્દર્શન-
પ્રણામગુણકીર્તનાદિષુ જગત્સુ સંરાજતે .. ૫..
મહાભિષસુતાઙ્ગના હિમગિરીશકૂટસ્તના
સફેનજલહાસિની સિતમરાલસચ્ચારિણી .
ચલલ્લહરિસત્કરા વરસરોજમાલાધરા
રસોલ્લસિતગામિની જલધિકામિની રાજતે .. ૬..
ક્વચિન્મુનિગણૈઃ સ્તુતા ક્વચિદનન્તસમ્પૂજિતા
ક્વચિત્કલકલસ્વના ક્વચિદધીરયાદોગણા .
ક્વચિદ્રવિકરોજ્જ્વલા ક્વચિદુદગ્રપાતાકુલા
ક્વચિજ્જનવિગાહિતા જયતિ ભીષ્મમાતા સતી .. ૭..
સ એવ કુશલી જનઃ પ્રણમતીહ ભાગીરથીં
સ એવ તપસાં નિધિર્જપતિ જાહ્નવીમાદરાત્ .
સ એવ પુરુષોત્તમઃ સ્મરતિ સાધુ મન્દાકિનીં
સ એવ વિજયી પ્રભુઃ સુરતરઙ્ગિણીં સેવતે .. ૮..
તવામલજલાચિતં ખગસૃગાલમીનક્ષતં
ચલલ્લહરિલોલિતં રુચિરતીરજમ્બાલિતમ્ .
કદા નિજવપુર્મુદા સુરનરોરગૈઃ સંસ્તુતોઽપ્યહં
ત્રિપથગામિનિ પ્રિયમતીવ પશ્યામ્યહો .. ૯..
ત્વત્તીરે વસતિં તવામલજલસ્નાનં તવ પ્રેક્ષણં
ત્વન્નામસ્મરણં તવોદયકથાસંલાપનં પાવનમ્ .
ગઙ્ગે મે તવ સેવનૈકનિપુણોઽપ્યાનન્દિતશ્ચાદૃતઃ
સ્તુત્વા ચોદ્ગતપાતકો ભુવિ કદા શાન્તશ્ચરિષ્યામ્યહમ્ .. ૧૦..
ઇત્યેતદૃષિભિઃ પ્રોક્તં ગઙ્ગાસ્તવનમુત્તમમ્ .
સ્વર્ગ્યં યશ્સ્યમાયુષ્યં પઠનાચ્છ્રવણાદપિ .. ૧૧..
સર્વપાપહરં પુંસાં બલમાયુર્વિવર્ધનમ્ .
પ્રાતર્મધ્યાહ્નસાયાહ્ને ગઙ્ગાસાન્નિધ્યતા ભવેત્ .. ૧૨..
ઇત્યેતદ્ભાર્ગવાખ્યાનં શુકદેવાન્મયા શ્રુતમ્ .
પઠિતં શ્રાવિતં ચાત્ર પુણ્યં ધન્યં યશસ્કરમ્ .. ૧૩..
અવતારં મહાવિષ્ણોઃ કલ્કેઃ પરમમદ્ભુતમ્ .
પઠતાં શૃણ્વતાં ભક્ત્યા સર્વાશુભવિનાશનમ્ .. ૧૪..
ઇતિ શ્રીકલ્કિપુરાણેઽનુભાગવતે ભવિષ્યે તૃતીયાંશે
ઋષિકૃતો ગઙ્ગાસ્તવઃ સમ્પૂર્ણઃ ..
Encoded and proofread by Dinesh Agarwal dinesh.garghouse at gmail.com
Proofread by PSA EASWARAN psaeaswaran at gmail.com