#গঙ্গাস্তবঃ

  

শ্রীগণেশায় নমঃ ॥

সূত উবাচ --

শৃণুধ্বং মুনয়ঃ সর্বে গঙ্গাস্তবমনুত্তমম্ ।

শোকমোহহরং পুংসামৃষিভিঃ পরিকীর্তিতম্ ॥ ১॥

ঋষয় ঊচুঃ --

ইয়ং সুরতরঙ্গিণী ভবনবারিধেস্তারিণী  

স্তুতা হরিপদাম্বুজাদুপগতা জগৎসংসদঃ ।             

সুমেরুশিখরামরপ্রিয়জলামলক্ষালিনী 

প্রসন্নবদনা শুভা ভবভয়স্য বিদ্রাবিণী ॥ ২॥

ভগীরথরথানুগা সুরকরীন্দ্রদর্পাপহা        

মহেশমুকুটপ্রভা গিরিশিরঃপতাকা সিতা ।

সুরাসুরনরোরগৈরজভবাচ্যুতৈঃ সংস্তুতা 

বিমুক্তিফলশালিনী কলুষনাশিনী রাজতে ॥ ৩॥

পিতামহকমণ্ডলুপ্রভবমুক্তিবীজা লতা

শ্রুতিস্মৃতিগণস্তুতদ্বিজকুলালবালাবৃতা ।

সুমেরুশিখরাভিদা নিপতিতা ত্রিলোকাবৃতা 

সুধর্মফলশালিনী সুখপলাশিনী রাজতে ॥ ৪॥

চরদ্বিহগমালিনী সগরবংশমুক্তিপ্রদা 

মুনীন্দ্রবরনন্দিনী দিবি মতা চ মন্দাকিনী ।

সদা দুরিতনাশিনী বিমলবারিসন্দর্শন-    

প্রণামগুণকীর্তনাদিষু জগৎসু সংরাজতে ॥ ৫॥

মহাভিষসুতাঙ্গনা হিমগিরীশকূটস্তনা 

সফেনজলহাসিনী সিতমরালসচ্চারিণী ।

চলল্লহরিসৎকরা বরসরোজমালাধরা 

রসোল্লসিতগামিনী জলধিকামিনী রাজতে ॥ ৬॥

ক্বচিন্মুনিগণৈঃ স্তুতা ক্বচিদনন্তসম্পূজিতা        

ক্বচিৎকলকলস্বনা ক্বচিদধীরয়াদোগণা ।

ক্বচিদ্রবিকরোজ্জ্বলা ক্বচিদুদগ্রপাতাকুলা             

ক্বচিজ্জনবিগাহিতা জয়তি ভীষ্মমাতা সতী ॥ ৭॥        

স এব কুশলী জনঃ  প্রণমতীহ ভাগীরথীং 

স এব তপসাং নিধির্জপতি জাহ্নবীমাদরাৎ ।

স এব পুরুষোত্তমঃ স্মরতি সাধু মন্দাকিনীং 

স এব বিজয়ী প্রভুঃ সুরতরঙ্গিণীং সেবতে ॥ ৮॥         

তবামলজলাচিতং খগসৃগালমীনক্ষতং 

চলল্লহরিলোলিতং রুচিরতীরজম্বালিতম্ ।

কদা নিজবপুর্মুদা সুরনরোরগৈঃ সংস্তুতোঽপ্যহং 

ত্রিপথগামিনি প্রিয়মতীব পশ্যাম্যহো ॥ ৯॥

ত্বত্তীরে বসতিং তবামলজলস্নানং তব প্রেক্ষণং 

ত্বন্নামস্মরণং তবোদয়কথাসংলাপনং পাবনম্ ।

গঙ্গে মে তব সেবনৈকনিপুণোঽপ্যানন্দিতশ্চাদৃতঃ 

স্তুত্বা চোদ্গতপাতকো ভুবি কদা শান্তশ্চরিষ্যাম্যহম্ ॥ ১০॥

ইত্যেতদৃষিভিঃ প্রোক্তং গঙ্গাস্তবনমুত্তমম্ ।         

স্বর্গ্যং যশ্স্যমায়ুষ্যং পঠনাচ্ছ্রবণাদপি ॥ ১১॥     

সর্বপাপহরং পুংসাং বলমায়ুর্বিবর্ধনম্ ।

প্রাতর্মধ্যাহ্নসায়াহ্নে গঙ্গাসান্নিধ্যতা ভবেৎ ॥ ১২॥

ইত্যেতদ্ভার্গবাখ্যানং শুকদেবান্ময়া শ্রুতম্ ।

পঠিতং শ্রাবিতং চাত্র পুণ্যং ধন্যং যশস্করম্ ॥ ১৩॥    

অবতারং মহাবিষ্ণোঃ কল্কেঃ পরমমদ্ভুতম্ ।

পঠতাং শৃণ্বতাং ভক্ত্যা সর্বাশুভবিনাশনম্ ॥ ১৪॥

ইতি শ্রীকল্কিপুরাণেঽনুভাগবতে ভবিষ্যে তৃতীয়াংশে

ঋষিকৃতো গঙ্গাস্তবঃ সম্পূর্ণঃ ॥ 

 

Encoded and proofread by Dinesh Agarwal  dinesh.garghouse at gmail.com

Proofread by PSA EASWARAN psaeaswaran at gmail.com