#ಗಂಗಾಷ್ಟಕಂ ಶ್ರೀವಾಲ್ಮಿಕಿವಿರಚಿತಂ

 ಮಾತಃ ಶೈಲಸುತಾ-ಸಪತ್ನಿ ವಸುಧಾ-ಶೃಂಗಾರಹಾರಾವಲಿ

ಸ್ವರ್ಗಾರೋಹಣ-ವೈಜಯಂತಿ ಭವತೀಂ ಭಾಗೀರಥೀಂ ಪ್ರಾರ್ಥಯೇ .

ತ್ವತ್ತೀರೇ ವಸತಃ ತ್ವದಂಬು ಪಿಬತಸ್ತ್ವದ್ವೀಚಿಷು ಪ್ರೇಂಖತಃ

ತ್ವನ್ನಾಮ ಸ್ಮರತಸ್ತ್ವದರ್ಪಿತದೃಶಃ ಸ್ಯಾನ್ಮೇ ಶರೀರವ್ಯಯಃ .. 1..

ತ್ವತ್ತೀರೇ ತರುಕೋಟರಾಂತರಗತೋ ಗಂಗೇ ವಿಹಂಗೋ ಪರಂ

ತ್ವನ್ನೀರೇ ನರಕಾಂತಕಾರಿಣಿ ವರಂ ಮತ್ಸ್ಯೋಽಥವಾ ಕಚ್ಛಪಃ .

ನೈವಾನ್ಯತ್ರ ಮದಾಂಧಸಿಂಧುರಘಟಾಸಂಘಟ್ಟಘಂಟಾರಣ-

ತ್ಕಾರಸ್ತತ್ರ ಸಮಸ್ತವೈರಿವನಿತಾ-ಲಬ್ಧಸ್ತುತಿರ್ಭೂಪತಿಃ .. 2..

ಉಕ್ಷಾ ಪಕ್ಷೀ ತುರಗ ಉರಗಃ ಕೋಽಪಿ ವಾ ವಾರಣೋ ವಾಽ-

ವಾರೀಣಃ ಸ್ಯಾಂ ಜನನ-ಮರಣ-ಕ್ಲೇಶದುಃಖಾಸಹಿಷ್ಣುಃ .

ನ ತ್ವನ್ಯತ್ರ ಪ್ರವಿರಲ-ರಣತ್ಕಿಂಕಿಣೀ-ಕ್ವಾಣಮಿತ್ರಂ

ವಾರಸ್ತ್ರೀಭಿಶ್ಚಮರಮರುತಾ ವೀಜಿತೋ ಭೂಮಿಪಾಲಃ .. 3..

ಕಾಕೈರ್ನಿಷ್ಕುಷಿತಂ ಶ್ವಭಿಃ ಕವಲಿತಂ ಗೋಮಾಯುಭಿರ್ಲುಂಟಿತಂ

ಸ್ರೋತೋಭಿಶ್ಚಲಿತಂ ತಟಾಂಬು-ಲುಲಿತಂ ವೀಚೀಭಿರಾಂದೋಲಿತಂ .

ದಿವ್ಯಸ್ತ್ರೀ-ಕರ-ಚಾರುಚಾಮರ-ಮರುತ್ಸಂವೀಜ್ಯಮಾನಃ ಕದಾ

ದ್ರಕ್ಷ್ಯೇಽಹಂ ಪರಮೇಶ್ವರಿ ತ್ರಿಪಥಗೇ ಭಾಗೀರಥೀ ಸ್ವಂ ವಪುಃ .. 4..

ಅಭಿನವ-ಬಿಸವಲ್ಲೀ-ಪಾದಪದ್ಮಸ್ಯ ವಿಷ್ಣೋಃ

ಮದನ-ಮಥನ-ಮೌಲೇರ್ಮಾಲತೀ-ಪುಷ್ಪಮಾಲಾ .

ಜಯತಿ ಜಯಪತಾಕಾ ಕಾಪ್ಯಸೌ ಮೋಕ್ಷಲಕ್ಷ್ಮ್ಯಾಃ

ಕ್ಷಪಿತ-ಕಲಿಕಲಂಕಾ ಜಾಹ್ನವೀ ನಃ ಪುನಾತು .. 5..

ಏತತ್ತಾಲ-ತಮಾಲ-ಸಾಲ-ಸರಲವ್ಯಾಲೋಲ-ವಲ್ಲೀಲತಾ-

ಚ್ಛತ್ರಂ ಸೂರ್ಯಕರ-ಪ್ರತಾಪರಹಿತಂ ಶಂಖೇಂದು-ಕುಂದೋಜ್ಜ್ವಲಂ .

ಗಂಧರ್ವಾಮರ-ಸಿದ್ಧ-ಕಿನ್ನರವಧೂ-ತುಂಗಸ್ತನಾಸ್ಪಾಲಿತಂ

ಸ್ನಾನಾಯ ಪ್ರತಿವಾಸರಂ ಭವತು ಮೇ ಗಾಂಗಂ ಜಲಂ ನಿರ್ಮಲಂ .. 6..

ಗಾಂಗಂ ವಾರಿ ಮನೋಹಾರಿ ಮುರಾರಿ-ಚರಣಚ್ಯುತಂ .

ತ್ರಿಪುರಾರಿ-ಶಿರಶ್ಚಾರಿ ಪಾಪಹಾರಿ ಪುನಾತು ಮಾಂ .. 7..

ಪಾಪಾಪಹಾರಿ ದುರಿತಾರಿ ತರಂಗಧಾರಿ

ಶೈಲಪ್ರಚಾರಿ ಗಿರಿರಾಜ-ಗುಹಾವಿದಾರಿ .

ಝಂಕಾರಕಾರಿ ಹರಿಪಾದ-ರಜೋಪಹಾರಿ

ಗಾಂಗಂ ಪುನಾತು ಸತತಂ ಶುಭಕಾರಿ ವಾರಿ .. 8..

ಗಂಗಾಷ್ಟಕಂ ಪಠತಿ ಯಃ ಪ್ರಯತಃ ಪ್ರಭಾತೇ

ವಾಲ್ಮೀಕಿನಾ ವಿರಚಿತಂ ಶುಭದಂ ಮನುಷ್ಯಃ .

ಪ್ರಕ್ಷಾಲ್ಯ ಗಾತ್ರ-ಕಲಿಕಲ್ಮಷ-ಪಂಕ-ಮಾಶು

ಮೋಕ್ಷಂ ಲಭೇತ್ ಪತತಿ ನೈವ ನರೋ ಭವಾಬ್ಧೌ .. 9..

.. ಇತಿ ವಾಲ್ಮೀಕಿವಿರಚಿತಂ ಗಂಗಾಷ್ಟಕಂ ಸಂಪೂರ್ಣಂ ..

Encoded and proofread by N.Balasubramanian bbalu@sify.com