శ్రీశైలేశదయాపాత్రం ధీభక్త్యాదిగుణార్ణవమ్ |
యతీంద్రప్రవణం వందే రమ్యజామాతరం మునిమ్ ||
లక్ష్మీచరణలాక్షాంకసాక్షీ శ్రీవత్సవక్షసే |
క్షేమం‍కరాయ సర్వేషాం శ్రీరంగేశాయ మంగళమ్ || ౧ ||
శ్రియఃకాంతాయ కల్యాణనిధయే నిధయేఽర్థినామ్ |
శ్రీవేంకటనివాసాయ శ్రీనివాసాయ మంగళమ్ || ౨ ||
అస్తు శ్రీస్తనకస్తూరీవాసనావాసితోరసే |
శ్రీహస్తిగిరినాథాయ దేవరాజాయ మంగళమ్ || ౩ ||
కమలాకుచకస్తూరీకర్దమాంకితవక్షసే |
యాదవాద్రినివాసాయ సంపత్పుత్రాయ మంగళమ్ || ౪ ||
శ్రీనగర్యాం మహాపుర్యాం తామ్రపర్ణ్యుత్తరే తటే |
శ్రీతింత్రిణీమూలధామ్నే శఠకోపాయ మంగళమ్ || ౫ ||
శ్రీమత్యై విష్ణుచిత్తార్యమనోనందనహేతవే |
నందనందనసుందర్యై గోదాయై నిత్యమంగళమ్ || ౬ ||
శ్రీమన్మహాభూతపురే శ్రీమత్కేశవయజ్వనః |
కాంతిమత్యాం ప్రసూతాయ యతిరాజాయ మంగలమ్ || ౭ ||
మంగళాశాసనపరైః మదాచర్యపురోగమైః |
సర్వైశ్చ పూర్వైరాచార్యైః సత్కృతాయాస్తు మంగళమ్ || ౮ ||
పిత్రే బ్రహ్మోపదేష్ట్రే మే గురవే దైవతాయ చ |
ప్రాప్యాయ ప్రాపకాయాఽస్తు వేంకటేశాయ మంగళమ్ || ౯ ||
శ్రీమతే రమ్యజామాతృ మునీంద్రాయ మహాత్మనే |
శ్రీరంగవాసినే భూయాత్ మంగళం నిత్యమంగళమ్ || ౧౦ ||